Yakusati Mlungu Pakutusamalila Mpaka Yakamuchisye
Mlungu ŵachipanganyisye chilu chetu mwakusimonjesya kuti chikomboleje kola machili gakuliposya. Ŵachipatala cha Johns Hopkins ŵasasile kuti, “Patulikatile, chilu chetu chikusatenda yindu yakamuchisya kuti liŵangalyo lipole kanga lili lyekulungwa kapena lyamwana.” Nambosoni mwachitema, chilu chikusakamuchisya kuti miyasi jikakopokaga paliŵangalyo soni kuti pawujile mwachitema.
AGANICHISYE AYI: Naga Mlungu ŵachipanganyisye chilu chetu m’litala lyakuti chikomboleje kuliposya, ana jwalakwe nganaŵa atukamuchisyesoni patukulagasika nganisyo? Jwamasalimo jwalembile kuti, ‘Jwalakwe akusaposya ŵandu ŵamtima wekasiche, soni akusataŵa maŵanga gawo.’ (Salimo 147:3) Naga akulagasika nganisyo, ana mpaka asimichisye chamtuli kuti Yehofa mpaka ataŵe maŵanga gawo apano, soni msogolo?
YAJIKUSATUJIGANYA BAIBULO PAKWAMBA YA CHINONYELO CHA MLUNGU
Mlungu akusatusalila kuti, “Mkasimjogopa, pakuŵa une ndili ni mmwe. Mkasimdandawula, pakuŵa une ndili Mlungu jwenu. Chinamlimbikasye. Yisyene chinamkamuchisye.” (Yesaya 41:10) Mundu jwakusamanyilila kuti Yehofa akusasamala ya jwalakwe, akusakola mtendele wamumtima soni akusaŵa jwakulimba pakusimana ni yakulingwa yejinji. Ndumetume Paulo, jwasasile kuti mtendele wamumtima uli “mtendele wa Mlungu wawukusapunda kuganisya mwakusokoka kulikose.” Jwalakwe jwajonjechesye kuti, “Mu yindu yosope, ngusapataga machili kutyochela kwa jwele jwakusamba machili.”—Afilipi 4:4-7, 9, 13.
Malemba gakusatukamuchisya kulimbisya chikulupi pa yilanga ya Yehofa pakwamba ya sogolo ja ŵandu. Mwambone, lilemba lya Chiwunukuko 21:4, 5 (lilembali likusimanikwa pa peji jakuyichisya) likusatusalila yachachitenda Mlungu soni ligongo lyakwe mpaka tumkulupilile kuti chachiyikwanilisya:
“Jwalakwe chachipukuta misosi” josope mmeso mwawo. Yehofa chachimasya yipwetesi yosope soni kulagasika nganisyo atamose yakusawusya yampaka ŵane ayiwone kuti yili yamwana.
“Jwatemi pachitengu cha uchimwene” kwinani, Mwenye Jwamachiligose jwa yakupanganyikwa yosope, chachikamulichisya masengo machili soni udindo wakwe pakumasya yipwetesi soni kutupa chikamuchisyo chatukusosechela.
Yehofa akusatusimichisya kuti maloŵe gakwe gali “gakulupichika soni gakuwona.” Yaŵele ali mkutenda munyumamu mwakamulana ni lina lyakwe, yikusatusimichisya kuti jwalakwe chachikwanilisya maloŵe gakwe.
“‘Jwalakwe chachipukuta misosi josope mmeso mwawo, soni chiwa ngasichipagwasoni. Ngasipapagwasoni kulila, kuwuwula kapena kupikana kupweteka. Yindu yakala yichiŵa yimasile.’ Nambosoni jwatemi pachitengu cha uchimwene jwatite, ‘Mlole! Ngupanganya yindu yosope kuŵa yasambano.’ Jwasasilesoni kuti, ‘Mlembe, pakuŵa maloŵega gali gakulupichika soni gakuwona.’”—Chiwunukuko 21:4, 5.
Yakupanganyikwa yakwinani soni pachilambo chapasi nambosoni Baibulo yikusalosya ndamo sya Atati ŵetu ŵakwinani. Atamose kuti yakupanganyikwa yikusatukamuchisya kuti tummanyilile Mlungu soni kuŵa najo paunasi, nambope Baibulo jikusasala mwangapita mumbali kuti, “Amŵandichile Mlungu, soni jwalakwe chachaŵandichila.” (Yakobo 4:8) Nambosoni pa Masengo 17:27 pakusati, “Jwalakwe nganaŵa kutali ni jwalijose jwetuwe.”
Pakupitilisya kulijiganya kuti ammanyilile Mlungu ni pachachiyika pakusimichisya kuti “jwalakwe akusiŵaganichisyaga.” (1 Petulo 5:7) Ana ni yindu yambone yapi yampaka yipagwe ligongo lyakumkulupilila Yehofa chamti myiyi?
Aganichisye yayamtendechele Toru jwakusatama ku Japan. Jwalakwe jwaleledwe ni mamagwe ŵaŵaliji ŵachiklistu. Nambope kaneko jwajinjile nawo m’kagulu ka ŵandu ŵakutenda yachiwawa lina lyakwe yakuza. Jwalakwe jwatite, “Nakulupililaga kuti Mlungu akusambenga soni kuti chiwa cha ŵachinasi ŵangu mnopemnope ŵananonyelaga, chaliji chilango changu basi.” Toru jwasasile kuti ligongo lyakulipikana chamti myoyo, jwatandite kutenda yindu “mwangasa soni mwangali chanasa.” Ana yakuyichisya ya ndamo jakweji yaliji yamtuli? Jwalakwe jwatite, “Pakusaka kuti mbe jwakumanyika, ngawulajidwe ndili mwanache ligongo lyakum’wulaga mundu jwine jwakumanyika mnope.”
Nambope Toru paŵatandite kulijiganya Baibulo yalumo ni ŵamkwakwe lina lyakwe Hannah, jwachenjile mnope umi wakwe soni muŵayiwonelaga yindu. Hannah jwasasile kuti, “Nayiweni kuti ŵamkwangu achenjile yisyesyene.” Apano Toru akusasala mwakusimichisya kuti, “Pana Mlungu jusyesyene jwakusasamala ya jwalijose jwetuwe. Jwalakwe ngakusaka kuti jwalijose ajase umi wakwe, nambo ali jwakusachilila kwakululuchila yakulemwa ŵandu ŵagalawiche yisyesyene. Jwalakwe akusapikanila yiliyose yatukusamsalila yanganituŵa tukombwele kwasalila ŵane soni yakuti ŵane nganaŵa ayipikanichisye. Pachangakaŵapa, Yehofa chatyosye yakusawusya yosope mpela yipwetesi soni kulagasika nganisyo. Atamose apano jwalakwe akusatukamuchisya m’matala gakuti nganitujembecheyaga. Jwalakwe akusatunonyela soni kutukamuchisya atamose kuti tuli ŵakutuluka.”—Salimo 136:23.
Mwakamulana ni yayamtendechele Toru, kumanyilila kuti Mlungu chatyosye yipwetesi yosope pachangakaŵapa, soni kutupukuta misosi ngaŵa kuti kukusagamba kutupa chembecheyo cha msogolope nambo kukusatukamuchisyasoni kola umi wambone apanopano. Chinonyelo cha Mlungu mpaka chitukamuchisye atamose kuti chilambochi chigumbele ni yipwetesi.