Zanda gacané Jehová lii ora guni sentirluʼ nuuluʼ triste o careeluʼ gana

1, 2. ¿Ximodo biʼniʼ sentir Pablo ne ximodo zanda gacané ejemplu stibe laanu? (Romanos 7:21-24).

ORA riníʼ íquenu de apóstol Pablo, zándaca reeda ndaaniʼ íquenu biʼniʼ predicarbe gadxé gadxé guidxi, gúcabe ti maestru ni nanna gusiidiʼ ne bicaabe stale libru ni zeeda lu Biblia. Laaca zándaca rietenaláʼdxinu gucaabe ti hombre nadxibalú ni qué nixeleʼ de Dios. Ne cásica stale de laanu laaca guyuu biaje biʼniʼ sentirbe nuube triste, careebe gana o nabé nuube xizaa.

² (Biindaʼ Romanos 7:21-24). Lu Carta ni bicaa apóstol Pablo ra nuu ca xpinni Cristu de Roma, bizeetebe ni runi sentirbe ne zándaca laaca runi sentirnu ni biʼniʼ sentirbe. Neca gúcabe ti xpinni Cristu ni qué nixeleʼ de Dios ne rúnibe ni riuulaʼdxiʼ Dios peru ruquiinderuʼ laabe gúnibe cosa malu ne naquiiñeʼ gudxiilube ni gatigá. Nuu biaje runi sentirbe feu ora rietenaláʼdxibe modo gúcabe dxiqué ne laaca riuube triste purtiʼ nápabe ti guendanagana ni qué ganda guni chaahuibe.

3. ¿Xi zadúʼyanu lu artículo riʼ? (Laaca zanda gúʼyaluʼ «Idea risaca»).

³ Neca cudxiilú Pablo guendanagana que, peru qué nudiibe lugar guniná ngue laabe.a Lu artículo riʼ zadúʼyanu xiñee guyuu biaje biʼniʼ sentir apóstol Pablo naná nuu ne xi gucané laabe gudxiilube ni runi sentirbe riʼ ne zaqueca zadúʼyanu xi zanda gúninu ora runi sentirnu nuunu triste o careenu gana.

XIÑEE GUYUU BIAJE BIʼNIʼ SENTIR PABLO NUU TRISTE

4. ¿Gunáʼ nga tobi de ca razón ni bicaa Pablo gacaná ladxidóʼ?

⁴ Ca cosa ni cadi jneza bíʼnibe dxiqué. Ante gaca Pablo xpinni Cristu binibiáʼcabe laa casi Saulo, bíʼnibe caadxi cosa ni cadi jneza, peru despué bininácani laabe. Biiyabe ora biiticabe Esteban (Hech. 7:58; 8:1). Ne laaca guzanándabe ca xpinni Cristu para guninabe laacaʼ (Hech. 8:3; 26:9-11).

5. ¿Xi biʼniʼ sentir Pablo ora guietenalaʼdxiʼ ca cosa cadi jneza ni biʼniʼ dxiqué?

⁵ Despué de guca apóstol Pablo xpinni Cristu, guyuu biaje biʼniʼ sentirbe nápabe donda ora rietenaláʼdxibe ca cosa ni bíʼnibe dxiqué ne zándaca ra zidiʼdiʼ iza jma runinácani laabe. Guzéʼtenu ti ejemplu, lu primé Carta ni bicaabe ra nuu ca xpinni Cristu de Corinto, biaʼ lu iza 55, guniʼbe: «Qué runeʼ merecer gábicabe naa apóstol purtiʼ guzayanandaʼ congregación stiʼ Dios» (1 Cor. 15:9). Gaayuʼ iza despué, maʼ lu Carta ni bicaabe ra nuu ca xpinni Cristu de Éfeso guniʼbe: «Jma huaxiéʼ risacaʼ lade ca xpinni Dios» (Efes. 3:8). Ne lu tobi de ca carta bicaabe ra nuu Timoteo bizeetebe, ante gácabe xpinni Cristu guniʼbe mal de Dios, guzanándabe ca xpinni ne gúcabe ti binni orgulloso (1 Tim. 1:13). ¿Ñee riníʼ íquenu xi biʼniʼ sentir Pablo ora riganna ca congregación ne málasi guidxaagalú ti xpinni Cristu o ti familia stiʼ ti xpinni Cristu ni guzanándabe la?

6. ¿Gunáʼ nga sti cosa ni bininá Pablo? (Laaca zanda gúʼyaluʼ nota ca).

⁶ Ti guichi lu beela ládibe. Bicaa Pablo nuu xiixa ni nabé bininá laabe ne bichaagabe ni casi ti guichi lu beela ládibe (2 Cor. 12:7). Qué nuzeetebe pa nácani ti guendahuará ni runiná xcuérpube, xquendabiaanibe o ladxidoʼbe. Peru rusihuinni ca diidxaʼ ni guniʼbe nácani ti cosa ni guizáʼ runiná laabe.b

7. ¿Xiñee guca nagana para Pablo guni ni jneza? (Romanos 7:18, 19).

⁷ Nácabe binni ruchee. Cudxiilú Pablo caadxi guendanagana pur modo naca (biindaʼ Romanos 7:18, 19). Neca racaláʼdxibe gúnibe ni jneza, peru guyuu biaje gadxé ni bíʼnibe. Rúnibe stipa pur gúnibe guiráʼ ni nuu lu nabe para gúnibe ni ná Jehová, peru gúnibe rácani nagana para laabe (1 Cor. 9:27). Zándaca ridxiichinebe laca laabe ora ribiguetaʼ rúnibe o riniʼbe xiixa ni cayúnibe stipa pur gusaana de gúnibe.

XI GUCANÉ PABLO ORA GUYUU TRISTE

8. ¿Xi gucané Pablo guchaa modo naca?

⁸ Rihuinni lu ca carta stiʼ Pablo, nabé nga guníʼ íquebe ximodo gucané espíritu stiʼ Dios laabe ne zaqueca modo racaneni xcaadxi xpinni Cristu para gudxiilucaʼ ca cosa ni cadi jneza bíʼnicaʼ (Rom. 8:13; Gál. 5:16, 17). Stale biaje gúdxibe ca xpinni Cristu para chuulaʼdxiʼ Dios ni gúnicaʼ la? naquiiñeʼ gusaanacaʼ ca deseu malu ni gúpacaʼ ne zaqueca ca cosa ni ruxheleʼ laacaʼ de Dios (Gál. 5:19-21, 26). Cumu nánnabe nácabe binni ruchee la? ruyúbibe gacané Stiidxaʼ Dios laabe para guchaabe ra naquiiñeʼ guchaabe. Nanna dxíchinu laaca yenanda Pablo ca conseju ni bidiibe xcaadxi binni.

9, 10. ¿Xi gucané Pablo ora guyuu triste? (Efesios 1:7; laaca zanda gúʼyaluʼ imagen ca).

⁹ Neca guyuu biaje biʼniʼ sentir Pablo triste, peru bíʼnibe caadxi cosa ni gucané laabe chuʼbe nayecheʼ. Riéchebe ora gánnabe galán nuu ca congregación ni nuu zitu (2 Cor. 7:6, 7). Laaca guyuube nayecheʼ purtiʼ gúpabe xhamígube (2 Tim. 1:4). Ne laaca guyuube nayecheʼ purtiʼ nánnabe riuulaʼdxiʼ Jehová dxiiñaʼ ni cayúnibe ne rúnibe ni né «ti conciencia nayá» (2 Tim. 1:3). Ne dxi biseguyoocabe laabe ndaaniʼ guidxi Roma, gúdxibe ca xpinni Cristu: «Siempre lachuu nayecheʼ purtiʼ xpinni Señor laatu» (Filip. 4:4). Qué zaniʼdiʼ ti binni ni nabé nuu triste, ni nabé nuu xizaa o ni maʼ biree gana ca diidxaʼ riʼ, ¿njaʼ? Nga rusihuinni ora guyuu Pablo triste nagueendaca biyúbibe guiníʼ íquebe cosa galán.

¹⁰ Sti cosa ni gucané Pablo para cadi guiníʼ ique cosa ni riguu laa triste nga purtiʼ biʼniʼ crebe naca guendaguti stiʼ Jesús ti regalu para laabe (Gál. 2:20; biindaʼ Efesios 1:7). Zacá guyuube seguru pur bidii Jesús xquendanabani, zanda guxhiá Jehová ca pecadu stibe (Rom. 7:24, 25). Neca biʼniʼ Pablo cosa ni cadi jneza ante gaca xpinni Cristu ne bíʼnirube stipa guchaabe modo nácabe. Gunda biʼniʼ adorarbe Jehová ne guyuube nayecheʼ (Heb. 9:12-14).

11. ¿Xiñee riguu ejemplu stiʼ Pablo gana laanu?

¹¹ Cásica Pablo, zándaca cudxíʼlunu xiixa ni rucaa laanu chuʼnu triste, zándaca gácani ni riníʼ íquenu, ni rúninu o ni rininu. Ne zándaca laaca rininu cásica guniʼbe: «¡Aque naná nuaaʼ xa!». Ti hermana ni napa jma de gande iza ni láʼ Elizac guníʼ: «Guizáʼ riuaaʼ gana ora riníʼ iqueʼ ejemplu stiʼ Pablo. Riguixhedxini ladxiduáʼ ra gannaʼ cadi naa siaʼ nga runeʼ sentir zacá. Ne rusietenalaʼdxiʼ ni naa nanna Jehová xi guendanagana cadiʼdiʼ ca xpinni». Yanna, guidúʼyanu xi zanda gúninu para gápanu ti conciencia nayá ne chuʼnu nayecheʼ, neca ziuu biaje ziuʼnu xizaa, ziuʼnu triste o zareʼnu gana cásica Pablo.

XI ZANDA CUʼ GANA LAANU

12. Ora rúninu stipa gúninu ca cosa ni ruchiña laanu gaxha de Dios, ¿ximodo racaneni laanu?

¹² Naquiiñeʼ gúninu ca cosa ni guchiña laanu gaxha de Dios. Pa laanu gúninu stipa de gúninu ca cosa ni ruchiña laanu gaxha de Dios la? zacaneni laanu cadi guiníʼ íquenu ca cosa ni riguu laanu triste. Ora guidoʼno jneza, gatigá gúninu ejerciciu ne gásinu biaʼ caquiiñeʼ, runi sentirnu galán. Zaqueca nga rizaaca ora ridúʼndanu Biblia guiráʼ dxi, runi predicarnu, raca prepararnu para ca reunión stinu, riuunu ca reunión ne zaqueca rudiʼnu comentariu lúcani, runi sentirnu galán. Pa gúninu stipa pur cadi gusaana de gúninu ca cosa ni ruchiña laanu gaxha de Dios la? zacaneni laanu guibáninu nayecheʼ (Rom. 12:11, 12).

13, 14. Ora qué huasaana caadxi hermanu de gúnicaʼ ca cosa ni guchiña laacaʼ gaxha de Dios, ¿ximodo huayacaneni laacaʼ?

¹³ Guidúʼyanu ni bizaaca Juan, dxi nápabe 39 iza, gúdxicabe laabe nápabe cáncer. Primeru ga que nabé guyuube triste. Ne guniʼbe: «Pa nahuiineʼ ruaaʼ xiñee gunaaze guendahuará riʼ naa». Laabe né xheelabe nápacabe ti hombrehuiiniʼ de chonna iza. ¿Xi gucané laabe cadi guireebe gana yaʼ? Sicaríʼ guniʼbe: «Neca rusidxaga guendahuará que naa, peru rúnidu stipa para cadi gusaana de gúnidu ca cosa ni guchiña laadu gaxha de Dios. Nuu biaje rácani nagana, peru qué nusaana de ñuudu ca reunión ca, qué nusaana de ñuni predicardu ne ñápadu adoración en familia». Ne guníʼrube: «Ora gábicabe laanu nápanu ti guendahuará grave, riguuni laanu triste, peru racané Jehová laanu cadi guireʼnu gana. Rudiibe laanu stipa ni caquíʼñenu ne rusihuínnibe nabé nadxiibe laanu. Cásica gucanebe naa laaca zacanebe lii».

¹⁴ Eliza, hermana ni bizéʼtenu lu párrafo 11 que, guníʼ: «Ora riaaʼ ca reunión ca ne runeʼ estudiu personal stinneʼ racanécani naa chuaaʼ segura rucaadiaga Jehová naa ne guizáʼ nadxiibe naa. Nga nabé rusiecheʼ ni naa». Ti superintendente de circuito de guidxi África, láʼ Nolan, bisiene xi gucané laa ne xheelaʼ, Diane, sicaríʼ guniʼbe: «Rúnidu stipa cadi gusaana de gúnidu ca cosa ni guchiña laadu gaxha de Jehová dede ora huaxiéʼ gana nápadu. Zacá ridúʼyadu modo racané Jehová laadu chuʼdu nayecheʼ. Rúnidu stipa guietenaláʼdxidu zacané Jehová laadu ne zaguu ndaayaʼ laadu. Neca qué gánnadu ximodo peʼ gúnibe ni, peru nuudu seguru zúnibe ni».

15. Bisiene né ti ejemplu xiruʼ zanda gúninu ni zanda gacané laanu gusaana de chuʼnu triste.

¹⁵ Ne nuuruʼ xcaadxi cosa ni zanda gacané laanu pa cayuni sentirnu nuunu triste o careʼnu gana. Para guiénenu ni, guzéʼtenu ti ejemplu. Guiníʼ íquenu cayuubaʼ déchenu. Pa sanu guiráʼ dxi zándaca zacaneni laanu cadi guiuubaʼ peʼ ni, peru pa racaláʼdxinu gusaana de guiuubaʼ déchenu la? naquiiñeʼ gúninu xiixa, casi guni investigarnu de laani ne chuunu doctor. Zaqueca para gusaana de chuʼnu triste, zándaca naquiiñeʼ guyúbinu información lu Biblia ne zaqueca lu ca publicación stinu, dede zanda guidxíñanu ti hermanu para gacané laanu. Guidúʼyanu chupa chonna cosa ni zanda gacané laanu.

16. ¿Xi zacané laanu guidúʼyanu xiñee riníʼ íquenu ca cosa ni rucaa laanu chuʼnu triste? (Salmo 139:1-4, 23, 24).

¹⁶ Guinábanu Jehová gacané laanu gánnanu xi riguu laanu triste. Cumu nanna rey David runibiáʼ chaahuiʼ Jehová laa, gunábabe laa guuyaʼ xi cuchiiñaʼ xquendabiaanibe (biindaʼ Salmo 139:1-4, 23, 24). Laanu laaca zanda guinábanu Jehová gacané laanu guidúʼyanu xiñee riníʼ íquenu cosa ni rucaa laanu guni sentirnu nuunu triste o guireʼnu gana ne gacanebe laanu para gusaana de guiníʼ íquenu cani, laaca galán nga guiníʼ íquenu ca pregunta riʼ: «¿Xii nga riguu xizaa naa? ¿Ñee nuu xiixa ni rucaa naa guiníʼ iqueʼ ca cosa ni riguu naa triste la? ¿Ñee raca nagana para naa gusaana de guiníʼ iqueʼ cani la?

17. ¿Xi tema zanda guni investigarnu lu estudiu personal stinu? (Laaca zanda gúʼyaluʼ imagen ca).

¹⁷ Guni estudiarnu ti tema ni peʼ caquíʼñenu lu estudiu personal stinu. Gatigá galán guni estudiarnu ca cualidad stiʼ Jehová. Guzéʼtenu ti ejemplu, ora apóstol Pablo guníʼ ique lu rini ni bixhii Jesús pur laanu ne modo runi perdonar Jehová laanu guizáʼ gacaneni laabe. ¿Xiñee qué gúninu cásica bíʼnibe yaʼ? Zanda iquíʼñenu folletu ni láʼ Ca tema ni huabee ca testigu stiʼ Jiobá ne zaqueca Índice de las publicaciones Watch Tower para guni investigarnu xiixa tema, casi misericordia, perdón ne guendarannaxhii stiʼ Dios. Gúninu ti lista de ca artículo ni rabinu zacané laanu ne guidúʼndanu cani ne guni estudiarnu cani ora guni sentirnu nuunu triste o careʼnu gana. Ne guyúbinu ximodo zanda gúninu ni nácani (Filip. 4:8).

18. ¿Xi proyectu de estudiu huayuni caadxi hermanu ni huayacané laacaʼ?

¹⁸ Guidúʼyanu xi biʼniʼ Eliza, hermana ni maca bizéʼtenu que, gudixhe íquebe gúnibe ti proyectu de estudiu, guni investigarbe de Job. Sicaríʼ guniʼbe: «Cumu bidxaagaluáʼ stale guendanagana la? gudixhe iqueʼ guneʼ estudiar ejemplu stiʼ Job. Purtiʼ laa bidxaagalú stale guendanagana ne nabé guyuu triste. Ne neca qué gánnabe xi pur cayacanabe qué nusaana de ñápabe confianza zacané Jehová laabe» (Job 42:1-6). Diane, hermana ni maca bizéʼtenu lu párrafo 14 que, guníʼ: «Naa ne xheelaʼ gudixhe íquedu guni estudiardu libru Acerquémonos a Jehová. Guizáʼ rudiʼdu xquixe peʼ Jehová purtiʼ racané laadu gácadu casi laa. Ora riuʼdu triste o rireʼdu gana pur nácadu binni ruchee, riníʼ íquedu nuu Jehová cusiidiʼ laadu para ganda gusihuínnidu ca cualidad stiʼ. Ne nga racané laadu chuʼdu jma gaxha de laabe» (Is. 64:8).

ZANDA CHUʼNU SEGURU ZACANÉ JEHOVÁ LAANU NE ZAGUUBE NDAAYAʼ LAANU

19. ¿Ximodo zanda guni sentirnu nuu biaje, peru xi nanna dxíchinu?

¹⁹ Neca rúninu ca cosa ni ruchiña laanu gaxha de Jehová ne runi investigarnu tema ni peʼ caquíʼñenu lu estudiu personal stinu, ziuu biaje zuni sentirnu triste, que gápanu gana o qué runi merecernu guendarannaxhii stiʼ Jehová, casi guníʼ Pablo. Peru zanda chuʼnu seguru zacané Jehová laanu ora guni sentirnu zacá. Ne laaca zanda chuʼnu seguru jma stale biaje nga ziuʼnu nayecheʼ purtiʼ nuunu gaxha de Jehová, ne zanda gúninu ni nabe ne ti conciencia nayá.

20. ¿Xi maʼ gudixhe íquenu cadi gusaana de gúninu?

²⁰ Cadi gusaana de gúninu guiráʼ ni nuu lu nanu para gudxiilunu ca cosa ni rucaa laanu chuʼnu triste pur ca cosa ni cadi jneza bíninu dxiqué, ca guendanagana stinu o pur nácanu binni ruchee. Nánnanu zacané Jehová laanu guibáninu nayecheʼ (Sal. 143:10). Ne guizáʼ maʼ racaláʼdxinu guedandá dxi ra maʼ cadi guni sentirnu nuunu triste. Ndaaniʼ guidxilayú cubi ca, maʼ que zaníʼ íquenu ca cosa ni riguu laanu xizaa o ni riguu laanu triste… ¡ziuʼnu nayecheʼ gúninu ni ná Jehová, Dios ni guizáʼ nadxii laanu!