Xii ndiʼ caquiiñenu para gúninu ni na Dios ne stale gana

¹ Zándaca modo bicheeche Apolos diidxaʼ ne stale gana rusietenalaʼdxiʼ ni laanu ca xpinni Cristu de yanna riʼ, purtiʼ laaca rucheechecaʼ diidxaʼ ne stale gana (Hech. 18:24-28). Peru para iranu nga ucuá ca diidxaʼ riʼ: «cadi ichaaba tu ne cadi aca tu nayanda, sínuque laguni xhiiña Señor ne stale gana» (Rom. 12:11). Ximodo zanda ucheechenu stiidxaʼ Dios ne stale gana yaʼ.

² Guiene chaahuinu Stiidxaʼ Dios. Despué de biiyaʼ Jesús chupa de ca discípulo stiʼ «ne bisiene be laaca irá ni cá lu Xquiʼchi Dios ra ruzeete ni [de] laabe» la? ca discípulo que guniʼcaʼ: «Ñee cadi de biniibi dxacha ladxidóʼno ra zedané be laanu neza ziupa nu» que la? (Luc. 24:27, 32). Ñee cadi laaca riniibi ladxidoʼno ne riéchenu nga ora guiene chaahuinu Stiidxaʼ Dios la? Dxandíʼ, riguidxi fe stinu ora riene chaahuinu Stiidxaʼ Dios. Romanos 10:17 caníʼ sicaríʼ: «Peru riale fe ra guna diaga cabe stiidxa Cristu». Ora de ladxidoʼno runi crenu iráʼ ni maʼ bizabiruaa Jiobá chiguni, qué zusaananu de ininu iráʼ ni maʼ bizíʼdinu de laabe (Sal. 145:7; Hech. 4:20).

³ Pa qué racaláʼdxinu usaananu de gannaxhiinu Dios ne gúninu xhiiñabe ne stale gana la? Cadi iníʼ íquenu biaʼ bizíʼdisinu dxiqué nga zacané laanu. Ni naquiiñeʼ gúninu nga guiene chaahuinu cani dxandíʼ rusiidibe ne gannaxhiinu laabe jma. Pa qué gúninu cani la? maʼ qué zúninu xhiiñaʼ Dios de idubi ladxidoʼno (Apocalipsis 2:4). Biblia rabi laanu cadi usaananu de izíʼdinu jma de stiidxaʼ Dios (Col. 1:9, 10).

⁴ Guiaʼnu guʼndaʼ chaahuinu. Galanpeʼ nga gúʼyanu ximodo ndiʼ rúʼndanu. Zándaca nánnanu uzaʼnu raya xhaʼnaʼ ca diidxaʼ ni cacabi ca endarinabadiidxaʼ ni zeeda lu ti tema ni chiguiuundaʼ stiʼ revista La Atalaya ne dede zacábinu jnézapeʼ. Peru ñee ruyúbinu iráʼ textu zeeda lu ca párrafo ca ne riníʼ íquenu ximodo zanda gúninu ni na cani lu xquendanabáninu la? Pa nápanu tiempu, ñee ruyúbinu gánnanu jma de ca capítulo stiʼ Biblia ni riuundaʼ iráʼ semana ne riníʼ íquenu xi zanda iquiiñenu de laacani la? (Sal. 77:11, 12; Pro. 2:1-5.) Dxandipeʼ nga ribeendunu stale ni galán ora riníʼ íquenu lu Stiidxaʼ Dios ne chinándanu modo nani (1 Tim. 4:15, 16). Pa guʼndaʼ chaahuinu ne guiénenu Stiidxaʼ Dios la? zazíʼdinu jma ne nga zucaa laanu gúninu ni nabe de idubi ladxidoʼno ne zudiini laanu stipa ni caquiiñenu «para guni nu ni jneza» ne stale gana (Tito 2:14).