Xi riníʼ Biblia de divorcio ne ora gusabixheelaʼ binni

Jiobá ribeza guni ca guendaxheelaʼ ca ni guniʼcaʼ dxi bichaganacaʼ. Dxi bicheelabe primé hombre ne primé gunaa gúdxibe laacaʼ: «Hombre [...] naquiiñeʼ guicanú xheelaʼ, ne gueeda gácacabe ti beela si». Gudiʼdiʼ stale iza, Jesucristu bizeeteʼ ca diidxaʼ ni guníʼ Jiobá que, oraqueruʼ guníʼ: «Nga runi ni ma bichaaga Dios la? ma cadi indaa binni guidxilayú» (Génesis 2:24; Mateo 19:3-6). Nga rusihuinni para Jiobá ne Jesús pa ñanda si qué nilaa ca guendaxheelaʼ ca, peru zanda guilaacani ora gueeda gati tobi de laacabe (1 Corintios 7:39). Cumu Jiobá nga gudixhestí guendaxheelaʼ ne risaca ni para laabe la? cadi naquiiñeʼ gaca divorciar binni pur intiica si cosa. Jiobá nanalaʼdxiʼ gaca divorciar binni ora gastiʼ nin ti razón ni cudii Biblia para laani (Malaquías 2:15, 16).

Pora si nga na Biblia naquiiñeʼ gaca divorciar binni yaʼ. Dxandíʼ, Jiobá nanalaʼdxiʼ gapa binni jnadxii (Génesis 39:9; 2 Samuel 11:26, 27; Salmo 51:4). Nabé rixhacaláʼdxibe ni, nga runi rudiibe lugar gaca divorciarcaʼ ora guchee tobi de laacaʼ. (Lu capítulo 9, párrafo 7 stiʼ libru riʼ cusiene xi guiráʼ nga zeeda lu gapa binni jnadxii.) Jiobá maʼ bidii derechu binni ni qué gapa donda ca para guʼyaʼ pa zaca divorciar de xheelaʼ o pa zabezaneruʼ laabe (Mateo 19:9). Qué zucheenebe Jiobá pa quixhe íquebe gaca divorciarbe de xheelabe. Peru nin tobi de cani ridagulisaanebe cadi naquiiñeʼ gabi laabe gaca divorciarbe. Pa ni qué gapa donda ca guʼyaʼ xiñee bichee xheelaʼ ne guʼyaʼ dxandíʼ cayuubaʼ ladxidoʼbe pur bicheebe la? zándaca naʼ cuezané laabe. Binni ni napa derechu de gaca divorciar ca naquiiñeʼ guiníʼ ique chaahuiʼ xi racalaʼdxiʼ guni, purtiʼ laa nga chiguidxagalú intiica si cosa guizaaca despué (Gálatas 6:5).

Ne nuu tiru rusabixheelaʼ ca xpinni Cristu dede raca divorciarcaʼ neca qué ñapa xheelacaʼ jnadxii. Ora gaca nga, Biblia na: «Pa chuʼ ti gunaa usaana xheela la? napa xidé guiaana stubi, o pacaa la? ibigueta né xheelaʼ» (1 Corintios 7:11). Pa gueeda gaca nga cadi jneza diʼ guzulú guidxaagacabe tuuxa ne guiníʼ íquecabe guichaganacabe laa (Mateo 5:32). Yanna guidúʼyanu xi huacaa caadxi xpinni Cristu gusabixheelacaʼ.

Ora qué naʼ hombre ca gudii ni caquiiñeʼ binnilidxi. Nuu hombre qué rudii ni caquiiñeʼ binnilidxi peru cadi purtiʼ qué zanda gudiibe ni, sínuque purtiʼ qué nabe gúnibe ni. Xi riníʼ Biblia de ca hombre ni runi zacá yaʼ. Nani, hombre «ni qué ulabi ca [...] binni lidxi, ma biree de ni runi cre, ne zeda aca jma nadxaba que ni qué runi cre» (1 Timoteo 5:8). Pa qué náʼ hombre ca guchaa modo laa, gunaa ca naquiiñeʼ guʼyaʼ pa jma galán zabaniné ca xiiñiʼ sin laabe ti zacá ganda cheʼ ra nuu ti juez para guiníʼ racalaʼdxiʼ guixeleʼ de laabe. Pa gábicabe ca binnigola ca qué naʼ ti hombre Testigu gudii ni caquiiñeʼ binnilidxi naquiiñeʼ ganna chaahuicabe de ni cayaca ca, purtiʼ zándaca pur nga cueecabe hombre ca de ndaaniʼ xquidxi Dios pur ni qué naʼ guni.

Nabé riguíñecabe xheelacabe. Nuu tu laa nabé nagueenda ridxiichi ne riguiñe xheelaʼ dede runiná o runi huará laabe ne nuu tiru biaʼ qué guuti si laabe. Pa binni ni riguiñe xheelaʼ ca naca ti xpinni Cristu la? ca binnigola ca naquiiñeʼ guʼyaʼ chaahuicaʼ ni cayaca ca, purtiʼ cani ridxiichi xhaataʼ ne cani ruyubi guniná stobi zanda cueecabe laacaʼ de ndaaniʼ xquidxi Dios (Gálatas 5:19-21).

Ora chuʼ fe stiʼ ti xpinni Cristu ra naxoo. Nuu tu laa riraruʼ ni runi para ganda gucueeza xheelaʼ de guni ni na Jiobá ne nuu tu laa rucaa xheelaʼ guni xiixa para gucheené ca ley ni zeeda lu Biblia. Pa qué ganda guni ti xpinni Cristu ni na Jiobá naquiiñeʼ guʼyaʼ pa jneza nga guixeleʼ de xheelaʼ ti ganda «uzuʼba [...] stiidxa Dios que stiidxa binni» (Hechos 5:29).

Ora guizaaca guiráʼ ca cosa ni maʼ bizéʼtenu ca, cadi jneza diʼ gábinu tuuxa guixeleʼ de xheelaʼ o cadi gusaana laabe. Neca ca binnigola ne xcaadxi xpinni Cristu ni dxandíʼ runi ni na Biblia zanda gacanecaʼ binni ca ne gudiicaʼ conseju laabe, naquiiñeʼ gánnacabe Jiobá si nga nanna xi cayaca lu guendaxheelaʼ ca. Pa ti xpinni Cristu pur ti cosa huiiniʼ si maca cayuni ca guendanagana stiʼ naroʼbaʼ para si guixeleʼ de xheelaʼ la? cadi jneza ni cayuni ne zusihuinni cadi cusisaca xquendaxheelaʼ ne cadi cusisaca Dios. Pa binni ca cayuni xiixa para guixeleʼ de xheelaʼ naquiiñeʼ gánnabe Jiobá nanna xi cayúnibe, nin ñúnibe ni jma nagaʼchiʼ, purtiʼ «gasti nuu ndaani guidxilayú ni qué zanda guʼya Dios. Ruuya dxichi be irá xixé ni nuu, ne laabe cuidxi be cuenta laanu» (Hebreos 4:13). Yanna, pa chuʼ xquendanabani ti xpinni Cristu ra naxoo ne gúʼyabe caquiiñeʼ guixélebe de xheelabe la? guirutiʼ naquiiñeʼ guiníʼ mal de ni bíʼnibe que. Intiica cosa ni quixhe íquenu gúninu naquiiñeʼ gánnanu zuni juzgar Dios laanu (Romanos 14:10-12).