Yakutendekwa

Kwalosya Chanasa Ŵandu Wosope

Lisiku line, mlongo jwine jwa ku New Zealand jwalolelele fidiyo ja mtwe wakuti, ‘Tusamalilaneje Jwine ni Mjakwe,’ jajikusasala kuti Yehofa jwangagamba kola chanasa nambo akusalosya chanasacho. (Yes. 63:​7-9) Kaneko, mlongoju jwalinganyisye yakukamulichisya masengo yajwalijiganyisyeyi. Palisiku lilili mlongoju pajwajawulaga kukusuma yindu ku golosale, jwasimene ni jwamkongwe jwakulaga, mwamti ŵamsalile kuti chakamsumile yakulya. Jwamkongwejo jwakundile. Mlongojo paŵampaga yakulya yila jwamlalichile jwamkongwejo pakamulichisya masengo kapepala kakuti Ana Yakusawusya Yichimala?

Jwamkongwejo jwatandite kulila. Jwasasile kuti jwakulile m’liŵasa lya Mboni sya Yehofa nambo jwalesile kumtumichila Yehofa yaka yejinji yipiteyo. Jwamkongweju jwaliji ali agambile kupopela kwene kwa Yehofa kuti amkamuchisye kuwujila kwa jwalakwe. Mlongo jula jwampele Baibulo jwamkongwejo mwamti jwalinganyisye yakuti amjiganyeje Baibulo.a

Mpela mwakusatendela Yehofa, m’wejisoni tukusosekwa kwalosya chanasa ŵane kupwatikapo ŵachinasi ŵetu soni Aklistu achimjetu. Mpaka tulosyesoni chanasa mwakwalalichila ŵane.