Ana Yilambo Mpaka Yimalane ni Yakogoya Yayikwika Ligongo Lyakusokonechela kwa Nyengo?—Ana Baibulo Jikusasala Yamtuli?

Msongano wa nambala 27 wa bungwe ja United Nations Wakulola ya Kuchenga kwa Nyengo, wamasile Lyamlungu pa Nofemba 20, 2022. Pamsonganowu ŵandu ŵakamulene kuti paŵe msaku wa mbiya wakamuchisya yilambo yakulaga kulimbana ni yakusawusya yakwika ligongo lyakuchenga kwa nyengo. Nambope ŵandu ŵajinji akwitichisya kuti yeleyi nganiyiŵa yimasisye kusokonechela kwa nyengo.

• Pa Nofemba 19, 2022, mlembi jwamkulungwa jwa bungwe ja United Nations Che António Guterres, ŵasasile kuti: “Ngukamulana ni yakuti paŵe msaku wa mbiya wakuti ukamuchisyeje ŵandu ŵachalajeje ligongo lyakusokonechela kwa nyengo.” Jwalakwe jwasasilesoni kuti, “Nambo tukumanyilila nditu kuti kutenda yeleyi ngakuŵa kwakwanila . . . Chilambochi chili mpela mundu jwali ku chipatala nambo ali pamlolela.”

• Pa Nofemba 20, 2022, nombe nawo a pulesidenti ŵakala ŵa chilambo cha Ireland ŵele ŵalijisoni jwamkulungwa jwa bungwe ja United Nations Jakulola ya Ufulu wa Ŵandu, Che Mary Robinson ŵasasile kuti: “Pamkaŵapa chilambochi chichisimane ni yakusawusya yakogoya mnope ligongo lyakuchenga kwa nyengo.”

Nombe nawo ŵachinyamata akudandawula ni mwachijiŵele sogolo ja chilambochi. Nambo ana yilamboyi mpaka yikamule masengo yimpepe pakumalana ni yakusawusya yayikusayika ligongo lyakusokonechela kwa nyengo? Ana Baibulo jikusasalaga yamtuli panganiji?

Ana yayikamulene yilamboyi chiyikomboleche?

Atamose kuti yilamboyi yikulingalinga kutenda yakuti yimalane ni yakusawusya yayikusayika ligongo lyakusokonechela kwa nyengo, nambope Baibulo jikusasalaga kuti yilamboyi nganiyiŵa yikombwele kumalana ni yakusawusyayi. Alole magongo gaŵili aga:

• “Ngaŵa mkomboleka kuchijongolasoni chindu chepindiche.”—Jwakulalichila 1:15.

  Ana yeleyi yikugopolela chichi? Maboma ga ŵandu nganigaŵa gakombwele kutenda yindu yosope mwakuŵajilwa ligongo ŵandu nganiŵapanganya kuti alilamulileje achimsyene. (Yelemiya 10:23) Atamose yilamboyi yili yikamulene chamtuli, nambope ngasiyikombola kumasya yakusawusya yapachilambopa.

• “Pakuŵa ŵandu chachiŵa ŵakulinonyela, ŵakunonyela mbiya, . . . ŵangasaka kukamulana ni ŵane.”—2 Timoteyo 3:2, 3.

  Ana yeleyi yikugopolela chichi? Baibulo jasasile yisyesyene pakwamba ya mwachachiŵela ŵandu ŵajinji masiku getu gano. Ŵanduŵa chachiŵa ŵakulinonyela soni ŵangasaka kutenda yindu yakwakamuchisya achimjawo.

Chembecheyo chatukwete

Atamose yili myoyo, nambope sogolo jambone ja chilambochi jangadalila yagakusaŵecheta maboma ga ŵandu. Mlungu asagwile Jwakulamulila jwambone jwa chilambochi, jwali Yesu Klistu. Pakwamba ya jwalakwe Baibulo jikusati:

• “Mwanache jwamlume apelechedwe kwa uwe. Nipo taŵe jwakutulamulila. Tachimpa lina lyakuti, Pungu Jwakusimonjesya, Mlungu jwamachili, Atati ŵangali mbesi, Mwenye jwa Mtendele.”—Yesaya 9:6.

Yesu ni jwali Mwenye jwa Uchimwene wa Mlungu, kapena kuti boma jakwinani. (Mateyu 6:10) Jwalakwe akwete machili, lunda soni ali jwakusachilila kusamalila chilambochi yimpepe ni yosope yayikutama mwelemo. (Salimo 72:12, 16) Mu ulamusi wakwe, boma jakwinaniji ‘jichijonanga wosope ŵakuchijonanga chilambo chapasi.’ Konjechesya pelepa, jichilinganyasoni yindu yachilengedwe yayijonasiche pachilambopa.—Chiwunukuko 11:18; Yesaya 35:1, 7.

Kuti amanyilile litala lyambone lyakumalana ni yakusawusya yakwika ligongo lyakusokonechela kwa nyengo, aŵalanje ngani ja Chichewa jamtwe wakuti “Zomwe Baibulo Limanena pa Nkhani Yakusintha Kwa Nyengo Komanso Tsogolo Lathu.”