Ñee riquiiñeluʼ libru Razonamiento la?
1. Ximodo bisiidiʼ Pablu ne Jesús.
1 Apóstol Pablu biʼniʼ stipa pur iquiiñeʼ «Xquiʼchi Dios» para gusiene binni ni caníʼ (Hech. 17:2, 3; 18:19). Zacá yenándabe ejemplu stiʼ Jesús, purtiʼ laa nabé bizeeteʼ ni na Stiidxaʼ Dios ne biquiiñeʼ ejemplu para gucané binni guiene xi racalaʼdxiʼ Dios (Mat. 12:1-12). Libru Razonamiento a partir de las Escrituras gúcani para gacaneni laanu gúninu zacaca.
2. Ximodo zanda iquiiñenu libru Razonamiento para gánnanu guinínenu binni.
2 Ximodo guinínenu binni. Lu yaza 9 dede 15 stiʼ libru Razonamiento zeeda stale modo ni zanda iquiiñenu para guzulú guinínenu binni. Zanda guizíʼdinu caadxi de laacani ne iquiiñenu gadxé gadxé ora guinínenu binni, jma pa gatigá ridídinu neza ra rucheechenu diidxaʼ. Zacá zanda guinínenu tutiica binni. Ora maʼ cucheechenu diidxaʼ pur teléfono o ra nuu ca yoo ni napa interfón la? zanda gúʼndanu casi cá lu libru ca.
3. Xi zeeda lu yaza 16 dede 24 stiʼ libru Razonamiento ni zanda gacané laanu.
3 Ximodo guicábinu ora chuʼ tu gucueeza laanu. Guníʼ ique xi rabi binni lii ora maʼ zigucheecheluʼ diidxaʼ ne gulee tiempu ante cheluʼ para gúʼndaluʼ yaza 16 dede 21 stiʼ libru ca. Zacá zánnaluʼ xi guicábiluʼ ora guiníʼcabe xiixa ni gucueeza lii. Pa rábiluʼ zándaca gueeda guidxaagaluʼ ti budista, ti hindú, ti judíu o ti musulmán la? biindaʼ yaza 21 dede 24.
4. Ximodo zanda iquiiñenu libru Razonamiento ora guinabadiidxacabe laanu xiixa tema ni nagana.
4 Ximodo guicábinu ni guinabadiidxaʼ binni. Libru Razonamiento ca laaca zanda gacaneni laanu ora guinabadiidxaʼ binni xiixa ni nagana. Ni gúniluʼ nga gábiluʼ binni ca racaláʼdxiluʼ guluiʼluʼ laabe xiixa ni ziuuláʼdxibe gánnabe ne cueeluʼ libru ca. Cumu maca nexheʼ chaahuiʼ ca tema ca casi abecedariu la? biyubi racá ni canabadiidxabe ne biiyaʼ xiná ca letra yaaseʼ ni zeeda luni. Pa qué guidxélaluʼ ni, biiyaʼ lu índice ra ziluxe libru ca, ne ora maʼ bidxélaluʼ ni biindani de lu libru ca. Pa ti versículo nga cuyúbiluʼ la? biiyaʼ lu yaza 445 ra na «Textos bíblicos que suelen aplicarse mal».
5. Xi xcaadxi modo zanda iquiiñeʼ libru Razonamiento.
5 Xcaadxi modo zanda iquiiñenu ni. Nuu tu napa libru Razonamiento ca ra scuela o ra dxiiñaʼ para guicabi ora guinabadiidxaʼ binni laa xiixa casi «Xiñee qué rúnitu saa». Cani canazá scuela huaquiiñecaʼ tema casi «Creación» ne «Evolución» para gúnicaʼ tariá sticaʼ. Ñee cá íqueluʼ chigánnaluʼ ti binni huará o tuuxa ni guti ti binnilidxi la? Zanda guidxélaluʼ caadxi textu ni zaguixhedxí ladxidóʼ binni ca pa guʼyuʼ ra na «Estímulo». Libru Razonamiento ca laaca zanda iquiiñenu ni para cueenu libana ne ora guidagulisaanu ante chigucheechenu diidxaʼ.
6. Xi ricá íquenu ora maʼ zigucheechenu diidxaʼ.
6 Ni ricá íquenu ora maʼ zigucheechenu diidxaʼ nga iquiiñenu Stiidxaʼ Dios para gusiénenu binni, ne cadi para gusihuínninu laanu nga nápanu razón de ni caninu o para si gábinu laabe xiixa. Zanda gúninu zacá pa guizíʼdinu iquiiñenu libru Razonamiento, ne zacá zusíʼdinu jneza (1 Tim. 4:16).