Ana Cakamulicisye Masengo?
Cikumbucilo Cacikwisaci Cicitukamucisye Kulosya Kuyamicila
1.Ana ndaŵi ja Cikumbucilo jikusatupa upile watuli?
1 Cikumbucilo cacicitendekwe pa April 14 cicitupe upile wakulosya kuyamicila kwetu umbone wa Yehofa. Ngani jajikusimanikwa pa lilemba lya Luka 17:11-18 jikusalosya mwakusakuwonela Yehofa ni Yesu kuyamicila. Pa ŵandu likumi ŵamatana ŵaŵaposisye Yesu, mundu jumope ni juŵalosisye mtima wa kuyamicila. M’bujo, mtuka wa mbopesi ucityosya yilwele yosope, ni kombolekasya umi wangamala! Mwangakayicila, tucim’yamicila Yehofa lisiku lililyose ligongo lya majali gelego. Nambo ana mpaka tulosye catuli mtima wakuyamicila yijuma yayikwisayi?
2. Ana mpaka tukusye catuli mtima wakuyamicila mbopesi?
2 Akusye Mtima Wakuyamicila: Kuyamicila kukusatandila munganisyo. Pakusaka kutukamucisya kuyamicila mbopesi, ndandanda ja kuŵalanga Baibulo pandaŵi ja Cikumbucilo jikusimanikwa m’malo gakulekanganalekangana, mpela mu kalendala, soni m’kabuku ka Kuphunzira Malemba Tsiku ndi Tsiku. Uli ngatagulilana yeleyi pa liŵasa lyawo? Kutenda yeleyi mpaka kutukamucisye kuyamicila mnope ciwombolo. Yakuyicisya yakwe, tucikola ndamilo syambone.—2 Akoli. 5:14, 15; 1 Yoh. 4:11.
3. Ana mpaka tulosye catuli mtima wakuyamicila pandaŵi ja Cikumbucilo?
3 Alosye Mtima Wakuyamicila: Kuyamicila kukusawonecela kupitila mu yitendo. (Akolo. 3:15) Jwamatana jwakuyamicila jula ŵatesile yosope yakomboleka kuti amsimane Yesu ni kum’yamicila. Mwangakayicila, jwalakwe ŵasalilaga ŵane mwakusangalala ya kupona kwakwe kwakusimonjesyako. (Luka 6:45) Ana mtima wakuyamicila mbopesi wucitutendekasya kamula nawo mwamtawu masengo gakwasalila ŵane ya Cikumbuciloci? Kutenda nawo upayiniya wakamucisya kapena konjecesya yakutenda yetu mu undumetume pandaŵi ja Cikumbucilo lili litala lyambone lyakulosya kuyamicila. Kumagulo kwa lisiku lya Cikumbucilo, mtima wakuyamicila ucitukamucisya kupocela acalendo, soni kwanga yiwusyo yawo.
4. Ana mpaka tutende cici kuti tukaligamba pandaŵi ja Cikumbuciloji?
4 Ana Cikumbucilo cacikwisaci ciciŵe cakumalisya? (1 Akoli. 11:26) Ngatukumanyilila. Nambo tukumanyilila kuti lipesa lyakulosya kuyamicila likusamala pacipite cikumbucilo. Ana cakamulicisye masengo lipesali? Kwende ni maloŵe gakuyamicila gakutyocela mkamwa mwetu, soni yaganicisya ya mtima wetu yimsangalasye Yehofa, Jwagaŵila mbopesi mwakoloŵa makono.—Sal. 19:14.