Likuga Lyakogoya lya Asilikali ŵa Yehofa

Beni-hadadi Mwenye jwa Asiliya, jwasacililaga kuti aputaneje ni Ayisalayeli. Nambo ndaŵi jilijose jaŵajawulaga kukwaputa Ayisalayeli, jwakulocesya Elisa ŵamkalamusyaga mwenye jwa Ayisalayeli. Yeleyi yamkamucisyaga mwenyejo kwaŵambala acimagongowo. M’yoyo Beni-hadadi jwalingenye yakuti amkamule Elisa. Jwalakwe jwayimanyi kuti Elisa ali mumsinda wa Dotani, kaneko Beni-hadadi ŵatumisye asilikali ŵa Asiliya kuti akamkamule.

Asiliya ŵakopocele ku Dotani cilo. Kundaŵi kwakwe jwakutumicila jwa Elisa jwakopwece pasa ni ŵaweni asilikali ali awusyungulile msindawo. Jwalakwe wamkamwile woga ni ŵagumisile kuti, ‘Elisa ana citutende uli?’ Elisa Ŵamsalile jwalakwejo kuti, ‘Uŵe tupali ŵajinji kupunda jemanjajo.’ Yehofa ŵamtendekasisye jwakutumicilajo kugawona mahaci soni magaleta ga ngondo gali m’matumbi gagasyungulile msindawo.

Asilikali ŵa Asiliya paŵalingaga kuti amkamule Elisa, jwalakwe jwapopesile kuti, ‘Conde Yehofa, ŵatendekasye ŵanduŵa kuti akalola.’ Atamose kuti jemanjajo ŵakombolaga kulola nambope nganamanyililaga malo gaŵaliji. Elisa ŵasalile asilikaliwo kuti, ‘Mli mumsinda wakulemweceka kwende napecesye kwa mundu jwakumsosajo.’ Jemanjajo ŵamkuyisye Elisa mpakana ku Samaliya kuŵatamaga mwenye jwa Ayisalayeli.

Asiliya ŵala ŵayimanyi mwakucelewa kuti ali kumalo gane. Mwenye jwa Ayisalayeli ŵam’wusisye Elisa kuti, ‘Ana nawulaje ŵanduŵa?’ Ana Elisa wawuweni welewu kuŵa upile wakuwucisya yakusakala yaŵasakaga kumtendela yila? Iyayi. Elisa ŵatite, ‘Mkawulaga. Mwape cakulya, kaneko mwasalile ajawuleje.’ Pelepo mwenyejo jwalinganyicisye ŵanduwo cindimba cekulungwa kaneko ŵasalile kuti ajawuleje kumangwawo.