Alosyeje Chinonyelo Mwiŵasa Mwawo

Chinonyelo chili guluu soni ni chachikusalimbisya liŵasa. Naga ŵandu ngakusanonyela mliŵasa yikusatendekasya kuti ŵandu akakamulanaga soni mtendele usoŵeje. Ana achalume, achakongwe soni achinangolo mpaka alosye chamtuli kuti akusanonyelana mwiŵasa?

Jwamlume jwachinonyelo akusaganichisya mnope yakusosechela ya ŵamkwakwe. (Aef. 5:28, 29) Jwalakwe akusalipatila liŵasa lyakwe yindu yakusosechela soni akusalikamuchisya kuti liŵe paunasi wambone ni Yehofa. Akusatenda yeleyi mwakukola ndandanda jambone jakutendela Kulambila kwa Peŵasa. (1 Tim. 5:8) Jwamkongwe jwachinonyelo akusiŵapikanila ŵamkwakwe soni ‘akusiŵachimbichisya mnope.’ (Aef. 5:22, 33; 1 Pet. 3:1-6) Jemanjaji akusasosekwa kuti akululuchilaneje jwine ni mjakwe. (Aef. 4:32) Achinangolo ŵachinonyelo akusalosya chidwi kwa ŵanache ŵawo soni akusiŵajiganya kuti amnonyeleje mnope Yehofa. (Det. 6:6, 7; Aef. 6:4) Ana ni yakusawusya yapi yakusasimana nayo ŵanache ŵawo kusukulu? Ana akusatenda wuli kuti akagambaga kujigalika ni yitendo ya achimjawo? Naga ŵandu akusanonyelana mwiŵasa ni kuti jwalijose chachiŵa jwakusangalala soni pangali jwampaka atendeje woga.

ALOLELE FIDIYO JAKUTI, TULOSYEJE CHINONYELO CHANGAMALA MWIŴASA MWETU, KANEKO AJANJE YIWUSYO AYI:

• 

  Ana jwamlume jwachinonyelo akusalosya chamtuli kuti akusiŵaganichisya ŵamkwakwe?

• 

  Ana jwamkongwe jwachinonyelo mpaka alosye chamtuli kuti akusiŵachimbichisya mnope ŵamkwakwe?

• 

  Ana achinangolo ŵachinonyelo mpaka ŵakamuchisye chamtuli ŵanache ŵawo kuti aganonyeleje mnope Maloŵe ga Mlungu?