Yampaka Atende Pakumalana ni Yindu Yakusokonasya

1-2. Ana chindu chakusosekwa mnope mpaka chitusokonasye mwamti uli?

ANA ni ndaŵi japi jele yindu yine yasokonasisye? Komboleka kuti papali chindu chinechakwe chiŵatendaga nambo mwangajembecheya patendekwe chindu chine mwamti ŵasosekwaga kusagula chindu chachili chakusosekwa mnope. Mwachisyasyo, aganichisye kuti akwendesya njinga ni mundu jwine akwajimbila foni. Komboleka kuti jwakwajimbilajo akusaka chikamuchisyo chawo mwachitema. Nambope, ligongo lyakuti akwendesya njinga nikuti fonijo mpaka jasokonasye naga akwanga. Pandaŵiji, kuŵika nganisyo syawo pakwendesya njingajo ni kwampa kuŵe kwakusosekwa mnope.

² Pana yindu yejinji yayili yakusosekwa mnope pa umi wetu. Tukusamanyilila kuti kuŵika nganisyo syetu pa yindu ya usimua kuli kwakusosekwa mnope. (Mat. 6:33) Ŵandu ŵa Yehofa, ali mpela mundu jwakwendesya njinga jwakusatenda yindu mwakusamala. Ndaŵi syosope, tukusalingalinga kumanyilila yindu yampaka yitusokonasye patukumtumichila Yehofa.—Mis. 4:25; Mat. 6:22.

3. Ana mu nganiji chitukambilane chichi?

³ Wosopewe ngatukusasaka kuti chilichose chitusokonasyeje patukumtumichila Yehofa. Atamose yili myoyo, ndaŵi sine tukusasimana ni yindu yakutusokonasya. (Luk. 21:​34-36) Myoyo, pakusaka kutukamuchisya kuti nganisyo syetu siŵeje pakumtumichila Yehofa, munganiji chitukambilane (1) yindu yampaka yitusokonasye, (2) yaŵatesile Yesu paŵasimene ni yindu yayikamsokonasisye soni (3) yampaka tutende kuti tukombole kulimbana ni yindu yakusokonasya.

YINDU YAMPAKA YITUSOKONASYE

4-6. Ana ni yindu yapi yampaka yitusokonasye mwangasawusya?

⁴ Wosopewe tukwete yindu yakusosekwa mnope yatukusasosekwa kutenda. Mwachisyasyo, komboleka tukulaga ni ulwele winewakwe kapena pana yindu yine yakusosekwa mnope yatukusosekwa kuyisamalila ku liŵasa lyetu. Yindu yeleyitu yili yakusosekwa mwamti yikusasaka ndaŵi jetu. Nambo ana yindu yeleyi mpaka yikomboleche kutusokonasya? Yeleyi mpaka yitendekwe naga tukutamila kuyiganichisya mnope mpaka kwika pakutumalila machili getu.

⁵ Konjechesya pelepa, ŵajinji mwa m’weji tukutama ku madela gele yikusaŵa yakusawusya kupata mbiya, kukutendekwa yachiwawa kapenasoni kwana milili. (2 Tim. 3:1) Patusimene ni yindu mpela yeleyi, tukusatanda kulagasika nganisyo ligongo lyakuti tukusayiganichisyaga ndaŵi syosope.

⁶ Kombolekasoni kuti tukwamanyilila ŵandu ŵane ŵele umi wawo wachenjile mnope ligongo lyakuti ŵasimene ni yakusawusya mpela yeleyi. Jemanjaji pakuganichisya yindu yayatendechele, akusalagasikaga mnope nganisyo. Yehofa nganatupanganya ni chakulinga chakuti tusimaneje ni yindu yakulagasya nganisyo. Ni ligongo lyakwe yili yangasimonjesya kuti ŵandu ŵane, akusayiwona kuti yakusawusya yeleyi yikwatendekasya kuti akasangalalaga ni umi mpela muŵasachilaga. Yakuyichisya yakwe, jemanjaji akusamalila ndaŵi jawo pakutenda yakusangalasya pakusaka kuliŵalila yakusawusyayi. Ana m’weji tukusosekwa kutenda wuli naga tuli mu ndamo mpela jeleji? Kwende tulole yaŵatesile Yesu kuti akombole kupitilisya kumtumichila Yehofa atamose kuti jwasimene ni yindu yayikamsokonasisye.

YAŴATESILE YESU KUTI AKOMBOLE KUMALANA NI YINDU YAYIKAMSOKONASISYE

7. Ana ni yindu yapi yayikamsokonasisye Yesu?

⁷ Papali yindu yejinji yayikamsokonasisye Yesu. Yine mwa yinduyi yaliji mpela yayatendekwaga mu dela jaŵatamaga soni ngani sya ndale. Pandaŵijo papali ŵandu ŵajinji ŵakulaga soni ŵakulwala. (Mat. 14:14; Mak. 14:7) Jemanjaji ŵalagaga ni yindu yangali chilungamo yaŵatendelaga Aloma soni Ayuda achimjawo. Myoyo, ŵandu paŵayiweni kuti Yesu akwete machili soni kuti akutenda yakusimonjesya, ŵasakaga kuti amŵiche kuŵa mwenye jwawo. (Yoh. 6:​14, 15) Konjechesya pelepa, Satana jwalimbanaga mnope ni Yesu. Jwalakwe jwasakaga kumtendekasya Yesu kuti akuye matala gakata ni chakulinga chakuti aŵe mwenye. (Mat. 4:​8, 9) Nambosoni pandaŵi jine, ndumetume Petulo juŵaliji mjakwe jwa Yesu ŵamsalile jwalakwe kuti, “Alitendele chanasa Ambuje.” Petulo jwaŵechete maloŵega pakusaka kumtendekasya Yesu kuti atende yindu yakuti akasimana ni yakusawusya.—Mat. 16:​21, 22.

8. Ana Yesu jwamalene chamti uli ni yindu yayikamsokonasisye?

⁸ Ana Yesu jwakombwele chamti uli kulimbana ni yindu yayikamsokonasisyeyi? Pana yindu yitatu yaŵatesile. Chandanda, jwalakwe jwayiwonaga yindu mpela mwakusayiwonela Yehofa. (Yoh. 8:28; 14:9) Chaŵili, jwatanganidwaga ni masengo gakulalichila soni kwajiganya ŵandu. (Mat. 9:35) Pele chatatu, jwamanyililaga yayaliji yakusosekwa mnope. (Yoh. 4:34) Mwakulimba mtima jwalakwe jwakanile pandaŵi jele Satana ŵamlingaga. Yesu jwamanyilile kuti Petulo jwasakaga kumkamuchisya nambo gamba kuti yaŵaŵechete yaliji yakulekangana ni yaŵasakaga Yehofa. (Mat. 4:10; 16:23) Yesu nganakunda kuti yaŵasakaga soni yaŵaŵechetaga ŵandu yimlepelekasye kutenda yaŵasakaga Mlungu. Masiku agano yindu yampaka yitusokonasye patukumtumichila Yehofa mpaka yiŵe yakulekangana ni yaŵasimene nayo Yesu. Nambo naga tukutenda yindu yitatu yaŵatesile Yesu, mpaka tukombole kumalana ni yindu yampaka yitusokonasye.

ANA MPAKA TUMALANE CHAMTI ULI NI YINDU YAKUSOKONASYA?

9. Ana lilemba lya Aefeso 5:17 likutusalila kuti tutendeje chichi?

⁹ Tuyiwoneje yindu mpela mwakusayiwonela Yehofa. Kutenda yeleyi mpaka kutukamuchisye kuti “ndaŵi jilijose tumanyilileje yakusaka Yehofa.” (Aŵalanje Aefeso 5:17.) Mpaka tumanyilile yakusasaka Yehofa naga tukusaŵalangaga Maloŵe gakwe soni kuganichisya yatuŵalasileyo. Atamose yili mkuti Baibulo nganijisala yindu yakulandana ni yatusimene nayo, mpaka yikomboleche kumanyilila yakusaka Yehofa. Mwamti uli? Naga tukusalijiganya Baibulo ni chakulinga chakuti tumanyilile mwakusayiwonela yindu Yehofa pa ngani syakulekanganalekangana soni kutendaga yindu mwakamulana ni yatulijiganyisyeyo.

10. Ana mpaka tumanyilile chamti uli nganisyo sya Yehofa?

¹⁰ Mpaka tumanyilile mwakusaganichisya Yehofa patukulijiganya Baibulo soni patukuganichisya muŵatendelaga yindu ni ŵandu. (Yel. 45:5) Patukuŵalanga nganisi, tuliwusyeje kuti, ‘Ana nganiji jikunjiganya chichi pakwamba Yehofa? Ana mpaka ngamulichisye masengo mwamti uli yambalasileyi kuti nayiwoneje yindu mpela mwakusayiwonela Yehofa?’ Yili yisyene kuti Yehofa ali jwalunda mnope kutupunda ŵanduwe. (Yes. 55:9) Myoyo, tukusasosekwa kumŵenda Yehofa kuti atujiganye kutenda yakusasaka. (Sal. 143:10) Tukusosekwa tumŵendeje kuti atukamuchisyeje kuyiwona yindu mpela mwakusayiwonela jwalakwejo.—1 Yoh. 5:14.

11. Ana Yehofa akusasaka kuti tutendeje chichi?

¹¹ Patukulijiganya mwakusaganichisya Yehofa, tukusamanyilila kuti jwalakwe akusasaka kuti tuŵambaleje yindu yampaka yitusokonasye. Yeleyi yikusatukamuchisyasoni kuti tukombole kosechela mbesi ja chilambochi. (Mat. 24:44) Yehofa ngakusasaka kuti tudandawuleje mnope ni yindu yayikutendekwa. (Mat. 6:​31, 32) Myoyo, patutandite kulagasika nganisyo ligongo lya ulwele, masengo kapena yakusawusya yine yatukusimana nayo, Yehofa akusatukamuchisya kumanyilila yatukusosekwa kutenda. Jwalakwe akusasaka kuti tumdalileje ni chakulinga chakuti tupate lunda soni machili gakutukamuchisya kupilila yakusawusya yatukusimana nayo.—Sal. 55:22; Mis. 3:​5-7.

12. Ana tukusosekwa kutenda chichi kuti tukadandawulaga mnope ni yindu yayikutendekwa pachilambopa? (Mateyu 5:3)

¹² Tulipelecheje mnope pakumtumichila Yehofa. Wosopewe tukusadandawula ligongo lya yindu yakusakala yayikutendekwa pachilambopa. Nambope, nganituŵa tukombwele kuyilekasya yindu yeleyi kuti yikatendekwaga. Ni kuti yindu yeleyi yikatusokonasya, tukusosekwa tulipelecheje mnope pakumtumichila Yehofa. Patukutenda yampaka tukombole kuti tuŵe pa unasi wambone ni Yehofa tuchiŵa ŵakusangalala yisyesyene. Yili myoyo ligongo lyakuti Yehofa ŵatupanganyisye ni mtima wakusaka kummanyilila jwalakwejo. (Aŵalanje Mateyu 5:3.) Mpaka tummanyilile Yehofa patukuŵalanga Maloŵe gakwe Baibulo. Nambosoni patukulipeleka mnope pa utumiki uliwose wampaka tupochele. Yehofa chachiŵa jwakusangalala mnope patukutenda yeleyi, soni yichiŵa kuti tukamulichisya masengo ndaŵi jetu mwalunda.—Mis. 23:15.

13. Ana mpaka tutende wuli kuti ‘tukamulichisyeje masengo chenene ndaŵi jetu’?

¹³ Aklistuwe tukusatenda yampaka tukombole kuti ‘tukamulichisyeje masengo chenene ndaŵi jetu.’ (Aef. 5:​15, 16) Lilembali ngalikusagamba kusala yatukusatenda pakukamulichisya masengo ndaŵi jetu pa masengo ga lisiku ni lisiku. Mmalomwakwe, likusatulimbikasya kuti tuganichisyeje yatukusatenda pakamulichisya masengo ndaŵi jetu, Yehofa mkanaŵe konanga chilambochi. Ana mpaka tutende uli kuti tukamulichisyeje masengo chenene ndaŵi jetu? Naga tukusatamila kulolela soni kuŵalanga ngani syakusala yindu yakusakala, nganisyo mpaka situsokonasye soni kututendekasya kuti tuleche kulipeleka pakumtumichila Yehofa. Myoyo, mpaka tutende chenene kunandiya ndaŵi jatukusamalila pakulolela soni kuŵalanga nganisi. Kutenda yeleyi mpaka kutukamuchisye kuti tuŵambale kulagasika nganisyo soni kuti tukole ndaŵi jakwanila jakutendela yindu yausimu. Mpaka tuganichisyesoni yakonjechesya yatukusatendaga patuli mu utumiki mpela kukola maulendo gakuwilisya gejinji. Tukusamanyilila kusosekwa kwakukamulichisya masengo mpata uliwose wawupatikene pakwakamuchisya ŵandu kuti “akulupuche ni kuŵa ŵakumanyilila chenene yayili yisyesyene.”—1 Tim. 2:4.

14. Ana kutanganidwa mnope ni kumtumichila Yehofa mpaka kutukamuchisye chamti uli? (Alolesoni chiwulili.)

¹⁴ Patukutanganidwa mnope pakumtumichila Yehofa, yikusatukamuchisya kuti tukaliŵalila ligongo lyakwe yindu yakusakala yikutupa mnope pachilambopa. Ngatukusatendaga woga patukuyiwona yindu yachiwawa, usawuchi nambosoni milili yili mkutendekwa. Tukusamanyilila kuti yeleyi yikukwanilisya yakulochesya ya m’Baibulo. Yehofa chamasye yindu yeleyi ni kuyikasya chilambo chasambano. Myoyo, patukwembecheya ndaŵi jeleji, tumanyilileje kuti jwalakwe chatukamuchisyeje kuti tukombole kupilila. Yeleyi, yitutendekasyeje kuti tukadandawulaga mnope.—Sal. 16:8; 112:​1, 6-8.

15. Ana kuŵa “ŵaganisya chenene” mpaka kutukamuchisye mwamti uli? (1 Petulo 4:7)

¹⁵ Tumanyilileje yindu yayili yakusosekwa mnope. Ŵandu ŵajinji ku chilamboku akusamalila ndaŵi jawo ali mkutenda yakusangalasya soni ngakusayikosya kuti mbesi ja chilambochi chijiyiche pachangakaŵapa. Yili yisyene kuti kutenda yakusangalasya kuli kwambone. Nambope tukusosekwa ‘tuŵeje ŵaganisya chenene’ kuti tukajigalila kaganisye ka ŵandu ŵa ku chilamboku. (Aŵalanje 1 Petulo 4:7.) Ana kuŵa ŵaganisya chenene mpaka kutukamuchisye mwamti uli? Mpaka kutukamuchisye kuti tusaguleje yindu mwalunda ni kuŵambalaga kumalila ndaŵi jetu jejinji tuli mkutenda yakusangalasya. Yindu yampaka tusaguleyo mpaka yilosye kuti tukumanyilila yakusasaka Yehofa soni yindu yayili yakusosekwa mnope.—2 Tim. 1:7.

16. Ana Yesu jwaganichisyaga mnope ya chichi pajwasigele panandi kuwulajidwa?

¹⁶ Ndaŵi syosope Yesu jwamanyililaga yindu yakusosekwa mnope. Atamose chilo cha lisiku lyaŵawulajidwe, jwalakwe jwamanyililaga kuti chindu chakusosekwa mnope chili kuŵa jwakulupichika soni kutenda yaŵasakaga Yehofa. Ni ligongo lyakwe, jwalakwe jwapopesile mwakuwilisyawilisya. Mwakulekangana ni ŵakulijiganya ŵakwe ŵaŵagonaga, Yesu jwapitilisye kuŵa mesope. Ŵakulijiganyaŵa ŵagonaga ligongo lyakuti “chakamwile chanasa.”—Luk. 22:​39-46; Yoh. 19:30.

17. Ligongo chichi ŵandu ŵajinji akusakamulichisya masengo malo gakunguluchila ga pa Intaneti? Ana maloga mpaka gasokonasye chamti uli? (Alolesoni chiwulili.)

¹⁷ Mwakulandana ni ŵakulijiganya ŵa Yesu, m’wejisoni ndaŵi sine mpaka tulagasiche nganisyo. Mpaka tutande kudandawula mnope ligongo lya yindu yayikutendekwa masiku gambesi gano. Ŵandu ŵajinji pakusaka kuti aleche kudandawula ni yindu yeleyi, akusamalila ndaŵi jawo ali pamalo gakunguluchila ga pa Intaneti. Jemanjaji akusakamulichisya masengo maloga pakunguluka ni achimjawo, kutumichisyana yiwulili soni kwasalila ŵane yindu yayatendechele pa umi wawo. Jemanjaji akusasangalalasoni pakulolela mafidiyo soni kung’anda magemu. Nambo chakutesya chanasa chili chakuti jemanjaji akusamalila ndaŵi soni machili gawo pakulola yindu yasambano yaŵisile ŵane. Myoyo, pakusaka kutukamuchisya kuti tukamulichisyeje chenene malo gakunguluchilaga, tukusosekwa kuliwusya kuti, ‘Ana ngusakamulichisya masengo malo gakunguluchila ga pa Intaneti pakusaka kuliŵalila yayikundendechela pa umi? Ana maloga ngagakunjonanjila ndaŵi jakutendela yindu yakusosekwa mnope?’

18. Ligongo chichi tukusosekwa kuŵa ŵaganisya chenene patukusagula yakusangalasya?

¹⁸ Kuŵa ŵaganisya chenene kuli kwakusosekwa mnope patukulolela mafidiyo pa Intaneti soni patukung’anda magemu. Yili yisyene kuti yindu yeleyi yili yakusangalasya soni mpaka yitukamuchisye patukulagasika nganisyo. Nambope, tukusosekwa tusaguleje mwalunda mafidiyo gatukusosekwa kulolela soni tuliŵichileje ndaŵi jatukusosekwa kumalila tuli mkutenda yeleyi. Mafidiyo gane gakusaŵa gambone nambo mundu pakupitilisya kulolela mafidiyoga mwapanandipanandi mpaka atande kulolela mafidiyo gakulimbikasya yachiwawa kapena yachikululu. Yeleyitu ni yayamtendechele m’bale jwine jwa ku Asia. Pandanda m’baleju jwanonyelaga kulolela tumafidiyo twa maminisi gamnono pa Intaneti. Nambo ligongo lyakuti jwamalilaga ndaŵi jejinji ali mkulolela mafidiyoga, mwapanandipanandi jwatandite kulolela mafidiyo gakulimbikasya yachikululu. Kaneko, jwatandite kulolela yakuŵagula. Mwaupile achakulungwa ŵa mumpingo soni achimjakwe ŵapamtimaŵa ŵamkamuchisye. M’baleju jwakombwele kumalana ni ndamoji mwamti jwatyosisye mu foni jakwe pologalamu jiŵakamulichisyaga masengo pakulolela mafidiyo gala. Jwalakwe jwaliŵichilesoni ndaŵi jakuti amalileje pali pa foni. Yayamtendechele m’baleju yikutukamuchisya kumanyilila kusosekwa kwakuŵa ŵaganisya chenene patukusagula yakusangalasya.

19. Ana mpaka chitendekwe chichi naga tukusamalila ndaŵi jejinji pakutenda yakusangalasya?

¹⁹ Tukusasosekwasoni kusagula yindu mwalunda patukuganichisya yampaka tutende pandaŵi jatupite kukupumula. Wosopewe tukusasosekwa kupata ndaŵi jakutenda yakusangalasya soni jakupumula. Mwamti yeleyi yikusatukamuchisya kuti tukole chilu chambone. Nambo naga tukusamalila ndaŵi jelewu tuli mkutenda yakusangalasya, yakuyichisya yakwe yindu yeleyi mpaka yitumalileje ndaŵi jakutendela yindu yakusosekwa mnope. (Afil. 1:10) Myoyo, patukusagula yatukusaka kutenda pandaŵi jakupumula, tukusosekwa kuganichisyasoni ndaŵi jampaka tumalile patukutenda yinduyo. Ni mpaka tuliwusye kuti, ‘Ana ndaŵi jampaka malile pakupumula soni kutenda yakusangalasya, yikusalosya kuti ndili jwaganisya chenene? Ana ngusalolechesya kuti nguŵika pandanda yindu yakusosekwa mnope? Ana ngosechele “mbesi ja yindu yosope”?’

20. Ligongo chichi ngatukusosekwa kunda chilichose kutusokonasya?

²⁰ Yindu mpaka yitujendele chenene pa umi wetu naga ngatukusakunda kuti chilichose chitusokonasyeje patukumtumichila Yehofa. (Yes. 48:17) Ni chikamuchisyo cha Yehofa, mpaka tukombole kupilila yakusawusya yampaka tusimane nayo. Nambosoni nganituŵa tudandawile mnope ni yindu yayikutendekwa pachilambopa. Mpaka tuŵambalesoni kukamulichisya masengo ndaŵi jetu jejinji pakutenda yakusangalasya. Myoyo, kwende tupitilisye kuyiwona yindu mpela mwakusayiwonela Yehofa. Tulipelecheje mnope pakumtumichila Yehofa. Nambosoni, ndaŵi syosope tumanyilileje yayili yakusosekwa mnope. Naga tukutenda yeleyi tuchikombola kumalana ni yindu yampaka yitusokonasye. Nambosoni ‘tuchikamula mwamachili chembecheyo cha umi usyesyene.’—1 Tim. 6:19.