¡Raríʼ nuu stale cosa ni risaca!
1. Xiñee galán guiníʼ íquenu pa zanda gácanu precursor regular.
1 Ñee racaláʼdxiluʼ guibániluʼ jma nayecheʼ la? Ñee riuuláʼdxiluʼ gacaneluʼ sti binni la? Ñee ñuuláʼdxiluʼ ñuʼnuʼ jma lu xhiiñaʼ Jiobá la? Pa guiniʼluʼ riuuláʼdxiluʼ gúniluʼ tobi de cani maʼ guninu ca la? galán guiníʼ íqueluʼ gácaluʼ precursor regular. Peru naquiiñeʼ guʼyaʼ binni pa zanda gácani, pa caquiiñeʼ guni tender binnilidxi ne pa napa xcaadxi dxiiñaʼ ni na Biblia naquiiñeʼ guni, pa nazaaca nuu ne pa nuu ni qué randa runi.
2. Bizeeteʼ caadxi de ca ndaayaʼ ni ricaa ca precursor regular.
2 Espíritu stiʼ Jiobá gucané Salomón para guníʼ ora rudii Jiobá ndaayaʼ binni la? laaca rudiibe cosa risaca (Pro. 10:22). Ca dxi stinu riʼ, ca ndaayaʼ rudii Jiobá ca xpinni nga gápacaʼ xiixa guenda ndaaniʼ xquídxibe. Ne ca precursor ca nabé stale ndaayaʼ ricaacaʼ. Tobi de laacani nga riuucabe nayecheʼ purtiʼ rudiicabe de ni nápacabe binni, ne para gúnicabe nga la? riquiiñecabe tiempu ni niquiiñecabe para ñúnicabe ni riuuláʼdxicabe (Col. 4:5; Hech. 20:35). Jiobá ruuyaʼ ni rúnicabe ne rusisácani ne pur nga casi ñaca caguu chaahuicabe «ni risaca ibáʼ» ne racá qué zaca cani gastiʼ (Mat. 6:20; Heb. 6:10). Ne cumu ca precursor ca qué ricá íquedicaʼ guibánicaʼ ne stale luju ne runi crecaʼ zacané Jiobá laacaʼ lu guiráʼ ni caquiiñecaʼ la? riuucaʼ jma gaxha de laabe (Mat. 6:22, 25, 32; Heb. 13:5, 6).
3. Xi ribeendú binni ora guyubi gapa cosa risaca nezalú Dios ne ora guyubi gapa bidxichi.
3 Ora guicá ique binni guyubi gapa bidxichi la? rucaani laa guni «ni qué iquiiñeʼ» ne runiná ni laa (1 Tim. 6:9, 10; Sant. 5:1-3). Peru ca cosa risaca ni rudii Jiobá qué rúnidiʼni binni zacá. Tiempu ni riquiiñeʼ ca precursor regular para gucheechecaʼ diidxaʼ racaneni laacaʼ quixhe íquecaʼ gúnicaʼ ca cosa ni jma risaca si (Fili. 1:10). Ti xpinni Cristu ni naca ingenieru bisaana dxiiñaʼ stiʼ, purtiʼ dxiiñaʼ que nabé ribaʼnaʼ ni tiempu stibe ne zaqué gunda gúcabe precursor. Despué guniʼbe ca diidxaʼ riʼ: «Dxiiñaʼ stinneʼ que nabé riguu xizaa naa. Peru de precursor que coʼ. Yanna maʼ randa racaniáʼ binni ne rusiideʼ laacaʼ ni dxandíʼ. Ne nga nga ni jma rusiecheʼ naa».
4. Xi ribeendú ca precursor regular ca ora gacanecaʼ xcaadxi binni.
4 Ni ribeendú xcaadxi. Ca dxi stinu riʼ «jma nagana» para guibani binni (2 Tim. 3:1). Lu guidubi naca Guidxilayú stale binni caquiiñeʼ chuʼ tu quixhedxí ladxidóʼ. Cani rucheeche stiidxaʼ Reinu nabé riéchecaʼ ora gúʼyacaʼ pabiáʼ galán riuu ca binni ca ora gunadiágacaʼ ca diidxaʼ nacubi ne galán stiʼ Reinu. ¡Nabé riecheʼ ca precursor regular gacanecaʼ gaca dxiiñaʼ riʼ para guilá binni, ne rúnicabe ni jma de xhono gayuaa ora lu ti iza! (1 Tim. 4:16.)
5, 6. Xi zacané lii gácaluʼ precursor regular.
5 Ñee huaníʼ íqueluʼ gácaluʼ precursor regular la? Zándaca caquiiñeʼ gusaanaluʼ de gúniluʼ ca cosa ni huaxiéʼ risaca para ganda gúniluʼ jma lu xhiiñaʼ Jiobá (Efe. 5:15, 16). Stale xpinni Cristu ni huayuni zacá, maʼ gudixhe chaahuicaʼ panda si hora nga gúnicaʼ xhiiñacaʼ ti gápacaʼ jma tiempu para gúnicaʼ jma lu xhiiñaʼ Reinu. Ñee zanda quixhe chaahuiluʼ cani rúniluʼ ti ganda gácaluʼ precursor la?
6 Gunabaʼ Jiobá gudii lii guendabiaaniʼ para quixhe chaahuiluʼ tiempu stiluʼ (Sant. 1:5). Xi zabeenduluʼ pa gúniluʼ zacá yaʼ. ¡Zacaaluʼ stale ndaayaʼ! Ne Jiobá zacané lii gápaluʼ ni guibanineluʼ (Mat. 6:33). Cani guni zacá la? zaguu ndaayaʼ Jiobá laa dede qué ziuu dxi guirá cani (Mal. 3:10).