Cadi usaana de ucheechenu diidxaʼ
1 Nabézanu dxi nagana. Iráʼ si ora cadinde binni, cadíndecabe purtiʼ gadxé gadxé raza laacabe, ne nuu lugar rati binni pur ca xu ni raca ne xcaadxi cosa malu ni ruchibi binni. Yánnapeʼ nga jma caquiiñeʼ gunadiaga ca binni riʼ diidxaʼ nacubi ne galán. Peru stale de ca binni riʼ huaxiéʼ rizaláʼdxicaʼ iziidicaʼ de Dios. Stale lugar nagana idxélanu binni ra lidxi, ne jma nagana idxélanu binni ucaadiaga laanu o gúʼndanenu laa Biblia. Neca zacá, galanpeʼ nga cadi liica usaana de ucheechenu ca diidxaʼ nacubi ne galán stiʼ Reinu stiʼ Dios (Mat. 24:14).
2 Nadxii Dios binni. Dxiiñaʼ rúninu riʼ rusihuínnini pabiáʼ nadxii Jiobá binni. Laabe qué racaláʼdxibe initilú nin tobi, «sínuque cabeza be inabaʼ irá binni perdón laabe» (2 Ped. 3:9; Eze. 33:11). Nga runi, Dios biʼniʼ mandar casi uníʼ Jesús, primeru «napa xidé ireeche stiidxa Dios irá guidxi ante initilú guidxilayú» (Mar. 13:10). Dios cabidxi ca binni ca ibiguétacaʼ ra nuube ti cadi gáticaʼ ora initilú ca xpinni Binidxabaʼ (Joel 2:28, 29, 32; Sof. 2:2, 3). Ñee qué riéchenu nga purtiʼ caquiiñeʼ Jiobá laanu para gúninu xhiiñaʼ la? (1 Tim. 1:12, 13.)
3 Casi rihuinni lu dxiiñaʼ uca lu idubi Guidxilayú iza 2004, yegúʼndanenu 6.085.387 binni lu ti beeu si, ne uyuunisa biaʼ 5.000 iráʼ semana. Caadxi de cani nacubi ca bidxela cani rucheeche diidxaʼ laacabe purtiʼ Jiobá uluu ndaayaʼ stipa bíʼnicabeʼ, ra qué nusaanacabe de niniʼnécabe ca binni nabeza neza ra rucheechecabe diidxaʼ. Nayéchepeʼ riuʼnuʼ ne galanpeʼ nga guninenu Dios dxiiñaʼ para ilá stale binni (1 Cor. 3:5, 6, 9).
4 Naquiiñeʼusisácanulá Dios. Cadi usaana de ucheechenu diidxaʼ ti usisácanu ne usianu lá Jiobá nezalú iráʼ binni (Heb. 13:15). Binidxabaʼ maʼ bisiguii iráʼ binni de Guidxilayú ne maʼ bicaabe laacaʼ guni crecaʼ qué zanda diʼ gunichaahuiʼ Dios ca endanagana nápacaʼ, ne qué rizaláʼdxibe ca endananá ni cadíʼdicaʼ o nácabe gastiʼ Dios (Apo. 12:9). Ora riucheechenu diidxaʼ la? ne endanadxibalú nga rininu cani dxandíʼ stiʼ Dios stinu ni Jma Nandxóʼ nuu ibáʼ. Nga runi, usisácanu lá Jiobá yanna ne cadi chuʼ dxi usaana de gúninu ni (Sal. 145:1, 2).