¿Rietenalaʼdxuʼ la?
¿Ñee maʼ biindaluʼ ca últimu artículo ni bedané revista Torre stiʼ ni rapa la? Biiyaʼ pa zanda guicábiluʼ ca pregunta riʼ:
¿Xi razón nápanu para gusisácanu Jehová?
Rusisácanu Jehová purtiʼ runi respetarnu laabe de guidubi ladxidoʼno ne purtiʼ racaláʼdxinu gunibiáʼ xcaadxi binni laabe (w25.01, yaza 3).
Pa guniná tuuxa laanu, ¿xi zacané laanu guni perdonarnu laa?
Dxandíʼ, nagana nga gucueezanu ni runi sentirnu; peru ora qué ridaʼnu xiana ne qué ridxiichinu la? jma galán runi sentirnu (w25.02, yaza 15 ne 16).
¿Xiñee naca discípulo Marcos ti ejemplu galán para ca joven?
Guyuu Marcos listu para gacané xcaadxi. Neca zándaca biuubaʼ ladxidoʼbe ne guyuube triste pur ti cosa ni bizaaca, peru qué nireebe gana. Bíʼnibe stipa gaca xhamígube Pablo ne zaqueca xcaadxi xpinni Cristu ni maʼ biniisi lu Stiidxa Dios (w25.04, yaza 27).
Ora biʼniʼ orar Jesús Jehová ne guníʼ «maʼ bisiideʼ laacabe tu laluʼ», ¿xii ngue caniʼbe? (Juan 17:26).
Maca nanna ca discípulo stibe Jehová nga lá Dios, ni caníʼ Jesús nga maʼ bisiidibe ximodo naca Jehová, ni naguixhe ique guni, ca cosa ni maʼ biʼniʼ ne ca cualidad ni napa (w25.05, yaza 20 ne 21).
Pa nácanu humilde, ¿ximodo racaneni laanu?
Rudiʼnu cuenta nuu cosa ni qué gánnanu. Guzéʼtenu chupa chonna ejemplu, qué gánnanu padxí gueeda fin ne laaca qué gánnanu xi peʼ zuni Jehová para gacané laanu. Laaca qué gánnanu xi chiguizaaca guixíʼ ne laaca qué zanda guiénenu pabiáʼ runibiáʼ chaahuiʼ Jehová laanu w25.06, yaza 15 hasta 18).
¿Xi zanda gúninu para gacané ti artículo o ti discursu públicu laanu?
Zanda guiníʼ íquenu ca pregunta riʼ: «¿Xi prueba riete luni para gacaneni binni guni cré ni dxandíʼ? ¿Ñee cuzeeteni xiixa ejemplu ni zanda gacané naa para gusiideʼ ni dxandíʼ la? ¿Tu laa zándaca chuulaʼdxiʼ tema ca?» (w25.07, yaza 19).
Ora biʼniʼ perdonar Dios David, ¿xi rusiidini laanu de modo runi perdonarbe?
Neca bicheené David Dios, peru ora guca arrepentirbe de guidubi ladxidoʼbe, biʼniʼ perdonar Jehová laabe (1 Rey. 9:4, 5). Ora runi perdonar Jehová ca pecadu stinu, rusiaandabe cani ne maʼ qué rietenaláʼdxibe cani para guni castigarbe laanu pur laacani ne qué zuchabe ni lunu w25.08, yaza 17).
Pa cayaca nagana para ti binni ni cudiʼnu estudiu guiene xiixa ni caziidiʼ, ¿xi zanda gúninu?
Pa maʼ bisiénenu laabe xi ná Biblia de laani ne cayácaruʼ nagana para laabe guiénebe ni, galán gundúʼxenu lección ca ne maʼ despué guininu de ni cadi cayénebe ca (w25.09, yaza 24).
¿Xi caníʼ Biblia ora ná «cadi quiteʼ poder stiʼ pecadu lii»? (Heb. 3:13).
Caniʼni nácanu binni ruchee ne ruquiinde laanu gúninu cosa malu ne zanda gucaani laanu guiníʼ íquenu pa dxandíʼ nadxii Jehová laanu (w25.10, yaza 16).
¿Ximodo zanda guni orarnu Jehová para guidxíñanu jma gaxha de laa?
1) Guiníʼ íquenu ca cualidad ni napa Jehová. 2) Guiníʼ íquenu ca guendanagana ni nápanu ne gábinu ni Jehová, casi pa caʼruʼ guni perdonarnu tuuxa. 3) Cadi nagueenda nagueendaca guni orarnu. Zacá zanínenu laabe jma tiempu ne nga zacané laanu gábinu laabe xi peʼ ndiʼ cayuni sentirnu (w25.10, yaza 19 ne 20).
¿Ximodo zanda gacanenu ca binni ni maʼ huaniisi?
Ra chigánnanu laacaʼ ne guinínenu laacaʼ pur teléfono. Zanda chinenu laacabe ra nuu doctor ne guni predicarnenu laacabe (w25.11, yaza 6 ne 7).
¿Gunáʼ nga ca cosa risaca naquiiñeʼ guʼyaʼ ca ni chichaganáʼ para gusisaca guendaxheelaʼ sticaʼ Jehová?
Ca ni chichaganáʼ naquiiñeʼ guni cumplircaʼ caadxi requisitu ni maʼ gudixhe gobiernu stiʼ guidxi ra nabézacaʼ, gúʼyacabe gaca guendaxheelaʼ stícabe casi ná espíritu stiʼ Dios, cadi tidisúcabe pur modo guzuchaahuicabe, cadi chinándacabe ca costumbre ni ná Biblia cadi jneza ne guiníʼcabe xi racaláʼdxicabe gúnicabe né respetu ora maʼ caguixhe chaahuicabe xi gúnicabe lu guendaxheelaʼ stícabe (w25.12, yaza 21 hasta 24).