Tulolechesyeje Kuti Tukupikanila Mwakusamala

1-2. (a) Ana ni yindu yapi yele Yehofa akwatendela ŵandu ŵakwe masiku agano? (Salimo 23:​1, 2, 5) (b) Ana munganiji chitukambilane chichi?

MASIKU agano, Yehofa akutupa chakulya chejinji chausimu. Mwamti tukusakamulana ni maloŵe gaŵaŵechete Daudi kuti: “Yehofa ali M’busa jwangu. Ngasisoŵa chindu chilichose.”—Aŵalanje Salimo 23:​1, 2, 5.

² Litala limo lyakusakamulichisya masengo Yehofa pakutupa chakulya chausimu masiku agano, lili kupitila pamisongano ja mpingo. Patuli pamisonganoji, yindu yejinji yatukusalijiganya yikusaŵa kuti tukuyimanyilila kala. Tukusasosechela kulijiganya yindu yeleyi atamose yili mkuti tuli “ŵakutamilichika pa yindu yisyesyene,” kapena kuti tuŵele ŵa Mboni kwa yaka yejinji. (2 Pet. 1:12) Nambo ana pali pamisongano, yikusasawusya kupikanila mwakusamala naga ngani jakupikanilajo aŵele ali mkulijiganya kwa yaka yejinji? Naga yili myoyo, nganiji chijakamuchisye. Chitukambilane yiwusyo yakuti: Ligongo chichi tukusosekwa kupikanilaga mwakusamala patuli pamisongano? Ana abale ŵakusajiganya mumpingo mpaka atende chichi pakwakamuchisya ŵandu kuti apikanileje mwakusamala pakwiganya? Ana m’weji mpaka tutende chichi kuti tupikanileje mwakusamala patuli pamisongano? Nambo chandanda, kwende tukambilane chiwusyo chakuti: Ana ni ŵani ŵakusatujiganya patuli pamisongano?

ANA NI ŴANI ŴAKUSATUJIGANYA PATULI PAMISONGANO?

3. Ana Yehofa akusaŵechetana ni m’weji mwamti uli? Ana ŵakutumichila ŵakwe pakwajiganya ŵane akusakamulichisya masengo chamti uli Baibulo?

³ Yehofa akusaŵechetana ni m’weji kupitila m’Maloŵe gakwe Baibulo. (2 Tim. 3:​16, 17) Mwamti Yesu jwamanyililaga chenene yeleyi. Ni ligongo lyakwe jwakamulichisyaga masengo mwalunda Maloŵe ga Mlungu. Yeleyi yatendekasisye ŵandu ŵaŵampikanilaga kuwusya kuti: “Ana yikukomboleka chamtuli mundu jwakuti nganajawulejepo ku sukulu kugamanyililaga Malemba chamti myiyi?” (Yoh. 7:15) Ŵandu ŵaŵaliji ŵakulinandiya soni ŵaŵasakaga kulijiganya yakwamba Yehofa, ŵasangalalaga mnope paŵampikanaga Yesu ali mkulondesya chenene Maloŵe ga Mlungu. Nombenawo Aklistu ŵa m’yaka 100 yandanda mpela ndumetume Paulo soni Apolo, ŵakamulichisyaga masengo Malemba pakwajiganya ŵandu. (Mase. 17:​2, 3; 18:​24, 28) Nombe m’weji ŵa Mboni sya Yehofa tukusamanyilila kuti yatukusajiganya kupitila mungani sya pa webusayiti, pologalamu ja Broadcasting, ngani sya wosope, soni mafidiyo yikusatyochela m’Baibulo. Ŵandu ŵakusayika pamisongano jetu akusasangalala mnope pakulola yatukusatenda pakujikamulichisya masengo Baibulo. Mwamti wosope ŵakusakola mbali pamisongano akusakamulichisya masengo Baibulo pakwiganya. Jemanjaji pakuŵalanga Baibulo akusiŵakamuchisya ŵandu kupikanichisya yaŵalasileyo soni kulola yampaka atende pakukamulichisya masengo yakulijiganyayo.—Luk. 24:32.

4. Ana maloŵe gakuti “kupikana” soni “kupikanila” gakusagopolela chichi?

⁴ Baibulo pajikukamulichisya masengo maloŵe gakuti “kupikana” soni “kupikanila” ndaŵi syejinji jikusaŵa jili mkugopolela kumpikanila mundu jwinejwakwe. Myoyo Yehofa pakuŵechetana ni m’weji pamisongano, tukusapikanichisya yakusasaka kuti tutendeje. Yakuyichisya yakwe yikusaŵa yangasawusya kuti tumpikanile. Yili yangalajila kuwusya kuti patuli pamisongano Yehofa akusaŵa jwakusangalala mnope pakutuwona tuli mkupikanila mwakusamala soni kutenda yatujiganyisyeyo.—Mis. 27:11.

LIGONGO CHICHI TUKUSOSEKWA KUPIKANILAGA MWAKUSAMALA PATULI PAMISONGANO?

5. Ana kumnonyela Yehofa kukusatutendekasya kutenda chichi? (Yohane 4:​23, 24; 1 Yohane 5:3)

⁵ Tukusapikanila patuli pamisongano ligongo tukusamnonyela Yehofa. (Mat. 22:37) Patukulijiganya yejinji yakwamba Yehofa, yikusatutendekasya kuti tumnonyeleje mnope jwalakwe. Yeleyi yikusatutendekasya kuti tuŵeje ŵakusachilila kupikanila yakusatusalila m’Baibulo, kutenda yatusalileyo, soni kumlambila pakamulichisya masengo litala lyakusalijitichisya.—Aŵalanje Yohane 4:​23, 24; 1 Yohane 5:3.

6. Ana Yehofa akusatujiganya chichi patuli pamisongano ja mpingo?

⁶ Tukusapikanila patuli pamisongano ligongo tukusitwanonyela ŵandu. (Mat. 22:39) Patuli pamisongano, Yehofa akusatujiganya yampaka tutende pakwakamuchisya Aklistu achimjetu soni ŵandu ŵangakusamtumichila jwalakwe. Mwachisyasyo, kabuku kakuti Twanonyeleje Ŵandu—Twajiganyeje kakusatukamuchisya kuti tukoleje ndamo syampaka situkamuchisye patukulalichila. Ana yikusiyasawusya kuti atande kuŵechetana ni ŵandu mu utumiki? Naga yili myoyo, apikanileje mwakusamala pandaŵi jele abale ni alongo akutenda yisyasyo mu mbali jakuti “Kulipeleka mu Utumiki wa Mumgunda.” Kutenda yeleyi mpaka kwakamuchisye mnope.

7. Ligongo chichi yili yakusosekwa kupitilisya kumpikanila Yehofa?

⁷ Tukusapikanila patuli pamisongano ligongo tukusasaka tukole umi wakusangalala soni tukole umi wangamala. Tukusasosekwa kumpikanila Yehofa naga tukusaka kukola umi wakusangalala apano soni wangamala. Yeleyitu ni yaŵasalilesoni Yehofa ŵandu ŵakwe munyumamu. (Det. 32:​44-47) Patukupikanila mwakusamala pamisongano jetu, tukusalimbikasidwa soni tukusalijiganya yampaka tutende kuti tukomboleje kupilila yakusawusya yatukusimana nayo kwineku tuli mkwembecheya mwakuwusimana mtima chilambo chasambano. (Alo. 8:25) M’masiku gakumalisya gano, yili yakusosekwa kuti tumpikanileje mnope Yehofa soni tukoleje yakutenda yejinji pakumtumichila jwalakwe.—Mat. 24:​42-44; Chiw. 1:3.

YAMPAKA TUTENDE PAKWAKAMUCHISYA ŴANE KUTI APIKANILEJE PALI PAMISONGANO

8. Ligongo chichi abale ŵakusaŵecheta ngani akusosekwa kutenda yakuti apitilisye kwiganya chenene?

⁸ Abale ŵakusajiganya pamisongano, mnopenope ŵakusaŵecheta ngani sya wosope, akusosekwa kutenda yakomboleka kuti apitilisye kwiganya chenene. M’bale pakosechele chenene ngani jakwe, soni kujiŵecheta pakamulichisya masengo Baibulo mpaka ŵakamuchisye ŵandu ŵanganaŵa ŵa Mboni kusaka kulijiganya yejinji. Jwalakwe mpaka ŵakamuchisyesoni Aklistu achimjakwe kupikanichisya chenene mfundo sya m’Baibulo yampaka yatendekasye kuti apitilisye kusikuya paumi wawo. Naga akwete mbali pamisongano, akusosekwa kukumbuchila kuti mbali jawojo mpaka jakamuchisye ŵane mu litala lyakuti nganalijembecheyaga. Myoyo papochele ngani, alinjeje kukuya mfundo syakuyichisyasi. Yisyene kuti mfundosi sili syakamuchisya mnope kwa abale ŵakusaŵecheta ngani sya wosope. Nambope, mpaka simkamuchisyesoni jwalijose jwakusaŵecheta ngani pamisongano.—2 Tim. 4:2; Tit. 1:9.

9. Ana mpaka atende chichi kuti ngani jawo jiŵe jangasawusya kujikuya?

⁹ Mfundo syawo siŵeje syakupikanika chenene. Pakuŵecheta ngani, akusasaka kuti ŵakupikanila ŵawo ŵakuyeje mwangasawusya. Mpaka ŵasokonasye ŵakupikanila ŵawo naga akuŵecheta mfundo syejinji soni syangapikanika chenene. Ana mpaka atende chichi kuti ngani jawo jiŵe jangasawusya kujikuya? Akuyeje mfundo syakuyichisyasi: (1) Kundanda kwa ngani jawo asaleje mfundo syekulungwa syasili munganijo. (2) Alondesyeje mfundo jilijose pajikapajika soni apumulileje panandi pamalisisye kulondesya mfundo jekulungwa, kaneko asaleje mwakupikanika chenene mfundo jine jekulungwa jakusaka kulondesya. (3) Kumbesi kwa ngani jawo, awilisyeje mwakata mfundo syekulungwakulungwa.

10. Ligongo chichi akusosekwa kusinonyela mfundo sya mungani jawo?

¹⁰ Asinonyeleje mfundo syakusaka kwiganya. Naga akusinonyela mfundo sya mungani jawo, yichitendekasya kuti akaŵechete mwakusangalala soni mwakulosya kuti akuyikulupilila yakuŵechetayo. (Mis. 2:​4, 5; Mase. 4:20) Kuti yeleyi yikomboleche, aganichisyeje mnope malemba soni mfundo syakusaka akalondesye. M’bale jwa ku United States jwakwete yaka ya mma 70 akusakumbuchilape ngani jiŵapikanile pajwaliji jwachinandipile. Jwalakwe jwasasile kuti: “Ngusakumbuchila yaŵatesile jwakuŵecheta ngani pakutulimbikasya kuti tuganichisyeje mnope patukuŵalanga Maloŵe ga Mlungu. Jwalakwe jwaŵechete mwakupikanika chenene mwampaka tutendele yeleyi soni nayiweni kuti yaŵaŵechetagayi ŵayiwonaga kuŵa yakusosekwa mnope. Nganiji jachenjile umi wangu. Jangamuchisye kuchenga yanatendaga pakuŵalanga Baibulo soni jalimbisye unasi wangu ni Yehofa.”

11. Ana jwakuŵecheta ngani akusosekwa kutenda chichi kuti ŵakamuchisye ŵakupikanila kupindula ni nganijo? (1 Timoteyo 4:​13-16)

¹¹ Aganichisyeje mfundo syampaka syakamuchisye ŵakupikanila ŵawo soni alondesyeje mwampaka asikamulichisye masengo. Pakuŵecheta ngani jawo akamulichisyeje masengo Malemba pakwalimbikasya ŵakupikanila ŵawo soni ŵakamuchisyeje kumanyilila mwampaka akamulichisye masengo mfundo syakulondesyasyo. Mwachisyasyo, Timoteyo paŵatendaga utumiki ku Efeso, ndumetume Paulo ŵamsalile mwakupikanika chenene yaŵasosekwaga kutenda kuti apitilisye kuŵa paunasi ni Yehofa. (Aŵalanje 1 Timoteyo 4:​13-16.) Myoyo aganichisyeje yindu yampaka yakamuchisye ŵakupikanila ŵawo soni ŵakamuchisyeje kumanyilila yampaka atende pakamulichisya masengo mfundo sya mungani jawo.

12. Ligongo chichi kuŵecheta ngani mwachipago kuli kwakusosekwa?

¹² Ajilinjilileje ngani jawo mwakwesya maloŵe kuti akajiŵechete mwachipago. Mpaka yiŵe yangasawusya kwa abale ni alongo kupikanila soni kupikanichisya ngani jawo naga akujiŵecheta mwachipago. Kuti yeleyi yikomboleche aŵambaleje kulemba chilichose ni chakulinga chakuti akagambeje kuŵalanga. Kabuku kakuti Ajongolele pa Kaŵalanje Soni Kajiganye Kawo kasasile kuti: “Aŵecheteje mwachipago, soni mwakulosya mwakupikanila mumtima mwakamulana ni ngani jawo soni ŵakupikanila ŵawo.” Naga akuŵecheta ngani kutyochela mu mtima, ŵakupikanila ŵawo chachapikanila mwakusamala, chachisangalala ni mfundo syakulondesya, soni chachiŵa ŵakusachilila kusikamulichisya masengo.

13. Pakukosechela ngani, ligongo chichi akusosekwa kumŵenda m’bale jwakusaŵecheta chenene ngani kuti ŵakamuchisye? (Alolesoni chiwulili.)

¹³ Amŵende m’bale jwakusaŵecheta chenene ngani kuti ŵakamuchisye. Mwachisyasyo, mkanaŵechete ngani jawo mpaka amlosye m’balejo yindu yakosechele soni amŵende kuti ŵapikanile pakuŵecheta nganijo. Kaneko akamulichisye masengo mfundo syampaka ŵasalile ni chakulinga chakuti ngani jawo chijiŵe jakupikanika chenene. (Mis. 1:5) Mwajika jetu nganituŵa tumanyilile naga tukulondesya chenene mfundo syetu m’litala lyakuti sikakamuchisye ŵakupikanila ŵetu. Chakulinga chetu chili chakuti tuŵe ŵakwiganya ŵambone. Yeleyi yichikamuchisya kuti tukomboleje kwakamuchisya ŵane kupikanichisya mfundo sya m’Baibulo soni kulola yampaka atende pakusikamulichisya masengo.a

YAMPAKA TUTENDE KUTI TUPIKANILEJE CHENENE PATULI PAMISONGANO

14. Ligongo chichi tukusosekwa kukola nganisyo syaŵakwete mundu juŵalembile Salimo 119? (Salimo 119:​24, 111, 167)

¹⁴ Kukumbuchila kuti yakusatusalila Yehofa yili yakusosekwa mnope mpaka kututendekasye kuti tupikanileje chenene patuli pamisongano. Tukusasosechela kuti Mlungu atujiganyeje kuti tukombole kupilila yindu yatukusimana nayo mu “ndaŵi jakusawusya soni jakogoya jino.” (2 Tim. 3:1) Naga patuli pamisongano tukuyiwona kuti yindu yatukulijiganya tuŵele tuli mkuyipikana kwa ndaŵi jelewu, mpaka tutende chenene kuti tukoleje nganisyo siŵakwete mundu juŵalembile Salimo 119.—Aŵalanje Salimo 119:​24, 111, 167.

15. Ana ni chichi champaka chitukamuchisye kuti tuchiwoneje chakulya chausimu kuŵa chakusosekwa mnope?

¹⁵ Tukusosekwa tuchiwoneje chakulya chausimu chatukusapochela kuti chili mtuka wakutyochela kwa Yehofa. Yeleyi ni yaŵasosekwaga kutenda Ayisalayeli paŵaliji m’chipululu pandaŵi jele Yehofa ŵapaga mana. (Eks. 16:​15, 31) Yili yangakayikasya kuti jemanjaji pandanda ŵasangalalaga mnope ni mana. Yili myoyo ligongo lyakuti gatyochelaga kwa Yehofa, galiji gakunong’a, soni gakamuchisyaga kuti akole umi. Nambo mkupita kwa ndaŵi, ŵandu ŵane ŵapesile ni kulya mana lisiku lililyose. (Num. 21:5) Tukulijiganya chichi pelepa? Ngatukusosekwa kuyiwona yindu yatukusalijiganya kuŵa yakupesya atamose yili mkuti tukulijiganya yinduyo mwakuwilisyawilisya. Mmalomwakwe, tukumbuchileje kuti jwakusatujiganya ali Yehofa. Tukumbuchilejesoni kuti kapolo jwakulupichika ni jwalunda akusasagula mwakusamala yindu yatukusosekwa kulijiganya pamisongano jetu. Tukaliŵalilagasoni kuti yindu yatukusalijiganya mpaka yitukamuchisye kuti tusaguleje yindu mwalunda soni kuti chitutame ni umi mpaka kalakala.—Mis. 3:​13, 16-18; Yoh. 17:3.

16. Ana ni chichi chachakamuchisye ŵandu ŵaŵele ali mkutumichila Yehofa kwa yaka yejinji kuti apikanileje chenene pali pamisongano? (Alolesoni libokosi lyakuti Yampaka Tutende Kuti Tupikanileje Chenene.)

¹⁶ Mpaka tupikanile chenene patuli pamisongano naga tukuliŵichila yakulinga. Kwende tulole yayakamuchisye ŵandu ŵaŵele ali mkutumichila Yehofa kwa yaka yejinji kuti apikanileje chenene pali pamisongano. Ashley, jwaŵele ali mkutumichila Yehofa kwa yaka yakupunda 30 jwasasile kuti: “Kuti mbikanileje chenene pandili pamisongano ngusakosechela mkanipaŵe. Naga nganingosechela, ngusalepela kwanga soni nganisyo syangu sikusagamba kwendajenda.” József, jwatumichile Yehofa kwa yaka 52 jwasasile kuti: “Ngusasangalala kupikanila ngani jakuti ngujimanyilila kala. Yili myoyo ligongo lyakuti ngusalijiganya yindu yasambano kutyochela panganijo.” Jwasasilesoni kuti: “Atamose yili mkuti m’bale jwakuŵecheta ngani nganakola luso lwa kuŵecheta, ngusalingalinga kuganichisya mfundo sya m’Malemba syakuŵecheta mmalo mwakuganichisya mnope mwakuŵechetela.”

17. Ana akusosekwa kutenda chichi kuti apikanileje chenene pali pamisongano? (Alolesoni chiwulili.)

¹⁷ Kuti apikanileje chenene pamisongano atendeje yindu yakuyichisyayi: (1) Aŵambaleje kulya mnope kuti akaja kugona misongano jili mkati. (2) Ayicheje mwachitema kuti apate malo gakutama misongano mkanijitande. (3) Atende yakuti mafoni soni matabuleti gawo gakasokonasyaga misongano jili mkati. (4) Aganichisyeje mfundo syampaka aŵechete jwakuŵecheta ngani. (5) Nganisyo syawo syosope siŵeje kwa jwakuŵecheta ngani. (6) Alembeje mfundo syakata kapena kwambula yindu yampaka yakamuchisye kukumbuchila mfundo syakusosekwa mnope. (7) Apikanileje mwakusamala pakulondesya lilemba soni aloleje kukamulana kwa lilembalyo ni ngani jajikuŵechetedwajo. (8) Aliwusyeje kuti, ‘Ana mpaka ngamulichisye masengo chamti uli lilembali pakumkamuchisya mundu jwine mumpingo kapena mu utumiki?’ (9) Mkanajawule ku msongano wadela kapena wachigawo aloleje pologalamu ja msongano soni aloleje mtwe wakulongolela palisikulyo, mitwe ja ngani soni malemba gagali pa mitwejo. (10) Akosechelesyeje mtima wawo mwakupata malo gakutama nikupikanilaga nyimbo soni kulolela mafidiyo gakusaŵika msongano pawugambile kutanda.

APITILISYE KUMPIKANILA YEHOFA

18. Ligongo chichi tukusosekwa kupitilisya kupikanila patuli pamisongano?

¹⁸ Tukusosekwa kupitilisya kupikanila patuli pamisongano ligongo yikusaŵa kuti tukukunda kuti Yehofa atulongoleleje “mmatala ga chilungamo.” (Sal. 23:3; 31:3) Tukusasosechela malangiso gakutyochela kwa Yehofa ni chakulinga chakuti tupitilisye kutenda yindu yakuŵajilwa. Myoyo, alolechesye kuti pali pamisongano ‘akupikanila mwakusamala’ soni akamulichisye masengo yalijiganyisye. (Luk. 8:18) Wosope ŵakusampikanila Yehofa mpaka aŵe ŵakusangalala apano soni chachikola umi wangamala kusogoloku.—Sal. 119:​2, 14.