«Qué racaladxediáʼ gastiʼ»
1 Zacá ricabi binni ora maʼ ziucheechenu diidxaʼ. Peru, xi zacané laanu para cadi guireʼnu gana pa tuuxa qué naʼ gucaadiaga yaʼ. Xi zanda gúninu para gucaadiaga binni ca diidxaʼ nacubi ne galán ni zinenu yaʼ.
2 Cadi gusaananu de chuʼnu nayecheʼ. Qué zusaananu de chuʼnu nayecheʼ pa guietenaláʼdxinu xiñee qué riná binni gucaadiaga laanu. Zándaca ca binni ca qué rusisácacaʼ Biblia purtiʼ biziidicaʼ ziúpanu de ti maniʼ ne chaahuidugá beeda gaca ti binni. O purtiʼ biniisicaʼ lade binni ni qué runi cré pa nuu Dios. Nuu xcaadxi qué rinacaʼ gúʼndacaʼ Biblia pur guiráʼ guendaquéiquiiñeʼ huayuuyacaʼ huayaca ndaaniʼ ca religión ca. Ne nuu binni la? ora gúʼyacaʼ guiráʼ guendanagana ni nápacaʼ riníʼ íquecaʼ maʼ gastiʼ qué zanda gacané laacaʼ, ne qué ridxélacaʼ xi gúnicaʼ nga runi qué rinacaʼ gucaadiágacaʼ (Efe. 2:12). Ne nuu tu laa qué riná gucaadiaga purtiʼ nuu stale cosa ni riguu xizaa laa (Mat. 24:37-39).
3 Neca nuu binni qué riná gucaadiaga laanu la? riuʼnuʼ nayecheʼ purtiʼ nánnanu rusisácanu Jiobá ora rúninu stipa pur gucheechenu diidxaʼ (1 Ped. 4:11). Ne pa guinínenu binni de Stiidxaʼ Dios neca qué gucaadiágacaʼ laanu la? zaguidxi fe stinu. Naquiiñeʼ gúninu stipa pur guidúʼyanu ca binni ca cásica ruuyaʼ Jiobá laacaʼ. Laabe biabe ca binni ni guleza Nínive, purtiʼ qué gánnacaʼ «gunáʼ nga ladu derechu ne ladu bigaʼ sticaʼ» (Jon. 4:11). Ca binni nabeza ra rucheechenu diidxaʼ, laaca caquiiñeʼ gucaadiágacaʼ ca diidxaʼ nacubi ne galán stiʼ Dios. Nga runi, cadi guireʼnu gana ne guyúbinu modo chuulaʼdxiʼ binni gucaadiaga Stiidxaʼ Dios.
4 Guníʼ ni ziuulaʼdxiʼ binni gucaadiaga. Ora guzulú guiníʼneluʼ binni la? guníʼ de xiixa ni nannuʼ ziuuláʼdxibe gucaadiágabe ne gunabaʼ laabe guiniʼbe ximodo ruuyabe ni caniʼtu ca. Bicaadiaga laabe, oracaruʼ biluíʼ laabe ne Biblia xi chiguni Dios xcaadxi huiiniʼ si. Bizaaca si ti desgracia neza ra nabeza ti Testigu la? yegucheechebe diidxaʼ ne gúdxibe ca binni que nuube triste pur ni bizaaca que. Laabe guniʼbe xi bizaaca: «Ca binni que bizulucaʼ guniʼcaʼ de ni bizaaca que. Dxi que la? guizáʼ galán gunieniáʼ binni diidxaʼ purtiʼ bisihuinneʼ rizaalaʼdxeʼ laacabe».
5 Reinu stiʼ Dios zuni chaahuiʼ guiráʼ guendanagana napa binni. Biyubi gannuʼ xi jma riguu xizaa laacabe. Pa gúniluʼ ni la? zándaca zacané nga lii gusiéneluʼ laacabe guiráʼ ni maʼ guníʼ Dios chiguni casi cá lu Biblia. Peru pa qué naʼ binni ca gusiéneluʼ laa xi chiguni Dios la? zándaca sti biaje tiidiluʼ maʼ zucaadiagabe lii (Hech. 17:32).