Akamulicisyeje Masengo Yayili mu Buku ja Baibulo Jikusajiganya Cici Mwakamula Mtima

Naga ŵatukusalijiganya nawo Baibulo akamulicisya masengo yajikusajiganya Baibulo cacijawula pasogolo soni caciŵeleka yisogosi yausimu. (Sal. 1: 1-3) Mpaka tumkamucisye jwatukusalijiganya najo Baibulo kwawula pasogolo mwakamulicisya masengo cenene yine mwa yindu yayili mu buku ja Baibulo Jikusajiganya Cici.

Yiwusyo Yayili Kundanda: Mtwe uliwose ukutanda ni yiwusyo yayikwanjidwa m’lijiganyolyo. Komboleka kuwusya yiwusyoyi pakusaka kuti jwakulijiganyajo akole lung’wanu mnope ni yacatagulilaneyo. Kombolekasoni kum’ŵenda kuti ajanje mwakata ciwusyo cilicose. Naga ajanjile yakulemweceka ngakusosekwa kumjongolela pandaŵi jeleji. Yacajanjeyo yicakamucisya wawojo kumanyilila yindu yakusosekwa kuyitagulila cenene kapena kuyigombelecesya.—Miy. 16:23; 18:13.

Yakonjecesya: Naga jwakulijiganyajo apikanicisye soni akwikutila ni yalijiganyisye pandimejo, komboleka kwamba kumlimbikasya kuti alilolele jika yakonjecesya yayikamulana ni nganijo. Palijiganyo lyakuyicisya, mwakata komboleka kulola naga apikanicisye yalijiganyisye kutyocela ku yakonjecesyayo. Nambo naga akuwona kuti mpaka yimkamucisye mnope pakulijiganyapo kombolekasoni kupata ndaŵi jakutagulilana yakonjecesya mwakuŵalangaga ndime soni kuwusyaga yiwusyo yayikosecele mkanipaŵe.

Libokosi Lyakuwilisya: Kumbesi kwa mtwe uliwose kwana libokosi lyakuwilisya lyalikusajangaga yiwusyo yayili kundanda kwa mtwe. Komboleka kamulicisya masengo libokosili pakusaka kusimicisya naga jwakulijiganyo apikanicisye soni naga mpaka akombole kutagulila songa syekulungwa. Aŵalanjile yalumo ciwundo cilicose pampepe ni malemba gakwe. Kaneko pakamulicisya masengo malemba am’ŵende jwakulijiganyajo kuti atagulile ligongo lyakwe ciwundoco cili cisyesyene.—Mase. 17:2, 3.