Ñee nannuʼ ni la?
Xiñee gúdxicabe Judas zudiicabe laa treinta moneda de plata pa guluíʼ tuu nga Jesús
Ora guyé Judas Iscariote ra nuu ca xaíque stiʼ cani ruzaaquiʼ guʼxhuʼ que para guʼyaʼ pagala zudiicabe laa para guluíʼ paraa nuu Jesús la? guníʼcabe zudiicabe «laabe treinta moneda de plata» (Mateo 26:14, 15). Biaʼ gudíxhecabe guicaabe riʼ cusihuínnicabe qué risaca diʼ Jesús para laacabe ne pabiáʼ nanaláʼdxicabe laabe. Xiñee rininu zacá yaʼ.
Ca moneda de plata ni cuzeeteʼ textu ca la? zándaca laacani nga moneda ni biquiiñeʼ ca judíu casi bueltu dxiqué. Xi zanda siʼ binni ne treinta moneda de plata yaʼ. Ti esclavu si, o ti ndaa layú, purtiʼ zaqué nga cá lu Ley gucuaa Moisés (Éxodo 21:32; Mateo 27:6, 7).
Ti biaje, dxi gunabaʼ Zacarías, ni riguixhená que ca israelita quíxecaʼ laabe pur gúpabe ca xpinni Dios la? guluubiáʼcabe treinta moneda de plata ne bidiicabe ni laabe. Ne ni bidiicabe Zacarías que nuucabe gusituícabe lube, purtiʼ para laacabe qué risácadibe jma que ti esclavu. Ora biiyaʼ Jiobá ni guca que la? gúdxibe Zacarías xi guni ne bueltu que: «Bisáʼbini ra tesoreriá ca... biaʼ ca nga nácabe risacaʼ para laacabe» (Zacarías 11:12, 13). Bizuubaʼ Zacarías diidxaʼ ne bisáʼbibe bueltu que raqué. Ni bíʼnibe ca rusietenaláʼdxini laanu ni biʼniʼ Judas Iscariote gayuaa iza despué, ne bueltu bidiicabe laa para guluíʼ paraa nuu Jesús, pastor ni biseendaʼ Jiobá para guidxi Israel (Mateo 27:5).
Xi guiʼchiʼ ngue na Biblia ricaa binni ora gaca divorciar
Ley ni gucuaa Moisés que na sicaríʼ: «Pa tuuxa hombre guicaa ti gunaa [...] para gaca xheelaʼ, peru despué guʼyaʼ hombre ca xiixa ni cadi jneza de laabe la? naquiiñeʼ gucaa lu ti guiʼchiʼ cayaca divorciar de laabe ne gudiini laabe ne cuee laabe de ralidxi» (Deuteronomio 24:1). Xi para biquiiñeʼ guiʼchiʼ riʼ yaʼ. Nécapeʼ cadi cá lu Biblia xii ngue ricá luni la? biquiiñeni para gaca respetar derechu stiʼ gunaa que ne cani napa.
Lu iza 1951 ne 1952 bidxélacabe stale cosa ni maʼ nayooxhoʼ ndaaniʼ caadxi cueva ni nuu lu desiertu stiʼ Judea, ladu guiaʼ stiʼ uadi Murabbaat. Lade cani bidxélacabe ndaaniʼ guiiguʼ bidxi que nuu ti guiʼchiʼ de divorcio , ne cá ni lu diidxaʼ arameo, gucuani lu iza 71 ó 72 despué de ca dxi stiʼ Jesús. Guiʼchiʼ que na guca divorciar tuuxa de xheelaʼ primé dxi stiʼ beeu marhesván, dxi maʼ ziné ca judíu xhoopaʼ iza de cucaalucaʼ Roma. Raqué caníʼ de ti hombre ni láʼ José, xiiñiʼ Naqsán, ni guleza Masada. José guca divorciar de Míriam, xiiñiʼ Jonatán de Hanablata. Lu guiʼchiʼ que cá zanda guichaganáʼ gunaa que ne tutiica judíu ni gacalaʼdxiʼ. Ne laaca bidii José xpuéltube o ni beedanebe dxi bichaganácabe, ne gudíxebe tapa biaje ca cosa ni guca feu stibe. Ra biluxe guiʼchiʼ que cá firma stiʼ José ne stiʼ chonna testigu: Eliezer, xiiñiʼ Malca; José xiiñiʼ Malca, ne Eleazar, xiiñiʼ Hananá.
[Dibuju/foto ni zeeda lu yaza 21]
CA CUEVA NI NUU UADI MURABBAAT
[Dibuju/foto ni zeeda lu yaza 21]
GUIʼCHIʼ DE DIVORCIO (71 Ó 72 DESPUÉ DE CA DXI STIʼ JESÚS)
[Paraa gucuaacabe dibuju o foto ni zeeda lu yazas 21]
Ca cueva stiʼ: Todd Bolen/Bible Places.com; certificado: Clara Amit, ni bidii Israel Antiquities Authority