Ana Baibulo Jikusasalaga Yamtuli Pakwamba Yakalamwisye Ŵandale ya Ngondo ja Alamagedo?

Lyakulemba kundaŵi, pa 10 Okotoba, 2022, asilikali ŵa chilambo cha Russia ŵatumisye mabomba gagawulisye misinda jine ku Ukraine. Jemanjaji ŵatesile yeleyi pakuwuchisya yaŵatesile asilikali ŵa ku Ukraine ŵaŵawulisye mabomba pakonanga mlato wakusosekwa mnope wawukusalumbikanya chilambo cha Russia ni ka chilumba ka Crimea. Yeleyi yitendekwe, panyuma pakuti ŵandale ŵakalamwisye ŵandu kuti ngondo ja Alamagedo mpaka jitande pamkaŵapa.

•  Pa Okotoba 6, 2022, President jwa ku America, Joe Biden, jwasasile kuti: “Kutandila mundaŵi ja President John F. Kennedy, ngondo ja Alamagedo nganijijogoyeje mpela mwayiŵelele apano. Mundaŵijo yilambo yakangene mwamti yasigele panandi kuti yiputane ngondo ja nyukiliya . . . Mwamti nguganisya kuti nganiyiŵa yikomboleche kukamulichisya masengo yida ya nyukiliya nambo ningatendekasya kuti Alamagedo jitendekwe.”

•  Pangani sya pa BBC sya pa Okotoba 8, 2022, President jwa ku Ukraine Volodymyr Zelensky pakusala yakuyichisya yampaka yiwoneche ligongo lyakamulichisya masengo yida ya nyukiliya, jwalakwe jwatite, “Ngwitichisya kuti Alamagedo chijitendekwe pamkaŵapa soni kuti chilambo chosope chichiŵe pangosi.”

Ana kamulichisya masengo yida yakogoya ya nyukiliya ni kwampaka kuyikasye ngondo ja Alamagedo? Ana Baibulo jikusasalaga yamtuli panganiji?

Ana yida ya nyukiliya ni yayichitendekasya Alamagedo?

Iyayi. M’Baibulo, maloŵe gakuti “Alamagedo” gakusasimanikwa pampepe pa Chiwunukuko 16:16. Soni maloŵega gangasalaga ya ngondo syapasikati pa ŵandu, nambo gakusasalaga ya ngondo ja pasikati pa Mlungu ni “mamwenye ga pachilambo chosope chapasi.” (Chiwunukuko 16:14) Mwamti Mlungu chachikamulichisya masengo ngondo ja Alamagedo pakumasya maulamusi ga ŵandu.—Daniele 2:44.

Kuti amanyilile mwajichakwayila ŵandu pachilambopa ngondo ja Alamagedo, aŵalanje ngani jakutiAna Ngondo ja Alimagedo ni Chichi?

Ana ngondo ja nyukiliya jichijonanga chilambochi soni yosope yayili mwelemo?

Iyayi. Atamose kuti ŵakulamulila mpaka akamulichisye masengo yida ya nyukiliya kusogoloku, nambope Mlungu ngasakunda kuti chilambochi soni yosope yayili mwelemo yimale. Panganiji Baibulo jikusati:

•  “Chilambo chapasi [“chichitama,” NWT] mpaka kalakala.”—Jwakulalichila 1:4.

•  “Ŵandu ŵambone tachipochela chilambo, ni tachitama mwelemo kwa yaka yosope.”—Salimo 37:29.

Nambope yakulochesya ya m’Baibulo soni yayikutendekwa masiku agano yikulosya kuti yindu chiyichenje mnope pachilambopa. (Mateyu 24:3-7; 2 Timoteyo 3:1-5) Amanyilile yajikusasalaga Baibulo yakwamba sogolo kupitila mu kulijiganya Baibulo mwalulele.