Careeche stiidxaʼ Reinu: Cayanna guiráʼ binni ca diidxaʼ nacubi ne galán

CUMU qué ñeluʼ dxiiñaʼ yannadxí la? dede tempranu mápeca cayuuluʼ listu para chigucheechuʼ diidxaʼ. Peru málasi riníʼ íqueluʼ: «Zuluaʼsiaʼ qué ziaadiáʼ». Cumu bíʼniluʼ dxiiñaʼ guidubi semana la? ruluíʼ maʼ qué gapuʼ stipa ne cayuni sentirluʼ qué zanda diʼ guireeluʼ. ¡Pa ñanda si niziiláʼdxiluʼ yannadxí! Peru nagueendaca runi orarluʼ ne riguixhe íqueluʼ cheluʼ. Siadóʼ que rucheecheluʼ diidxaʼ né ti hermana; neca maʼ huaniisibe, peru dede yanna riuuláʼdxibe gucheechebe diidxaʼ. Ora ruuyuʼ pabiáʼ nacháʼhuibe ne qué huasaana de gúnibe ni na Dios, rucaabe lii chinanduʼ ejemplu stibe. Gupa si ratu de cucheecheluʼ diidxaʼ de yoo pur yoo, bizulú guníʼ íqueluʼ sicaríʼ: «Ni cusiideʼ binni nagasi riʼ la? laaca laani nga cusiidiʼ stale hermanu lu guidubi Guidxilayú, laaca caquiiñecabe ca publicación canacaaʼ nagasi ne laaca riziidicabe gúnicabe dxiiñaʼ riʼ cásica riziideʼ ni». Ora ribiguétaluʼ ra liʼdxuʼ la? mápeca biaandaʼ lii pa cachaabaluʼ siadóʼ que ne maʼ cayécheluʼ, purtiʼ qué ñaanuʼ yoo.

Yanna riʼ cayaca ti dxiiñaʼ nabé risaca: careeche stiidxaʼ Dios ne Reinu stiʼ Dios nga zaniru lu dxiiñaʼ riʼ. Ne maca guníʼ Jesús zareeche stiidxaʼ Reinu lu guidubi Guidxilayú (Mat. 24:14). Ximodo huayaca cumplir profecía riʼ yaʼ. Lu guiropa ndaa stiʼ libru riʼ zadúʼyanu gunáʼ caadxi cosa ni caquiiñeʼ para ganda gaca dxiiñaʼ riʼ. Zadúʼyanu tuu nga cani cucheeche diidxaʼ, ximodo rúnicabe ni ne xi riquiiñecabe. Guiráʼ cani bizéʼtenu riʼ, cayacanécani stale millón de binni ganna dxandíʼ nuu Reinu stiʼ Dios.