Fidiyo Jasambano Jakamucisya Pakutandisya Lijiganyo lya Baibulo

Ŵandu ŵajinji akulolela kafidiyo ka mtwe wakuti, Ligongo Cici Tukusosekwa Kulijiganya Baibulo? pa jw.org. Kafidiyo keleka akapanganyisye mwakwatendekasya ŵandu kusaka kulijinganya Baibulo. Mpaka akasimane mwakwamba kutowanya pamalo pakuti “Aŵende Lijiganyo lya Baibulo” pasi pa peji jandanda ja pa webusayiti jetu, kapena mwakwamba kwambula kaciwulili ka QR (quick response) kakusakajambula pa peji jakumalisya ja tumapepala twetu twasambano. Kwende tulole matala gampaka gatukamucisye kamulicisya masengo kafidiyo keleka.

• Pakutenda ulendo wakuwilisya, amsalile msyenemyumba kuti: “Ana mpaka nalosye kafidiyo kakakusala mwampaka apatile kwanga kwa yiwusyo yakwamba Baibulo?” Naga akwiticisya, amlosye kafidiyoko kupitila pafoni jawo kapena pa kompyuta jakwe.

• Patukugaŵila tumpepala twasambanotu, amlanjileje mundu jwakumlalicilajo pa kaciwulili ka QR kakali kunyuma kwa tumapepalato, soni amlimbikasyeje kuti akajambule ni foni jakwe ja m’miyala. Pakuŵa m’yiŵeceto yejinji mundu pajambwile ciwulilici akusajawula ndaŵi jijojo pa webusaiyiti jetu, mpaka yiŵe cenene kulolela fidiyojo ndaŵi jijojo.

• Ŵasalile ŵakamula nawo masengo, acimjawo ŵakusukulu, ŵacinasi, soni ŵandu ŵane pakwamba ya kafidiyo keleka, soni ŵalosyeje naga yili yakomboleka. Ŵasalile mwampaka akasimanile kapena agambe kwasalila kuti akakalolele pali kunyumba kwawo.

Patukukamulicisya masengo litala lyasamboli, tucipakombola kutandisya majiganyo ga Baibulo gejinji. Kwende twakamucisye mwausimu wosope ŵakusaka ‘kuti tapocele umi wangamala.’​—Mase. 13:48.