PRIMÉ CARTA STIʼ JUAN

1 Cuséʼndadu carta riʼ ra nuutu para güínedu laatu de ni* maca xadxí de nuu.* Bicaʼdiágadu laabe, biduyadxíchidu laabe, gudánadu laabe ne canacaabe diidxaʼ ni rudii guendanabani 2 (dxandíʼ, dxi bihuinni guendanabani que, laapedu bidúʼyadu ni ne cudiʼdu testimonio ne cayuínedu laatu de laani, dxiqué guyuu guendanabani ni qué zaluxe riʼ ra nuu Bixhózenu peru despué bidúʼyadu ni). 3 Cayuínedu laatu ni maʼ bidúʼyadu ne ni maʼ binadiágadu ti chúʼnetu laadu tobi si,* cásica nuudu tobi si né Bixhózenu ne Xiiñiʼ, Jesucristu. 4 Nga runi cucaʼdu guiráʼ ndiʼ para guizaa guendanayecheʼ stinu.*

5 Racaláʼdxidu gábidu laatu ni gudxi Jesús laadu: Dios nga biaaniʼ ne gastiʼ guelacahui ra nuu. 6 Pa guininu «Nuunu tobi si* né laabe», peru canazárunu lu guelacahui la?* cusiguiinu ne cadi nabáninu casi ná ni dxandíʼ. 7 Peru pa canazanu lu biaaniʼ* cásica nuu Dios lu biaaniʼ la? nuunu tobi si,* ne rusiá rini stiʼ Jesús, Xiiñibe, guiráʼ pecadu stinu.

8 Pa guininu «Qué rucheʼnu»,* caguítenu laca laanu ne gastiʼ ni dxandíʼ luguianu. 9 Fiel Dios ne runi ni jneza,* nga runi pa guni confesarnu ca pecadu stinu la? zuni perdonarbe ca pecadu stinu ne zusiabe laanu de guiráʼ ni cadi jneza.* 10 Pa guininu «Qué huacheʼnu»,* casi ñaca nininu rusiguii Dios ne qué ricaanu stiidxabe.*

2 Xiiñehuiineʼ caʼ, cucaaʼ guiráʼ ndiʼ ra nuutu para cadi gucheetu.* Peru, pa guchee tuuxa la? nápanu ti ayudante* ra nuu Bixhózenu, laa nga Jesucristu, tobi ni runi ni jneza.* 2 Laabe nga sacrificiu ni caquiiñeʼ para chuʼnu tobi si né Dios sti biaje* ne para guixá ca pecadu stinu, peru cadi stísinu, sínuque né pecadu stiʼ guiráʼ xixé binni guidxilayú. 3 Ne nánnanu dxandíʼ runibiaʼnu laabe pa qué gusaana de gúninu ni ná ca mandamientu stibe. 4 Tu guiníʼ «Naa maʼ runebiaʼyaʼ laabe», peru qué guni ni ná ca mandamientu stibe la? rusiguii ne gastiʼ ni dxandíʼ luguiáʼ.* 5 Peru ti binni ni ruzuubaʼ stiidxaʼ Cristu la? rusihuinni dxandíʼ peʼ nadxii Dios.* Ne pur nga nánnanu nuunu tobi si né laabe.* 6 Ni guiníʼ nuu tobi si né laabe, nuu obligadu sáʼ casi guzá Jesús.

7 Hermanu ni nadxieeʼ caʼ, cadi cucaaʼ diaʼ ti mandamientu nacubi para laatu, sínuque tobi ni maca runibiaʼtu dede dxi bizulutu. Ne mandamientu ni maca runibiaʼtu riʼ nga ca diidxaʼ ni maca binadiágatu. 8 Peru neca zacá, cucaaʼ ti mandamientu nacubi para laatu, tobi ni yenándabe ne laca laani nga ni zinándatu, purtiʼ maʼ cadi nacahui peʼ ne maʼ cuzaaniʼ biaaniʼ ni dxandíʼ.

9 Pa guiníʼ tuuxa nuu lu biaaniʼ peru nanalaʼdxiʼ hermanu stiʼ la? nuuruʼ lu guelacahui. 10 Ni nadxii hermanu stiʼ la? nuu lu biaaniʼ ne gastiʼ qué zusaba laa.* 11 Peru ni nanalaʼdxiʼ hermanu stiʼ la? nuu lu guelacahui ne canazá lu guelacahui ne qué ganna pa ladu zeʼ, purtiʼ maʼ bisicheepaʼ guelacahui ca lú.

12 Cucaaʼ ra nuutu, xiiñehuiineʼ caʼ, purtiʼ maʼ guca perdonar ca pecadu stitu pur nombre stibe.* 13 Cucaaʼ ra nuutu, ca padre, purtiʼ maʼ runibiaʼtu Jesús, binni ni maca xadxí de nuu. Cucaaʼ ra nuutu joven caʼ, purtiʼ maʼ biʼniʼ ganartu Binidxabaʼ.* Cucaaʼ ra nuutu, xcuidihuiiniʼ caʼ, purtiʼ maʼ runibiaʼtu Bixhózenu. 14 Cucaaʼ ra nuutu, ca padre, purtiʼ maʼ runibiaʼtu Jesús, binni ni maca xadxí de nuu. Cucaaʼ ra nuutu joven caʼ, purtiʼ zuhuaatu dxiichiʼ ne runi cretu Stiidxaʼ Dios ne maʼ biʼniʼ ganartu Binidxabaʼ.*

15 Cadi gannaxhiitu guidxilayú nin guiráʼ ni nuu ndaaniʼ guidxilayú. Ni nadxii guidxilayú la? cadi nadxii Bixhózenu.* 16 Purtiʼ guiráʼ ni nuu ndaaniʼ guidxilayú —deseu de guni binni guiráʼ ni riuulaʼdxiʼ,* deseu de guni binni guiráʼ ni guʼyaʼ* ne guni presumir binni guiráʼ ni napa— cadi zeeda ni de Bixhózenu, sínuque zeeda ni de guidxilayú. 17 Ne zidiʼdiʼ guidxilayú ne ca deseu stiʼ, peru ni runi ni ná Dios la? qué ziuu dxi gatiʼ.*

18 Xcuidihuiiniʼ caʼ, maʼ nuunu lu últimu hora. Maʼ binadiágatu zeeda anticristu.* Ne yanna riʼ maʼ bihuinni stale anticristu ne pur nga nánnanu maʼ nuunu lu últimu hora. 19 Bireecabe ládenu, peru cadi de laanu laacabe. Purtiʼ pa ñaca de laanu laacabe la? ñaananécabe laanu. Peru bireecabe para guihuinni chaahuiʼ cadi guiráʼ diʼ ca ni nuu ládenu de laanu laacaʼ. 20 Peru maʼ gulí* Dios santo laatu, ne guiratu nánnatu xii nga ni dxandíʼ.* 21 Cucaaʼ ndiʼ para laatu, cadi purtiʼ qué gánnatu ni dxandíʼ, sínuque purtiʼ nánnatu ni. Purtiʼ gastiʼ guendarusiguii lu ni dxandíʼ.

22 ¿Tuu nga ni rusiguii pue? ¿Ñee cadi laabe nga ni runi negar pa Jesús nga Cristu la? Ndiʼ nga binni ni naca anticristu: ni runi negar Bixhózenu ne Xiiñiʼ. 23 Guiráʼ tu guni negar Xiiñiʼ Dios la? cadi xpinni Bixhózenu laa. Peru guiráʼ tu guni cré Xiiñiʼ Dios la? xpinni Bixhózenu laa. 24 Peru laatu la? naquiiñeʼ chinándatu ni maʼ biziiditu dede dxi bizulutu. Ne pa chinándatu ni la? ziuutu tobi si né Xiiñiʼ Dios ne ziuutu tobi si né Bixhózenu. 25 Ne Dios peʼ nga biʼniʼ prometer ndiʼ laanu: guendanabani ni qué zaluxe.

26 Cucaaʼ guiráʼ ndiʼ para laatu purtiʼ nuu tu racalaʼdxiʼ quiteʼ laatu. 27 Peru maʼ gulí* Dios laatu né espíritu stiʼ ne nuu ni luguiatu, nga runi cadi caquiiñeʼ chuʼ tu gusiidiʼ laatu. Ne dxandíʼ nga bibitu* né espíritu ne cadi guendarusiguii ni ne cusiidini laatu guiráʼ cosa. Lachuu tobi si né laabe casi cusiidiʼ espíritu laatu. 28 Nga runi xiiñehuiineʼ caʼ, lachuu tobi si né laabe, ti ganda guininu né confianza ora guihuínnibe ne cadi gucachilunu purtiʼ catuí lunu ora maʼ nuunu lu presencia* stibe. 29 Pa nánnatu jneza guiráʼ ni rúnibe la?* laaca nánnatu xiiñibe guiráʼ ca ni runi ni jneza.*

3 ¡Laguuyaʼ pabiáʼ nadxii Bixhózenu laanu, dede rábicabe laanu xiiñiʼ Dios! Ne nga peʼ nga laanu. Nga runi qué runibiáʼ binni guidxilayú laanu purtiʼ caʼruʼ gunibiaʼcaʼ laabe. 2 Hermanu ni nadxieeʼ caʼ, maʼ xiiñiʼ Dios laanu, peru caʼruʼ diʼ guihuinni ximodo chigácanu. Nánnanu zácanu casi laabe ora guihuínnibe, purtiʼ zadúʼyanu ximodo peʼ laabe. 3 Ne guiráʼ ni napa esperanza riʼ la? naquiiñeʼ gaca xpida nayá,* purtiʼ zacá nga laabe.

4 Guiráʼ tu cayuni practicar pecadu la? cucheené ley, purtiʼ ti pecadu nga gucheené binni ley. 5 Laatu nánnatu beeda* Jesús para cuee pecadu stinu, purtiʼ qué gapa pecadu. 6 Guiráʼ tu nuuné laabe tobi si,* qué runi practicar pecadu; guiráʼ tu runi practicar pecadu qué huayuuyaʼ laabe ne qué runibiáʼ laabe. 7 Xiiñehuiineʼ caʼ, cadi gudiitu lugar chuʼ tu quiteʼ laatu. Ni nabani jneza naca ti binni nachaʼhuiʼ cásica nachaʼhuiʼ Jesús.* 8 Ni runi practicar pecadu, zeeda de Binidxabaʼ,* purtiʼ dede dxi bizulú Binidxabaʼ cayuni pecar.* Nga runi beeda* Xiiñiʼ Dios para gunitilú guiráʼ ni cayuni Binidxabaʼ.*

9 Qué runi practicar ca xiiñiʼ Dios pecadu, purtiʼ nuu espíritu santu* stiʼ Dios luguiacaʼ, ne qué runi practicarcaʼ pecadu purtiʼ xiiñiʼ Dios laacaʼ. 10 Sicaríʼ nga zahuinni tuu nga ca xiiñiʼ Dios ne tuu nga ca xiiñiʼ Binidxabaʼ:* ni qué runi ni jneza* ne ni cadi nadxii hermanu stiʼ la? cadi zeeda de Dios. 11 Purtiʼ ndiʼ nga ni biziiditu dede dxi bizulutu: naquiiñeʼ gannaxhiisaanu; 12 cadi gácanu casi guca Caín, purtiʼ laa zeeda de Binidxabaʼ* ngue runi biiti biʼchiʼ. ¿Xiñee biitibe bíʼchibe yaʼ? Purtiʼ puru cosa malu bíʼnibe, peru bíʼchibe biʼniʼ puru cosa jneza.

13 Hermanu caʼ, cadi guidxagayaatu xiñee nanalaʼdxiʼ binni guidxilayú laatu. 14 Purtiʼ maʼ bireʼnu lu náʼ guendaguti ne maʼ biuʼnu lu guendanabani, purtiʼ nadxiinu ca hermanu stinu. Ni cadi nadxii stobi la? nuuruʼ lu náʼ guendaguti. 15 Tuuxa ni nanalaʼdxiʼ hermanu stiʼ la? naca tobi ni ruuti, ne laatu nánnatu nin ti binni ni ruuti qué zacaa guendanabani ni qué zaluxe. 16 Dxi bidii Cristu xpida* pur laanu binibiaʼnu xii nga guendarannaxhii, ne laanu laaca nuunu obligadu gudiʼnu xpídanu* pur ca hermanu stinu. 17 Pa nuu tuuxa napa ni guibaniné, ne guʼyaʼ caquiiñeʼ hermanu stiʼ xiixa ne qué guiá laabe, ¿ximodo ndiʼ guininu nadxii binni ca Dios yaʼ? 18 Xiiñehuiineʼ caʼ, cadi guinísinu nadxiinu stobi, sínuque gannaxhiinu de dxandíʼ ne gusihuínninu ni ra gacanenu.

19 Zacá zánnanu ziúpanu de ni dxandíʼ ne zacanenu ladxidoʼno guni sentir seguru* nezalú Dios, 20 dede né ora guni condenar ladxidoʼno laanu, purtiʼ jma nandxóʼ Dios que ladxidoʼno ne nánnabe guiráʼ cosa. 21 Hermanu ni nadxieeʼ caʼ, pa cadi cayuni condenar ladxidoʼno laanu la? zanda guinínenu Dios né confianza. 22 Ne intiica cosa ni guinábanu laabe zudiibe ni laanu purtiʼ zinándanu ca mandamientu stibe ne cayúninu ni riuuláʼdxibe. 23 Ne ndiʼ nga mandamientu stibe: gápanu fe Xiiñibe,* Jesucristu, ne gannaxhiisaanu casi biʼniʼ mandar Cristu laanu. 24 Nga runi, tu chinanda ca mandamientu stibe la? nuu tobi si né laabe ne laabe nuube tobi si né laa.* Ne pur espíritu ni bidiibe laanu nánnanu nuube tobi si né laanu.

4 Hermanu ni nadxieeʼ caʼ, cadi guni cretu intiica profecía,* sínuque laguuyaʼ chaahuiʼ* pa dxandíʼ zeeda ca profecía ca de Dios, purtiʼ maʼ canazá stale falsu profeta ndaaniʼ guidxilayú.

2 Sicaríʼ nga zanda gánnatu pa zeeda ti profecía de Dios: profecía ni ruzeeteʼ beeda gaca Jesucristu binni guidxilayú, zeeda ni de Dios. 3 Peru intiica profecía ni ruzeeteʼ cadi dxandíʼ beeda gaca Jesús binni guidxilayú, cadi zeeda ni de Dios. Zeeda profecía ca de anticristu,* ni maca binadiágatu gueeda que ne yanna maʼ nuu ndaaniʼ guidxilayú.

4 Xiiñehuiineʼ caʼ, laatu zeedatu de Dios ne maʼ biʼniʼ ganartu ca falsu profeta, purtiʼ jma nandxóʼ ni nuuné laatu tobi si que ni nuuné guidxilayú tobi si.* 5 Zeedacabe de guidxilayú, nga runi riníʼcabe cosa ni zeeda de guidxilayú ne rucaadiaga binni guidxilayú laacabe. 6 Laanu ziúpanu de Dios. Ni runibiáʼ Dios la? rucaadiaga laanu; ni cadi zeeda de Dios la? qué rucaadiaga laanu. Zacá nga rudiʼnu cuenta gunáʼ nga profecía ni dxandíʼ ne profecía ni cadi dxandíʼ.

7 Hermanu ni nadxieeʼ caʼ, cadi gusaana de gannaxhiisaanu, purtiʼ de Dios nga zeeda guendarannaxhii, ne ni rannaxhii la? xiiñiʼ Dios laa ne runibiáʼ Dios. 8 Ni cadi nadxii stobi la? qué runibiáʼ Dios, purtiʼ Dios nga guendarannaxhii. 9 Sicaríʼ nga bisihuinni Dios nadxii laanu: biseendaʼ Dios tobi lucha Xiiñiʼ ndaaniʼ guidxilayú para gudii laanu guendanabani ni qué zaluxe. 10 Sicaríʼ rihuinni xii nga guendarannaxhii: cadi laadinu nga gunnaxhiinu Dios, sínuque laabe nga gunnaxhiibe laanu, ne biseendabe Xiiñibe casi ti sacrificiu para ganda chuʼnu tobi si né laabe sti biaje* ne para guixá ca pecadu stinu.

11 Hermanu ni nadxieeʼ caʼ, pa gunnaxhii Dios laanu zacá, laanu laaca nuunu obligadu gannaxhiisaanu. 12 Guirutiʼ qué huayuu dxi guʼyaʼ Dios. Pa qué gusaana de gannaxhiisaanu la? nuu Dios né laanu ne jmaruʼ si zahuinni nadxiibe laanu.* 13 Pur ndiʼ nga nánnanu nuunu tobi si né laabe ne laabe nuube tobi si né laanu:* purtiʼ maʼ bidiibe laanu espíritu stibe. 14 Laapedu bidúʼyadu biseendaʼ Bixhózenu Xiiñiʼ para gulá binni guidxilayú ne de laani nga cayuínedu binni. 15 Guiráʼ tu guni cré* Jesús nga Xiiñiʼ Dios, nuu Dios tobi si né laa ne laa nuu tobi si né Dios.* 16 Nánnanu nadxii Dios laanu ne runi crenu ni.

Dios nga guendarannaxhii, ne ni qué gusaana de gannaxhii la? nuu tobi si né Dios ne nuu Dios tobi si né laa.* 17 Ne pa dxandíʼ nadxiinu Dios,* zanda guininu né confianza dxi gueeda juiciu, purtiʼ nácanu casi Jesucristu ndaaniʼ guidxilayú riʼ. 18 Gastiʼ guendaridxibi lu guendarannaxhii. Nga runi, ora perfectu guendarannaxhii stinu la? ribeeni guendaridxibi nuu luguianu, purtiʼ rucueeza guendaridxibi ca laanu. Ndiʼ nga laani: ti binni ni ridxibi la? cadi perfectu diʼ guendarannaxhii stiʼ. 19 Randa rannaxhiinu purtiʼ laabe gunnaxhiibe laanu primé.

20 Pa chuʼ tu guiníʼ «Nadxieeʼ Dios» peru nanalaʼdxiʼ hermanu stiʼ la? rusiguii. Purtiʼ pa cadi nadxiibe hermanu stibe nin ne ruuyabe laa, ximodo zanda gannaxhiibe Dios pa qué ruuyabe laa. 21 Ne ndiʼ nga mandamientu bidiibe laanu: tutiica gannaxhii Dios, laaca naquiiñeʼ gannaxhii hermanu stiʼ.

5 Xiiñiʼ Dios guiráʼ ca ni runi cré Jesús nga Cristu. Ne guiráʼ ca ni nadxii Dios, laaca nadxii ca xiiñibe. 2 Sicaríʼ nga rihuinni nadxiinu ca xiiñiʼ Dios: pa nadxiinu Dios ne rúninu ni ná ca mandamientu stiʼ. 3 Sicaríʼ nga gannaxhiinu Dios: gúninu ni ná ca mandamientu stiʼ, ne cadi nagana* ca mandamientu stiʼ, 4 purtiʼ guiráʼ xiiñiʼ Dios la? runi ganar guidxilayú. Ne ndiʼ nga ni racané laanu guni ganarnu guidxilayú: fe stinu.

5 ¿Tu laa zanda guni ganar guidxilayú? ¿Ñee cadi binni ni runi cré Jesús nga Xiiñiʼ Dios la? 6 Beeda Jesucristu pur nisa ne rini; cadi nisa si, sínuque nisa né rini. Ne rudii espíritu ca testimonio, purtiʼ dxandíʼ espíritu ca. 7 Purtiʼ nuu chonna ni rudii testimonio: 8 espíritu, nisa ne rini, ne nuu guionnaʼ ni de acuerdu.

9 Ricaanu testimonio stiʼ binni, peru jma risaca testimonio stiʼ Dios. Purtiʼ ndiʼ nga testimonio ni cudii Dios: testimonio bidiibe de Xiiñibe. 10 Binni ni napa fe Xiiñiʼ Dios la? napa testimonio stiʼ Dios ndaaniʼ ladxidóʼ. Binni ni qué gapa fe Dios la? cayuni laabe tobi ni rusiguii, purtiʼ qué runi cré testimonio ni bidii Dios de Xiiñiʼ. 11 Ndiʼ nga testimonio que: bidii Dios laanu guendanabani ni qué zaluxe, ne ricaanu guendanabani riʼ pur Xiiñibe. 12 Ni nuuné Xiiñiʼ Dios tobi si,* napa guendanabani ni qué zaluxe; ni cadi nuu tobi si né Xiiñiʼ Dios, qué gapa guendanabani ni qué zaluxe.

13 Cucaaʼ guiráʼ ndiʼ ra nuutu, ca ni napa fe lu nombre stiʼ Xiiñiʼ Dios, ti gánnatu nápatu guendanabani ni qué zaluxe. 14 Ne ndiʼ nga confianza ni nápanu ora guinínenu Dios: zanda guinábanu laa intiica cosa, peru gaca ni ni racalaʼdxiʼ, ne zucaadiaga laanu. 15 Ne pa nánnanu rucaadiágabe ora guinábanu laabe intiica cosa la? laaca nánnanu zacaanu ni gunábanu que, purtiʼ gunábanu ni laabe.

16 Pa gúʼyatu cayuni cometer ti hermanu stitu ti pecadu, peru cadi ti pecadu ni chiné laabe lu guendaguti la? laguiniʼné Dios pur laabe ne laa zudii laabe guendanabani pa dxandíʼ cadi ti pecadu ni chiné laabe lu guendaguti ni. Nuu ti pecadu ni riné lu guendaguti. Pur pecadu riʼ nga cayabeʼ laatu cadi guni orartu Dios. 17 Pecadu nga guiráʼ cosa ni cadi jneza,* peru nuu ti pecadu ni qué riné lu guendaguti.

18 Nánnanu qué runi practicar ca xiiñiʼ Dios pecadu, purtiʼ cayapa Xiiñiʼ Dios laacabe ne gastiʼ qué zanda guni Binidxabaʼ* laacabe. 19 Nánnanu ziúpanu de Dios, peru guidubi guidxilayú riʼ nuuni lu náʼ Binidxabaʼ.* 20 Ne nánnanu beeda Xiiñiʼ Dios para gusiene laanu* ti gunibiaʼnu Dios ni dxandíʼ. Ne nuunenu Dios ni dxandíʼ tobi si* pur Jesucristu, Xiiñiʼ. Laabe nga Dios ni dxandíʼ ne laabe nga rudiibe guendanabani ni qué zaluxe. 21 Xiiñehuiineʼ caʼ, laguixeleʼ de ca bidóʼ.*