Asangalaleje Pakulalicila Ngani Syambone

Ana pakwete paŵalasile kuti alalicile? Ŵajinji mpaka tujanje kuti elo pa ciwusyoci. Ligongo cici? Komboleka ndaŵi syosope tukusasimana ni ŵandu ŵangali lung’wanu soni ŵakusisya mu mkuli wetu kapena tukusatenda woga kwalalicila ŵandu ŵacilendo. Yindu yeleyi mpaka yinondiye cisangalalo cetu. Nambope, tukusalambila Mlungu jwacisangalalo jwakusasaka kuti tumtumicileje mwakusangalala. (Sal. 100:2; 1 Tim. 1:11) Ana magongo gatatu gapi gakututendekasya kusangalala patukulalicila?

Candanda, tukusasala utenga wacembeceyo. Atamose kuti cembeceyo cikunondipa macili mwa ŵandu masiku agano, mpaka tukombole kwayika pamtima ŵandu ni “ngani syambone sya yindu yambone.” (Yes. 52:7) Nambo ngani syambone sya Ucimwene wa Mlungu mpaka situtendekasyesoni kuŵa ŵakusangalala. Mkanitujawule kukulalicila, tuganicisyeje kaje ya majali gagaciyika pacilambo capasi ligongo lya Ucimwene wa Mlungu.

Caŵili, ngani syambone syatukusalalicila sikusakamucisya ŵandu mwakucilu soni mwausimu. Palijiganyisye akusaleka yitendo yawo yakusakala kaneko akusakola cembeceyo ca umi wangamala. (Yes. 48:17, 18; Alo. 1:16) Tukusosekwa tuganicisyeje mnope ya masengo gakusosasosa soni kulupusya. Atamose kuti ŵandu ŵane ŵangasaka kuti cakulupuce, tukusajendelecela kusosasosa ŵakusaka kulupuka.—Mat. 10:11-14.

Catatu, soni cakusosekwa mnope, masengo getu gakulalicila gakusamcimbicisya Yehofa. Jwalakwe akusayamicila mnope masengo gakulalicila gatukusakamula. (Yes. 43:10; Ahe. 6:10) Konjecesya pelepa jwalakwe akusatupa mwakoloŵa makono msimu wakwe weswela kuti tukombole kamula masengoga mpaka kumbesi. M’yoyo, am’ŵendeje Yehofa cisangalalo, cacili mbali ja cisogosi ca msimu weswela. (Aga. 5:22) Ni cikamucisyo cakwe, mpaka tumalane ni yampaka yitutengusye ni kulalicilaga mwakulimba mtima. (Mase. 4:31) Mwangasamala kandu ya mwakusawuwonela utenga wa ngani syambone mu mkuli mwetu, tuciŵa wakusangalala pa masengo getu gakulalicila.—Ezek. 3:3.

ALOLELE FIDIYO JAKUTI KUTANDILASONI KUSANGALALA MWAKULIJIGANYA SONI GANICISYA MWAKUSOKOKA, KANEKO AJANJE YIWUSYO YAKUYICISYAYI:

• Ligongo cici kulijiganya kukusosekwa kuŵeje pamalo gandanda, atamose kuti tukusamalila ndaŵi jelewu tuli mkulalicila mwesi uliwose?

• Ana mpaka tumsyasye Maliya camtuli?

• Ana ndaŵi japi jajili jambone kwa wawojo jaganicisya mwakusokoka Maloŵe ga Mlungu?

• Ana cici cacikusatendekasya kusangalala pakulalicila ngani syambone?