Modo gaca reunión Xhiiñaʼ Dios ne modo nabáninu

Índice

1. Documentu ri’ rusiene ni ca ni chigutiidi’ xiixa ndaa lu reunión Xhiiña’ Dios ne modo nabáninu. Cani chigutiidi’ xiixa ndaa lu reunión naquiiñe’ chinándaca’ ca instrucción ri’ ne laaca naquiiñe’ gú’ndaca’ ni zeeda lu Xhiiña’ Dios ne modo nabáninu ante guni prepararca’ asignación stica’. Naquiiñe’ cu’tu gana guirá’ publicador para gutiidica’ asignacion estudiantil. Ca binni ni ma’ qué riaadxa’ ca reunión stinu zanda guni participarca’ pa ma’ runi creca’ guirá’ ni rusiidi’ Biblia ne pa ma’ nabánica’ modo ná ca principiu ni naquiiñe’ chinanda ca xpinni Cristu. Pa tuuxa ná’ gaca matricular ante gaca publicador, superintendente sti’ Xhiiña’ Dios ne modo nabáninu zuundané laabe ca requisitu ca ne despué ma’ zabi laabe pa ma’ zanda gaca matricularbe. Ra güicabe diidxa’ naquiiñe’ chu’ ni rudii laabe estudiu (o bixhózebe o ñaabe pa naca xpinni Cristu) Ngaca requisitu para gaca tobi publicador ni ca’ru’ chú’nisa (od cap. 8 párr. 8).

CA DIIDXA’ GUZULUNÉ NI

2. Ti minutu. Despué de guiuunda’ canción ne gaca oración, zaquiiñe’ presidente sti’ reunión ca programa sti’ ni para gucuaani’ interés sti’ auditorio. Zuzeetebe ca puntu jma zacané congregación.

CA TESORO ZEEDA LU BIBLIA

3. Discursu (10 minutu). Lu Ni chigaca lu reunion zeeda título sti’ ni ne laaca zeeda chupa o chonna puntu principal. Ti ancianu o ti siervu ministerial capacitadu nga gudii discursu ri’. Ora guzulú guiuunda’ ti libru sti’ Biblia, zadi’di’ ti videu de presentación sti’ ni. Ra cusiene hermanu orador ca tema sti’ discursu sti’ zanda guzeetebe xiixa ni bihuinni lu videu ca, peru ni jma naquiiñe’ gusiénebe nga ca puntu ni zeeda lu Ni chigaca lu reunión. Laaca iquiiñebe ca imagen sti’ ni pa zacané cani laabe gusiénebe ca puntu risaca sti’ tema ca. Zanda iquiiñe’ sti información ni cadi zeeda lu sección ri’, pa jma zacané ni para gusiénebe tema sti’ ndaa ri’.

4. Guyúbinu ca perla ni ga’chi’ (10 minutu). Ndaa ri’ pregunta ne respuesta ni ne cadi naquiiñe’ guzeetebe xiixa ora guzulube nin ora guilúxebe. Ti ancianu o siervu ministerial capacitadu nga gutiidi’ asignación ri’. Naquiiñe’ guni hermanu ri’ guiropa’ pregunta stini. Ma’ laabe gú’yabe pa ziuunda’ ca versículo sti’ ni. Napa xidé guindaa ca comentariu sti’ ca ni guicabi 30 segundu o menu.

5. Ra guiuunda’ Biblia (4 minutu). Asignación ri’ naquiiñe’ gutiidi’ ti hermanu ni. Zuundabe ca versículo ca peru qué zuzeetebe xiixa ora guzulube nin ora guilúxebe. Ni jma caquiiñe’ guni presidente ri’ nga gacané ca estudiante gú’ndaca’ né sentidu, gú’ndaca’ bia’si, sin gucá ruaaca’ né naturalidad, guni modularca’ voz stica’, gúnica’ pausa ne gudiica’ énfasis bia’si. Cumu nuu biaje jma ziuula’ ni chiguiuunda’ la? naquiiñe’ guicaa superintendente sti’ reunión Xhiiña’ Dios ne modo nabáninu encuenta capacidad sti’ cada estudiante ante gudiibe laaca’ asignación.

GUSÍ’DINU JMA JNEZA

6. (Quince minutu). Ndaa ri’ gúcani para guizí’dinu guni predicarnu ne guni mejorarnu modo güinenu binni diidxa’ ne gusí’dinu laaca’. Pa caquiiñe’ la? ca ancianu zanda guicaaca’ ti asignación estudiantil. Ca estudiante ca zacaaca’ encuenta folletu Gusí’dinu jma jneza o Gunnaxhii binni ni zeeda ndaani’ paréntesis lu Xhiiña’ Dios ne modo nabáninu. Nuu semana zanda guicabi ca ni cucaadiaga, ne zutiidi’ ti ancianu o ti siervu ministerial capacitadu ni. (biiya’ párrafo 15 ra cá ximodo zanda gutiidilu’ ni)

7. Primé biaje guininenu binni. Zanda gutiidi’ ti hermanu o ti hermana asignación ri’. Pa gutiidi’ ti hermana ni la? napa xidé tidinebe sti hermana o tobi de familia stibe. Zanda cuícabe o guzuhuaacabe. (Para gannalu’ jma de ximodo gúnilu’ ni la? biiya’ ca párrafo 12 ne 13)

8. Bi’ni’ revisita. Zanda gutiidi’ ti hermanu o ti hermana asignación ri’. Ni chigacané laabe ca naquiiñe’ gaca ngueca sexu (km-S 5/97 yaza 2). Zanda cuícabe o gu-zuhuaacabe. Napa xidé gusihuinni estudiante ri’ xi guininu ora guibiguétanu chigannanu tuuxa ni bisihuinni interés primé biaje guninenu laa. (Para gánnalu’ jma de ximodo gúnilu’ ni la? biiya’ ca párrafo 12 ne 13).

9. Bi’ni’ discípulo. Zanda gutiidi’ ti hermanu o ti hermana asignación ri’. Ni chigacané laabe ca naquiiñe’ gaca ngueca sexu (km-S 5/97 yaza 2). Zanda cuícabe o guzuhuaacabe. Pa ma’ naca ni ti estudiu cadi caquiiñe’ di’ guini’be xiixa para guzulube ne para guilúxebe, peru zúnibe ni pa cayúnibe dxiiña’ lu puntu ca. Laaca cadi naquiiñe’ pe’ guiuunda’ guirá’ información sti’ ni en voz alta, neca zanda gaca ni.

10. Bisiene ni runi crelu’. Pa discursu ni la? zutiidi’ ti hermanu ni. Ne pa ti escenificación ni, zanda gutiidi’ ti hermanu o ti hermana ni. Zacané tobi ngueca sexu laabe o ti binnilídxibe. Naquiiñe’ guicábibe né tactu ne gusiénebe pregunta sti’ título ca ra iquiiñebe ca referencia sti’ ni. Pa nabe la? zanda guzeetebe xi lú biree ni.

11. Discursu. Ti hermanu nga naquiiñe’ gutiidi’ asignación ri’ ne tidi’ ni casi ti discursu. Ora rireeni lu apéndice A sti’ folletu Gunnaxhii binni, estudiante ca naquiiñe’ gusiénebe ximodo zanda iqui’ñenu ca textu ca ora ma’ cayuni predicarnu. Casi, gusiénebe xi riní’ ti versículo, pora zanda iquí’ñenu ni o ximodo zanda guni razonarnenu binni. Ora rireeni lu tobi de ca lección sti’ folletu ca, naquiiñe’ gusiénebe ximodo zanda iquí’ñenu ni lu predicación. Pa ruuyabe bia’si la? zanda gusiénebe ejemplu ni zeeda lu puntu 1 sti’ lección ca o sti versículo ni zeeda luni.

12. Cani zeeda luni. Ca instrucción sti’ párrafo ri’ ne stobi ca caní’ cani de ca asignación «Bizulú guni’né binni» ne «Bi’ni’ revisita». Pa cadi canaba’ ni sti cosa la? ni caquiiñe’ guni estudiante ca nga gú’ndanebe binni ca ti textu cadi nagana ni ziuula’dxi’ ganna ne pa ganda guiaanacabe guibiguétabe sti biaje. Naquiiñe’ guzeete’ estudiante ca de tema ni jma riete’ neza ra nabézatu. Pa nabe, zanda iquiiñebe ti publicación o videu ni nuu lu kid de enseñanza. Cadi guiziidicabe escenificación ca de memoria, guni enzayárcabe ni ti guiree ni casi ora rui’tu diidxa’, natural ne guihuini interés.

13. Modo güinelu’ binni diidxa’. Casi modo raca lu territorio sti’ congregación, estudiante ca naquiiñe’ guni aplicar ca puntu zeeda rarí’:

(1) De yoo pur yoo. Zanda gaca ni lu predicación ra lidxi binni (en persona, pur teléfono o pur carta) ora guibigueta’ guininenu binni ca sti biaje.
(2) Predicación informal. Laani nga ora guidxaaganu tuuxa para güinenu diidxa’ ne reeda gaca ni ti oportunidad para guni predicarnu laabe. Casi, guzé’tenu ti textu zeeda lu Biblia lú tuuxa ra dxiiña’, ra scuela, ca vecinu, ora ziuunu ndaani’ carru, etc.
(3) Predicación pública. Laani nga ra iquiˊñenu carru huiini’, gaca predicar ra nuu negocio, lu calle, ra parque, estacionamientu o xcaadxi lugar ra nuu binni.

14. Iquiiñe’ ca videu ne ca publicación. Según circunstancia, estudiante ca gu’ya’ pa zanda iquiiñebe ti videu o ti publicación. Pa canaba’ asignación ca iquiiñe’ ti videu o pa estudiante ca ná’ iquiiñe’ ni, cadi naquiiñe’ gucaaguibe ni, peru zanda guni presentarbe ni ne guini’be de laani.

MODO RÚNINU XHIIÑAʼ DIOS

15. Zuzuluné sección ri’ ti canción. Lu 15 minutu sti’ ni ziuu ti asignación o chupa ni zacané ca ni cucaadiaga chinándaca’ ni ná stiidxa’ Dios. Pa qué chu’ ti necesidad la? ca asignación ri’ zutiidi’ ti ancianu cani o ti siervu ministerial capacitadu, peru ni caquiiñe’ congregación la? napa xi gutiidi’ ti ancianu laa. Ndaa ra zanda guicabi ca ni cucaadiaga, hermanu ca zuni ca pregunta ni maca neni, peru laaca zanda gúnibe xcaadxi pregunta. Naquiiñe’ gúnibe ti introducción nachucu ti zacá ganda gusiénebe ca puntu jma risaca stini ne ganda guicabi ca ni cucaadiaga. Pa nápani ti entrevista, ni chigaca entrevistar ca naquiiñe’ quiba’ lu plataforma, pa gasti’ ti necesidad de gúnibe ni de ra zúbabe.

16. Reunión ra riuunda’ Biblia (30 minutu) Ti ancianu capacitadu gutiidi’ ni. (Ca congregación ra huaxié’ ancianu, zanda iquiiñe’ siervu ministerial capacitadu). Cuerpu de ancianu gu’ya’ tu laa nuu capacitadu para gutiidi’ ni. Gaca ni hermanu ni nanna iquiiñe’ tiempu sti’ ne cadi tidi’ de hora, gusiene ca textu clave sti’ ni ne gacané ca ni cucaadiaga guiéneca’ xi pe’ cusiidi’ información ca. Para gúnibe ni jneza, nabé zacané laabe gú’ndabe información ra cá ximodo gutiidibe ndaa pur pregunta ne respuesta, (w23.04 yaza 24, recuadru). Pa ma’ bisiene chaahuibe información ca ma’ cadi naquiiñe’ gusaabe 30 minutu. Pa ganda la? guirá’ semana iquiiñe’ gadxé gadxé tu gutiidi’ ni ne tu gu’nda’. Ora guinaba’ presidente sti’ reunión ca conductor ca guni ni jma huaxié’ tiempu, ma’ laa gu’ya’ ximodo guni ni. Ti modo nga cadi guiuunda’ chupa chonna párrafo.

CA DIIDXA’ GUILUXENÉ NI

17. Chonna minutu. Zuzeete’ presidente ca chupa chonna puntu gudi’di’ lu reunión cani jma naquiiñe’ congregación. Pa nuu tiempu, zanda guinábabe ca ni cucaadiaga guzeeteca’ xiixa ni guyuulá’dxica’. Laaca zuzeetebe de programa chitidi’ sti semana ca para gucuaanibe interés sti’ ca hermanu, ne pa ganda la? zanda guzeetebe lá ca ni chigutiidi’ asignación. Pa gasti’ ni guchaa ni la? ca carta ne ca anunciu ziuunda’ cani lu ca diidxa’ guiluxené ni. Xcaadxi dxiiña’ runi congregación, casi pora chigaca predicar ne tu chiguni limpieza ma’ ricá cani lu tableru de anunciu ne cadi naquiiñe’ guiete cani lu plataforma. Pa huaxié’ tiempu nuu para guiuunda’ carta o gaca anunciu ni caquiiñe’, presidente ca zanábabe ca ni chigutiidi’ nda sti’ «Modo rúninu xhiiña’ Dios» gúnica’ ndaa chigutiidica’ jma nachucu. (Biiya’ ca párrafo 16 ne 19) Reunión ca zaluxené ni canción ne oración.

DIIDXA’ NI CU’ GANA NE CONSEJU

18. Despué de cada asignación estudiantil, zaquiiñe’ presidente sti’ reunión ri’ bia’ ti minutu para guni felicitar cada estudiante ne zaquiiñebe lección cayúnica’ dxiiña’ para gudiibe conseju laaca’. Ora guni anunciarbe ti asignación, cadi naquiiñe’ guini’be xi lección cayuni estudiante ca dxiiña’. Guiluxe si asignación ca, zuni felicitar presidente ca laabe, de racá ma’ zanda guzeete’ xi lección bi’nibe dxiiña’ ne zaní’ xiñee bia’si modo bí’nibe ni o né diidxa’ nadó’ zabi laabe paraa naquiiñe’ guni mejorarbe ne ximodo gúnibe ni. Laaca zanda guzeetebe xiixa ni bí’yabe lu demostración ca, ni rábibe zanda gacané estudiante ca o auditorio. Guiluxe si reunión o sti ora la? zanda gudii presidente ca xiixa conseju ni zanda gacané estudiante ca ra iquiiñe’ folletu Gunaxhii binni, folletu Gusí’dinu jma jneza o libru Benefíciese, de lu lección cayúnibe dxiiña’ o lu sti lección. (Lu ca párrafo 19, 24 ne 25 zadxélatu jma información ra caní’ de dxiiña’ sti’ presidente sti’ reunión Xhiiña’ Dios ne modo nabáninu ne dxiiña’ napa consejeru auxiliar).

TIEMPU

19. Nin ti asignación cadi naquiiñe’ tidi’ de tiempu, (nin ca comentariu sti’ presidente) neca lu Xhiiña’ Dios ne modo nabáninu cada asignación napa tiempu sti’, peru pa huaxié’ información né asignación ca ne guiluxe gaca comentar cani nagueenda la? cadi naquiiñe’ cú’rutu jma luni dede ra guizaa tiempu stitu. Pa tuuxa tidi’ de tiempu, presidente ca o consejeru auxiliar zudii conseju laabe ora ma’ laasicabe. (biiya’ ca párrafo 24 ne 25) Naquiiñe’ guindaa reunión ca 1 hora ne 45 minutu, maca né canción ne oración.

VISITA STI’ SUPERINTENDENTE DE CIRCUITO

20. Lu visita sti’ superintendente de circuito, zinanda ni programa sti’ Xhiiña’ Dios ne modo nabáninu, peru zadxaa chupa chonna puntu. Lugar sti’ «Reunión ra riuunda’ Biblia», zudii superintendente de circuito ti discursu de 30 minutu. Ante tidi’ discursu ca, zuni presidente sti’ reunión ca ti repasu sti’ programa ca, zuzeetebe xiixa puntu ni zadú’yanu sti semana ca, zuzeetebe ca anunciu ne zuundabe ca carta ni caquiiñe’ guiuunda’, de racá ma’ zuni presentarbe superintendente de circuito. Guiluxe si discursu ca, superintendente ca zunduuxe’ reunión ca né ti canción ni maca gulí. Zanda guni invitarbe sti hermanu guni oración. Qué ziuu di’ clase auxiliar lu idioma sti’ congregación ora chu’ visita. Ca grupu ni riní’ sti idioma zanda gúnica’ reunión stica’, peru juntu né congregación zucaadiágaca’ discursu de serviciu ni chigudii superintendente de circuito.

SEMANA NUU ASAMBLEA

21. Qué zapa di’ congregación reunión semana chigaca asamblea. Napa xidé gusietenala’dxi’ congregación cada hermanu o cada familia guni estudiar información chiguiuunda semana ca.

SEMANA NUU CONMEMORACIÓN

22. Ora gaca Conmemoración ndaani’ semana, qué zaca reunión Xhiiña’ Dios ne modo nabáninu.

SUPERINTENDENTE STI’ REUNIÓN XHIIÑA’ DIOS NE MODO NABÁNINU

23. Cuerpu de ancianu nga cuí ti ancianu para gaca superintendente. Dxiiña’ stibe nga gú’yabe gaca reunión ri’ jneza ne gaca ni casi ná ca instrucción zeeda rarí’. Gatigá naquiiñe’ guiní’nebe consejeru auxiliar. Casi pe’ gu’ya’ superintendente ri’ ma’ nuu ti Xhiiña’ Dios ne modo nabáninu nacubi: naquiiñe’ gudiibe guirá’ asignación sti’ reunión ni raca ndaani’ semana sti’ guiropa’ beeu ca: asignación sti’ ca estudiante, ne ni cadi naca estudiante ne sti’ presidente sti’ reunión ni raca ndaani’ semana. Guiropa’ ni biete últimu ca gucaabe lá ca ni ma’ gulí cuerpu de ancianu. (Biiya’ párrafo 3-16 ne 24). Ora guni asignarbe (ca estudiante o co’) naquiiñe’ gú’yabe bia’ iza napa ca hermanu ca, experiencia stica’ ne pa zanda guini’ca’ de tema ca. Naquiiñe’ guicaa ca hermanu ri’ asignación stica’ bia’ chonna semana ante. Ne iquiiñe’ formulariu Asignación para reunión Vida y Ministerio Cristiano (S-89) para guicaa ca estudiante asignación stica’. Laaca naquiiñe’ gu’ya’ presidente ca guicá guidubi programa sti’ reunión ri’ lu tableru de anunciu. Zanda cui’ cuerpu de ancianu sti ancianu o ti siervu ministerial para gacané laabe; peru ca ancianu si nga naquiiñe’ guni asignar ca asignación ni cadi nexhe’ gudii ca estudiante.

PRESIDENTE STI’ REUNIÓN XHIIÑA’ DIOS NE MODO NABÁNINU

24. Cada semana ti ancianu gaca presidente sti’ guidubi reunión Xhiina’ Dios (ndaani’ ca congregación ra huaxié’ ancianu la? zanda iquiine’ ca siervu ministerial capacitadu). Naquiiñe’ quixhe’ chaahui’ presidente ri’ xi guiní’ lu introducción ne conclusión. Laaca naquiiñe’ guni introducirbe guirá’ asignación ca, ne pa huaxié’ ancianu la? napa xidé gutiidibe xiixa asignación, casi ra ridi’di’ ti videu. Cadi naquiiñe’ guini’be stale diidxa’ ora ma’ biluxe ti asignación ne ante guzulú stobi. Cuerpu de ancianu guiní’ tuunga ca ancianu nuu capacitadu para gaca asignar dxiina’ ri’. Naquiiñe’ gaca turnar ca hermanu ni gaca asignar ri’. Zándaca pur xiixa circunstancia jma stale biaje zuni presidir superintendente sti’ Reunion Xhiiña’ Dios ne modo nabáninu que xcaadxi ancianu capacitadu. Stale biaje, pa runi calificar ti ancianu para gutiidi’ «Reunion ra riuunda’ Biblia», zándaca laaca runi calificarbe para gácabe presidente sti’ reunión ri’. Peru cadi guiaanda’ laatu, napa xidé ganna presidente sti’ reunión ri’ guni felicitar cada estudiante ne ora caquiiñe’ la? gudii conseju né diidxa’ nadó’. Laaca naquiiñe’ gú’yabe guiluxe reunión ri’ hora stini (Biiya’ ca párrafo 17 ne 19). Para cadi guiniti stale tiempu, pa nuu lugar lu plataforma ne pa guinaba’ presidente ri’ ni la? zanda guzuhuaa ti micrófono lu plataforma ni iquiiñe’ para guni presentarbe ca estudiante laga cuzuhuaaca’ ra nuu atril. Zanda cui’ presidente ri’ ruaa ti mexa’ lu plataforma ora tidi’ asignación ra guiuunda’ Biblia ne sección ni lá’ «Gusí’dinu jma jneza».

CONSEJERU AUXILIAR

25. Consejeru auxiliar ri’ nga naquiiñe’ gudii conseju, ne pa caquiiñe’ gúnibe ni la? zudiibe conseju ca ancianu ne ca siervu ministerial ni ridi’di’ lu reunión Xhiiña’ Dios ne modo nabáninu, ca ni rudii discursu públicu, ca ni runi dirigir estudiu sti’ Torre sti’ ni rapa, o «Reunión ra riuunda’ Biblia», ne ca lector (Biiya’ párrafo 19).

CLASE AUXILIAR

26. Zanda gapa ca congregación clase auxiliar pa nuu stale estudiante. Zapa cada clase ca ti consejeru capacitadu, pa ganda ti ancianu. Pa caquiiñe’ pe’ la? zanda gaca asignar ti siervu ministerial capacitadu. Cuerpu de ancianu nga guiní’ tuunga ca ni zanda guni dxiiña’ ri’ ne pa zaca turnarca’. Naquiine’ chinanda consejeru ri’ ca instrucción zeeda lu párrafo 18. Zanábacabe ca estudiante checa’ ndaani’ sala auxiliar ora ma’ biluxe asignación «Guyúbinu ca perla ni ga’chi’», ni zeeda lu sección «Ca tesoro zeeda lu Biblia». Zabiguétacabe ndaani’ sala principal ora guiluxé últimu ndaa sti’ reunión sti’ ca estudiante.

VIDEU

27. Zadi’di’ caadxi videu lu reunión ni raca ndaani’ semana, zanda gú’yatu ca videu ri’ lu aplicación JW Library® ni guca para gadxé gadxé clase dispositivu electrónicu.

S-38-ZPI 9/25