Ndaa ra rinabadiidxaʼ

◼ Pora nga galán iquiiñeʼ ti neza binni ridagulisaa teléfono para gucaadiaga tuuxa ca guendaridagulisaa ca

Stale neza binni ridagulisaa riguucaʼ teléfono ndaaniʼ Yoo stiʼ Reinu para iquiiñecabe ni ti ganda gucaadiaga ca binni ni qué zanda cheʼ ca guendaridagulisaa ca, pur huaracaʼ o pur sti cosa ni qué gudii lugar laacaʼ. Para ganda gacaneni ca binni ni dxandíʼ caquiiñeʼ ni la? napa xidé gataʼ chaahuiʼ modo iquiiñeʼ ni ne gácani jneza. Nga runi, ca binnigola ca nga naquiiñeʼ «quixhe chaahui» modo iquiiñeʼ ni ne gúʼyacaʼ «gaca cani jneza» (1 Cor. 14:40).

Jma nga naquiiñeʼ gacané ca binnigola cani rucheeche diidxaʼ ni nápacaʼ ti guendahuará ni qué rianda, cani nabé raca huará o cani qué randa riree de ralidxi pur sti razón. Laaca zanda iquiiñecabe ni para tuuxa ni rucheeche diidxaʼ ni quixhe ti guendahuará laa pur ti tiempu huiiniʼ si, para tuuxa ni qué randa runi gastiʼ ne para cani qué zanda guiree de ralidxi, ne laaca zanda gaca zacá ne tuuxa ni cayúʼndanenu ni rihuinni caniisi lu stiidxaʼ Dios. Cani gucaadiaga ni cayeeteʼ lu guendaridagulisaa ca pur teléfono laaca naquiiñeʼ chuʼcaʼ cuenta cásica ora ñuucaʼ raqué. Pa neza binni ridagulisaa ca qué gapa stale linia de teléfono para guiráʼ cani caquiiñeʼ gucaadiaga la? zanda guyúbicabe xcaadxi modo gúnicabe ni, casi guni grabárcabe ni tiidiʼ lu guendaridagulisaa ca.

Peru jma nga stale ni zabeendunu ora chuunu ca guendaridagulisaa ca. Ora rinínenu xcaadxi xpinni Cristu «zacané saa nu» ne racaneni cani nacubi cayé gudiicaʼ cuenta pabiáʼ risaca nga cadi guiaadxacaʼ nin ti guendaridagulisaa. Ora riuunu ca guendaridagulisaa ca jma rizíʼdinu de ca demostración ni ridiʼdiʼ raqué, zanda gacané ca binnigola laanu ne laaca ridúʼyanu pabiáʼ nadxii guiráʼ ca xpinni Cristu laanu. Ti gunaa xpinni Cristu ni maʼ huaniisi guníʼ sicaríʼ dxi gudiidxicabe laa ora ziree ndaaniʼ Yoo stiʼ Reinu: «¡Qué ziuu diʼ dxi gaca ndiʼ pur teléfono!». ¡Jnézapeʼ guniʼbe! (Rom. 1:11, 12.)

Cásica qué ñaadxaʼ Ana «ndaani yuʼdu» dxiqué la? yanna riʼ laaca qué riaadxaʼ stale de ca xpinni Cristu ni maʼ huaniisi ca guendaridagulisaa ca, riécabe guiráʼ biaje gudii guendahuará stícabe lugar laacabe ne ora gúʼyacabe zanda gúnicabe ni (Luc. 2:36, 37). Neca zanda iquiiñeʼ teléfono ca para gucaadiágacabe ca guendaridagulisaa ca ora caquiiñeʼ gácani la? qué riníʼ íquecabe jma galán ni que chécabe ra Yoo stiʼ Reinu. Nga runi, galán chinándanu ejemplu stiʼ Ana, naquiiñeʼ gúninu stipa pur chuunu guiráʼ guendaridagulisaa para guni adorarnu Jiobá, Dios ni jma nandxóʼ (Sal. 95:1-3, 6; 122:1).