Ana Sogolo Jawo Jikusadalila Yindu Yapi?
Ŵandu ŵajinji akusakulupilila kuti pana machili ganegakwe gangawoneka gagakusigakamuchisya kola sogolo jambone. Mwakamulana ni yakusakulupililayi akusatenda yindu yakuyiwona kuti mpaka yakamuchisye kola sogolo jambone.
YAKUSAKULUPILILA ŴANDU ŴAJINJI
KULUPILILA NDONDWA: Ŵandu ŵane akusakulupilila kuti yasyatite ndondwa pakujalana kwinani palisiku lya ŵapagwaga yikusakwaya sogolo jawo. Jemanjaji akusajawula kwa ŵandu ŵakusalola mwasikusajendela ndondwa kuti amanyilile yayichatendechela paumi. Pamanyilile akusalola yampaka atende kuti akasimana ni yakusawusya.
FENG SHUI: Ŵandu ŵane akusakulupilila kuti kataŵe soni kasalalisye ka nyumba jawo ni kampaka katendekasye kuti yindu yajendeleje chenene. Lo Winga,a jwa ku Hong Kong jwatite, “Mundu jwine jwakumanyilila chenene kakamulichisye masengo ka feng shui (yindu yakwayana ni kukulupilila misimu) jwasalile kuti mbicheje chenene tumaganga twinetwakwe mu golosale jangu, ni chakulinga chakuti mbateje mbiya syejinji.”
KUTINDIŴALILA ACHINANGOLO ŴAŴAWILE: Ŵandu ŵane akusakulupilila kuti kwatindiŵalila achinangolo ŵaŵawile mpaka kwakamuchisye kuti akasimanaga ni yakusawusya soni kuti apateje upile. Van jwakusatama ku Vietnam jwasasile kuti, “Nakulupililaga kuti kwatindiŵalila achinangolo ŵaŵawile mpaka kungamuchisye une ni ŵanache ŵangu kuti tusangalaleje soni kuti tukole sogolo jambone.”
MUNDU PAWILE AKUSAPAGWASONI: Ŵajinji akusakulupilila kuti naga mundu awile chakapagwe kwinekwakwe, naga kweleko akuwasoni nikuti chakapagwesoni kwine. Jemanjaji akusakulupililasoni kuti yakusasimana nayo mundu yili yakuyichisya ya yindu yaŵatendaga mkanawe ni kupagwasoni.
Atamose kuti ŵandu ŵajinji akusati ŵangakulupilila yeleyi, nambope jemanjaji akusatenda yisango pakamulichisya masengo makadi, ligalasi, manambala, ndondwa soni yindu yine. Akusatenda yeleyi pakusaka kumanyilila yindu yayichatendechela msogolo.
ANA YINDU YELEYI YILI YAKAMUCHISYA?
Ana ŵandu ŵakusatenda soni kulupilila yeleyi akwete umi soni sogolo jambone?
Aganichisye yayamtendechele Hào jwa ku Vietnam. Kuti yindu yimjendeleje chenene, jwalakwe jwakulupililaga ndondwa, jwakamulichisyaga masengo feng shui soni jwatindiŵalilaga achinangolo ŵaŵawile. Nambo ana yeleyi yamkamuchisye? Jwalakwe jwatite, “Bisinesi jangu jagwile, nakwete ngongole, liŵasa lyangu nganilijendaga chenene soni nalagaga nganisyo.”
Nombenajo Hazi jwa ku Taiwan jwakulupililaga kuti mundu pawile akusapagwasoni, jwakulupililaga ndondwa, jwakamulichisyaga masengo feng shui soni jwatindiŵalilaga achinangolo ŵaŵawile. Nambo panyuma pakuwungunya chenene jwalakwe jwatite, “Namanyilile kuti yikulupiyi yikusasisyana yisyene soni yili yakusokonasya. Nayiweni kuti ndaŵi syejinji yakusasala ŵakulupilila ndondwa yili yaunami. Pakwamba yakuti mundu pawile akusapagwasoni, naliwusyaga kuti naga mundu ngakukumbuchila yaŵatendaga mkanawe, ana mpaka achenje uli ni kutendaga yambone papagwilesoni?”
“Namanyilile kuti yikulupiyi yikusasisyana yisyene soni yili yakusokonasya.”—HAZI JWA KU TAIWAN
Hào, Hazi soni ŵane ŵajinji ŵayiweni kuti ndondwa, achinangolo ŵaŵawile soni chikulupi chakuti mundu pawile akusapagwasoni nganiyiŵa yitukamuchisye kumanyilila ya msogolo. Nambo ana yeleyi yikugopolela kuti pangali champaka tutende kuti tukole sogolo jambone?
Ŵandu ŵane akusaganisya kuti naga mwalijiganyisye mnope soni naga mli ŵakusichila nikuti mkwete sogolo jambone. Nambo ana ŵane ŵaŵasagwile kutenda yeleyi ŵasimene ni yamtuli?
a Mungani ajino soni jakuyichisya mena gane tuchenjile.
b Maloŵega gakusasimanikwa m’Baibulo pa Agalatiya 6:7. Sonitu gali gakamulana ni mwakusaŵechetela ŵandu ŵane ŵa ku Asia kuti, “Pampandile matikiti timchigowola matikiti, pampandile mbwanda timchigowola mbwanda.”