YIWUSYO YAKUTYOCELA KWA ŴAKUŴALANGA
Ana “cikole” soni “cidindo” yakusapocela Aklistu ŵasagulwe kutyocela kwa Mlungu yili cici?—2 Akoli. 1:21, 22.
INdaŵi jamunyuma ŵandu ŵadindaga cidindo ni mbete pa cipepala pakusaka kusimicisya kuti yayilembegweyo yili yisyesyene
Cikole: Mwakamulana ni yajikusasala buku jine, maloŵe gacigiliki gaŵagagopolele kuti “cikole” pa 2 Akolinto 1:22 ŵagakamulicisyaga masengo pa yindu yakwayana ni “malamusi soni ya malonda.” Maloŵega gakusagopolela “mbali jamnono ja mbiya syawukusalipila ku nganya, kapena kwa ŵandu ŵakukukamulila masengo.” Pakwamba ya Aklistu ŵasagulwe, lilemba lya 2 Akolinto 5:1-5 likusasala kuti malipilo gawo gosope kapena kuti mbote jawo jikusapwatikapo kola cilu cangakomboleka kuwola. Malipilogo gakupwatikaposoni kupocela mtuka wa umi wangawa kwinani.—1 Akoli. 15:48-54.
M’cigiliki ca masiku agano maloŵe gakulandana ni gaŵagagopolele kuti cikole akusagakamulicisya masengo pakusala ya mbete jakusawekana ŵandu ŵakamulene kuti alombane. Cisyasyo celeci cili cakamula mnope kwa Aklistu ŵasagulwe ligongo Baibulo jikusasala kuti jemanjaji caciŵa ŵamkwakwe Klistu ŵakuwanicisya.—2 Akoli. 11:2; Ciu. 21:2, 9.
Cidindo: Ndaŵi jamunyuma ŵandu ŵadindaga cidindo pa yindu yine pakusaka kulosya kuti yili yawo, kusimicisya kuti yili yisyesyene, kapena pakusaka kusimicisya mkamulano watesile ni ŵandu ŵane. Aklistu ŵasagulwe akusapocela cidindo cakuwanicisya kupitila mu msimu weswela pakusaka kulosya kuti ali cipanje ca Mlungu. (Aef. 1:13, 14) Aklistu ŵasagulwe akusapocela cidindoci kakumalisya pasigele panandi kuwa ali ŵakulupicika, soni ŵane cacipocela yisawusyo yekulungwa yili yisigele panandi kutanda.—Aef. 4:30; Ciu. 7:2-4.