Ana Kummanyilila Mlungu Mpaka Kwakamuchisye Chamti Uli Wawojo?

Pakwikanaga apano, tulijiganyisye yindu yakutukamuchisya kupata kwanga kwa chiwusyo achi, Ana Mlungu ali ŵani? Tulijiganyisye kutyochela m’Baibulo kuti lina lyakwe ali Yehofa soni ndamo jakwe japenani mnope jili chinonyelo. Tuyiwenisoni yindu yatesile Mlungu apano yayili yakamuchisya kwa ŵandu soni yachatende msogolomu. Pana yindu yejinji yatukusosekwa kulijiganya pakwamba ya Mlungu, mwine mpaka aliwusye kuti, Ana kutenda yeleyi kukwete umbone wamti uli?

Yehofa akusasala kuti, “Naga mkumsosasosa, jwalakwejo chachikunda kuti mumsimane.” (1 Mbili 28:9) Naga akumsosasosa soni kummanyilila chenene jwalakwe chachikola upile wapajika ‘wakusyoŵekana najo.’ (Salimo 25:14) Ana unasi welewu uli wakamuchisya chamti uli kwa wawojo?

Kusangalala kusyesyene. Malemba gakusasala kuti Yehofa ali “Mlungu jwakusangalala.” (1 Timoteo 1:11) Kuŵa paunasi ni jwalakwe soni kuya yakusasaka jwalakwe kuchakamuchisya kuŵa ŵakusangalala yisyesyene. Yeleyi mpaka yakamuchisye pa umi wawo. (Salimo 33:12) Chachikolasoni umi wakusangalala mwakuŵa paunasi wambone ni ŵane, kola chilu chambone soni kuŵambala yindu yakuwulasya. Chachijitichisya yaŵaŵechete jwamasalimo jwine kuti, “Kukunonyela kuŵandikana ni Mlungu.”—Salimo 73:28.

Kumsamalila jwalijose pajika. Yehofa jwasalile ŵakutumichila ŵakwe kuti, “Chinjimsalila yamkusosekwa kutenda soni kumlolela.” (Salimo 32:8, NWT) Yeleyi yikugopolela kuti Yehofa akusamsamalila jwakutumichila jwalijose pajika soni kumpa yakusosechela. (Salimo 139:1, 2) Naga akuŵa paunasi wambone ni Yehofa, chachiyiwona kuti jwalakwe ali jwakoseka kwakamuchisya wawojo ndaŵi syosope.

Kola sogolo jambone. Konjechesya pakusaka kwakamuchisya wawojo kuŵa ŵakusangalala soni kuŵa ni umi wambone apano, Yehofa Mlungu akulinganya yakuti wawojo akole sogolo jambone mnope. (Yesaya 48:17, 18) Baibulo jikusati, “Umi wangamala chachiwupata naga akulijiganya ya wawojo, Mlungu jikape jwakuwona, soni ya Yesu Klistu jwele wawojo ŵamtumile.” (Yohane 17:3) Mu ndaŵi jakusawusya jino, chembecheyo chakusatupa Mlungu chili mpela nangula jwakutukamuchisya kuti tuŵe “ŵakulimbangana soni ŵangakayichila.”—Ahebeli 6:19.

Gelega gagambile kuŵa magongo gamnono chabe pamagongo gakutukamuchisya kummanyilila chenene Mlungu soni kuŵa najo paunasi. Kuti amanyilile yejinji tukwaŵenda kuti aŵechetane ni jwa Mboni sya Yehofa jwalijose kapena ajawule pa jw.org/yao.