Mwesi wa Sepetemba Tuchikamula Masengo Gapajika Gakutandisya Majiganyo ga Baibulo

Mwesi wa Sepetemba tukamule masengo gakutandisya majiganyo ga Baibulo pa nyumba jilijose, pakamulichisya masengo kabuku ka Asangalaleje Mpaka Kalakala. Ŵakulalichila mpaka asagule kutenda upayiniya wakamuchisya wa maawala 30. Nambo ana tukamule chamtuli masengoga?

• Paulendo wandanda: Pakusaka kumtendekasya lung’wanu msyenenyumba, akamulichisye masengo yayili papeji jakumalisya ja kabukuka. Nambosoni amlosye mwatukusatendela lijiganyo lya Baibulo. Ŵajendelesoni ŵandu ŵaŵalosisye kuti akusaka kumanyilila yejinji kupwatikapo maulendo gawo gakuwilisya. Komboleka ŵane mwajemanjaji pakwete paŵakanile kulijiganya Baibulo, nambo mwine paulendo awuno mpaka akunde ligongo lya kabukuka soni litala lyasambano lyatukukamulichisya masengo pakwiganya. Ngatukusosekwa kuleka kabukuka pamlango wele nganitwasimana ŵandu kapena kwatumichisya payikalata ŵandu ŵele nganalosya lung’wanu. Kombolekasoni Komiti ja Utumiki ja Mpingo kulinganya yakuti akosecheleje kwinjila mu utumiki mkati mwa mwesiwu.

• Matala gane: Naga mpingo wawo ukusakamulichisya masengo mashelefu, akusosekwa kuŵika kabuku ka Asangalaleje Mpaka Kalakala pakuwonechela chenene. Ŵasalileje ŵandu ŵapochele kabukuka kuti mpaka alijiganye Baibulo kwalulele. Ŵalosyeje mwatukusatendela lijiganyo lya Baibulo kapena mpaka akamulane kuti atende yeleyi pandaŵi jine. Jwakulolela utumiki mpaka asagule ŵakulalichila ŵachisyasyo chambone kuti akatandisye majiganyo ga Baibulo kwa ŵandu ŵakutenda mabisinesi mudela jawo. Mpaka atandisyesoni lijiganyo lya Baibulo kwa ŵandu ŵakusakamula nawo masengo soni ŵaŵalalichile mwaupile.

Yesu ŵatulamwile kuti ‘tukajiganye ŵandu’ kuti aŵe ŵakulijiganya ŵakwe. (Mat 28:19, 20) Kwende tukamulichisye masengo kabuku ka Asangalaleje Mpaka Kalakala kuti tukwanilisye yaŵatulamwile Yesuyi.