Kongolela Katende Ketu ka Undumetume—Mwampaka Tumjanjile Msyenenyumba Jwatumbile Mnope

Ligongo Cici Kuli Kwakusosekwa: Ŵandu ŵajinji ŵatukusasimana nawo mu undumetume akusatucimbicisya. Nambope, Yesu ŵasasile mkanipaŵe kuti ŵane cacituŵenga. (Yoh. 17:14) M’yoyo, ngatukusosekwa kusimonga patusimene ni msyenenyumba jwatumbile mnope. Yeleyi payitendekwe, tukusosekwa kwanga m’litala lyakumsangalasya jwatukumjimila, jwali Yehofa. (Alo. 12:17-21; 1 Pet. 3:15) Kutenda yeleyi kucikamucisya kuti yindu yikayika pakusawusya. Mpaka yikamucisyesoni msyenenyumbajo ni ŵane ŵakulola yayikutendekwayo kuti ciŵapocele cenene ŵa Mboni sya Yehofa ŵane pacaciyika.—2 Akoli. 6:3.

Mwampaka Tutendele:

Tuŵe ŵakuwusimana mtima. Kutenda yeleyi kucikamucisya kuti yindu yikasawusya. Ngatukusosekwa kuyijigalila yakutenda msyenenyumbajo. (Mlal. 7:9) Komboleka kuti jwalakwejo atumbile ligongo lyakuti pana cacikumsawusya kapena ligongo lyakuti tumyicile pandaŵi jangaŵa jambone kwa jwalakwejo. Atamose ali atumbile ni utenga watuyice nawo, ndaŵi syejinji yeleyi yikusatendekwa ligongo lyakuti ŵane amsalile yaunami ya m’weji.—2 Akoli. 4:4.
Twajanjeje mtima uli mmalo, soni ni maloŵe gambone. (Miy. 15:1) Ana msyenenyumbajo agonileje ni ate kumjimusya kapena ate kumlekasya yatesileje? Atamose kuti ngatukusajila pepani kwa ŵandu ligongo lyakuti tukwalalicila, nambo mwakulinandiya mpaka tujile pepani kwa msyenenyumba ligongo lyakumsimana pandaŵi jangaŵajilwa kwa jwalakwejo. Ana kapena msyenenyumbajo atumbile ligongo lya ngani syaunami syapikene syakwamba m’weji? Naga yili m’yoyo, mpaka ajile kuti: “Ngupikanicisya ligongo lyakwe yeleyi mpaka yatumbilikasye. Nambo, yikuwoneka kuti yapikene pakwamba m’weji nganiyiŵa yisyene. Ana cakunde kuti natagulile yisyene yakwe?” Ana akusaŵengana ni yine mwa yikulupi yetu, mpela yakwayana ni kutyosya mundu mumpingo kapena ya miyasi? Mpaka ajile kuti: “Ngwapikanicisya. Ŵanesoni aŵecete yakulandana ni nganisyo syawosi. Ana mpaka nalosye m’Baibulo ligongo lyakwe tukusakulupilila yeleyo?”
Naga mundujo atumbile mnope, mpaka yiŵe cenene kwamba kulanga ngalingasoni kum’janga cilicose. Naga atusalile kuti ngakusakasoni kuti Jwamboni cayice kukumlalicila, tukusosekwa kumsimicisya kuti tucicimbicisya yakusakayo.

Alinje Kutenda Yakuyicisyayi Mwesi Awuno:

Pakulambila kwawo kwa peŵasa, alinjilile mwampaka amjanjile msyenenyumba jwatumbile.
Palekangene ni msyenenyumba jwatumbile, atagulilane ni mundu jwajesile najo yakatesile pakumjanga m’litala lyambone.