Zanda gusaanaluʼ de cúbaluʼ gueza ca

MAʼ ORA gúniluʼ xiixa ne cadi guireeluʼ gana (1 Crónicas 28:10). ¿Xiruʼ caquiiñeʼ gúniluʼ para gusaanaluʼ de cúbaluʼ gueza ca yaʼ?

Gudixheʼ ti fecha. Departamento de Salud ne Servicios Humanos de Estados Unidos ná, ora maʼ gucuaaluʼ decisión gusaanaluʼ de cúbaluʼ gueza, naquiiñeʼ quíxheluʼ ti dxi, cadi lica peʼ cúbaluʼ ni lu chupa semana de bisaanaluʼ ni. Ne nga zacané lii cadi guireeluʼ gana. Bicaa fecha guliluʼ ca lu candelariu stiluʼ, gudxi ni ca xhamíguluʼ ne intiica guizaaca la? cadi guchaaluʼ ni.

Bi’ni’ ti nota. Luni zanda gucaaluʼ xiixa ni rábiluʼ zanda gacané lii, ne laaca zanda gucaaluʼ ca información zeeda raríʼ.

● Ca razón ni nápaluʼ para gusaanaluʼ de cúbaluʼ gueza

● Númeru de teléfono stiʼ ca binni ni rábiluʼ zanda gacané lii ora gudii gana lii cúbaluʼ ni sti biaje

● Xiixa ni zanda gacané lii gúniluʼ ni naguixhe íqueluʼ ca (zándaca textu de lu Biblia casi Gálatas 5:22, 23)

Guzané nota ca ne biindaʼ ni chupa chonna biaje ti dxi. Ne neca gusaanaluʼ de cúbaluʼ gueza ca la? cada gudii gana lii cúbaluʼ ni sti biaje la? biindaʼ nota ca.

Dede ante gudixheʼ xi gúniluʼ. Ante guedandá dxi gudíxheluʼ ca, bichaa caadxi cosa ni maʼ biaaluʼ gúniluʼ ora rigúʼbaluʼ gueza. Casi pa maʼ biaaluʼ cúbaluʼ gueza casi biásaluʼ la? zanda gusaanaluʼ ni para sti hora. Pa maʼ biaaluʼ cúbaluʼ gueza ora maʼ cayooloʼ o guiluxe gósiou’ la? maʼ cadi cúbaluʼ ni. Ma’ cadi cheluʼ ca lugar ra rigúʼbacabe gueza. Ora maʼ nuuluʼ stúbiluʼ, gatigá zanda guiniʼluʼ ca diidxaʼ riʼ: «Coʼ, xquixe peʼ lii, maʼ qué riguʼbaʼ gueza». Ca ndiʼ zusietenalaʼdxiʼ ca ni lii zanda gusaanaluʼ de cúbaluʼ gueza, laga si guedandá dxi gudíxheluʼ gusaanaluʼ ni ca.

Guyuu listu para gusaanaluʼ gueza ca. Ora mayaca guedandá dxi gudíxheluʼ cadi cúbaluʼ gueza ca la? galán siluʼ caadxi cosahuiiniʼ ni zanda goloʼ casi ti ndaa zanahoria, yaala, nuez, almendra ne xcaadxi cosahuiiniʼ zacá. Bisietenalaʼdxiʼ ca xhamíguluʼ ne ca familia stiluʼ dxi gudíxheluʼ gusaanaluʼ ni ne xi zanda gúnicabe para gacanécabe lii. Ante guedandá dxi ca la? galán gúniluʼ gusáʼbiluʼ ca gueza ni nápaluʼ ra lídxiluʼ, ndaaniʼ xcárruluʼ, cueʼluʼ, ra dxiiñaʼ stiluʼ ne ca ceniceru o encendedor ni nápaluʼ o xcaadxi cosa ni zanda gucaa lii guluiʼlá’dxiluʼ cúbaluʼ ni sti biaje. Purtiʼ jma fácil cúbaluʼ ni pa nápaluʼ ni lii, que chisiluʼ ni o guinábaluʼ ni ti xhamíguluʼ. Cadi gusaanaluʼ de guinábaluʼ Dios gacané lii, jmaruʼ si despué de cúbaluʼ últimu gueza ca (Lucas 11:13).

Guizáʼ maʼ stale binni maʼ bisaana de cubaʼ gueza ca, dxiqué biiyacabe ni casi ti xhamígucabe, peru bidiicabe cuenta cadi dxandíʼ xhamígucabe ni ne malu ni. Lii laaca zanda gusaanaluʼ de cúbaluʼ gueza ca ti guibániluʼ para lii. Ne pa gúniluʼ ni la? ziuuluʼ nazaaca.

[Imagen]

Guzané nota ca ne biindaʼ ni chupa chonna biaje ti dxi