Xii nga Watch Tower Bible and Tract Society
Watch Tower Bible and Tract Society of Pennsylvania nga ti corporación ni qué runi negocio ne biasastí ni lu iza 1884 casi na ca ley stiʼ estadu stiʼ Pensilvania (Estados Unidos). Ca testigu stiʼ Jiobá riquiiñecaʼ entidad legal riʼ para gacané ni laacaʼ gaca dxiiñaʼ rúnicaʼ lu guidubi Guidxilayú, casi cueecaʼ Biblia ne ca publicación riree luni.
Ca norma stiʼ corporación riʼ na guca ni para guiníʼ ni de «religión, gusiidiʼ ni binni ne gacané ni laacaʼ». Peru ni jma risaca runi ni nga racané ni «guireeche diidxaʼ ne guiziidiʼ binni de Reinu stiʼ Dios ra cayuni mandar Jesucristu». Ximodo riuu binni lu corporación riʼ yaʼ. Raca invitárcabe ne qué riuucabe luni purtiʼ si gudiicabe bueltu. Cani nuu lu corporación riʼ ne ca director stini rúnicaʼ caadxi dxiiñaʼ para gacanecaʼ Grupu ni Zaniruʼ stiʼ ca Testigu stiʼ Jiobá.
Xcaadxi entidad legal nápadu
Náparuʼ ca testigu stiʼ Jiobá stale entidad legal ndaaniʼ xcaadxi guidxi aparte de Watch Tower Bible and Tract Society of Pennsylvania. Nuu caadxi de laacani ziné cani «Watch Tower», «Watchtower» o traducción stiʼ ca diidxaʼ riʼ lu lá cani.
Dede dxi biasastí ca entidad riʼ huayacané cani laadu cueendudu stale cosa galán. Ndiʼ nga caadxi de laacani:
Rucaʼdu ne ribeedu publicación. Maʼ huabeedu biaʼ 220 millón Biblia ne biaʼ 40 mil millón publicación ni biree lu Biblia lu jma de 700 diidxaʼ. Pur sitiu jw.org ni nuu lu Internet randa ruundaʼ binni Biblia sin quixe lu jma de 120 diidxaʼ ne ridxélacaʼ xiixa ni racaláʼdxicaʼ gánnacaʼ casi «Xii nga Reinu stiʼ Dios».
Rusíʼdidu. Rúnidu cursu ni rusiidiʼ de Biblia. Dede lu iza 1943, huayacané guiráʼ ni rusiidicabe lu Scuela stiʼ Galaad stiʼ Watchtower jma de 8,000 testigu stiʼ Jiobá gácacaʼ misioneru o gacanecaʼ guiroobaʼ dxiiñaʼ rúnidu lu guidubi Guidxilayú. Laaca riziidiʼ millón binni, stale de laacaʼ cadi nácacaʼ Testigu, lu ca reunión rapa ca congregación guiráʼ semana. Ne laaca rúnidu cursu para gacanedu binni guiziidiʼ guʼndaʼ ne gucaa ne maʼ guleedu ti manual lu 110 diidxaʼ para gacané laadu gúnidu ni.
Racanedu binni. Rudiʼdu ca cosa ni jma riquiiñeʼ cani gacaná lu xiixa desgracia biʼniʼ hombre ne desastre natural. Casi dxi gucanedu ca binni gucaná pur guerra ni guca Ruanda lu iza 1994 ne dxi guca xu Haití lu iza 2010.
Neca stale nga ni huabeendudu pur ca corporación ne ca entidad legal riʼ, peru qué ricá ludu nin tobi de laacani para gúnidu dxiiñaʼ stidu. Guiráʼ xpinni Cristu naquiiñeʼ gucheeche diidxaʼ ne gusiidiʼ binni cani zeeda lu Biblia(Mateo 24:14; 28:19, 20). Nanna dxíchidu cayacané Dios laadu gaca dxiiñaʼ stidu riʼ ne qué zusaana de gusiroobaʼ ni (1 Corintios 3:6, 7).