Ligongo Chichi Mapopelo Gane Mlungu Jwangajanga?
Yehofa Mlungu jwali Atati ŵetu Ŵakwinani, ali ŵakusachilila soni akusasangalala kupikana mapopelo getu gakutyochela pasi pamtima. Nambope pana yindu yine yayikusamtendekasya kuti akajangaga mapopelo getu. Ana yindu yakwe mpaka yiŵe yapi? Nambosoni ana tukusosekwa kumbuchilaga chichi patukupopela? Kwende tulole yajikusasala Baibulo pangani ja mapopelo.
“Pimkupopela, mkasimgambaga kuwilisyawilisya.”—Mateyu 6:7.
Yehofa jwangasakaga kuti tujinjisyeje pamtima lipopelo kapena tutendeje kuŵalanga m’buku. Mmalo mwakwe, akusasaka kuti tupopeleje kutyochela mumtima. Tuwanichisye kuti akwete mjawo nambo pakuŵechetana najo akusagamba kuŵecheta yakulandana lisiku lililyose. Ana mpaka yasangalasyeje? Ŵandu ŵakusakamulana akusaŵechetana mwagopoka soni mwakutyochela pasi pamtima. Patukupopela m’maloŵe getu kwa Atati ŵetu ŵakwinani tukusalosya kuti jwalakwe ali mjetu jusyesyene.
“Jemanja wangapochela kutyochela kwa Mlungu atamose kumŵenda ligongo akusamŵenda mwa ulemwa.”—Yakobo 4:3.
Tukajembacheyaga kuti Mlungu mpaka ajanje mapopelo getu naga tukusamŵenda yindu yakusatulekasya kutenda kapena kola. Mwachisyasyo, naga mundu jwakuchesa juga akupopela kuti Mlungu amkamuchisye kuti awineje, Mlungu ngaŵa mkwanga lipopelo lyakwelyo. Ligongo Baibulo jikusatusalila mwakupikanika kuti Mlungu akusaŵengana ni kunonyela mnope mbiya. (Yesaya 65:11; Luka 12:15) Yehofa jwangajanga mapopelo mpela gelega. Kuti Mlungu ajanjeje mapopelo getu tukusosekwa kupopelaga mwakamulana ni yakusatusalila jwalakwe m’Baibulo.
“Mundu naga ali mkana kugapikanila malamusi, atamose lipopelo lyakwe lyene likusilinyalaya Yehofa.”—Misyungu 28:9.
Baibulo jikusalosya kuti kalakala Mlungu nganajangaga mapopelo ga ŵandu ŵaŵakanaga kukuya matala gakwe ga chilungamo. (Yesaya 1:15, 16) Nganisyo sya Mlungu nganisichenga. (Malaki 3:6) Naga tukusaka kuti Mlungu ajanjeje mapopelo getu, tukusosekwa kupikanilaga malamusi gakwe. Nambi uli naga twamlemwechesye Mlungu munyumamu? Ana yeleyi yikugopolela kuti Yehofa ngasapikanilasoni mapopelo getu? Iyayi! Mwachinonyelo, Mlungu mpaka atukululuchile yatwalemwisye naga tugalawiche mtima, soni tukulingalinga kutenda yindu yakumsangalasya.—Masengo 3:19.