Ana Mlungu Chachitenda Yindu Yapi?

Pasimene ni chakusawusya, akusajembecheya kuti mjawo jwapamtima ŵakamuchisye. Mwakulandana ni yeleyi, ŵandu ŵane akusaŵecheta kuti Mlungu ngaŵa mkuŵa najo paunasi ligongo akusayiwona kuti jwalakwe ngakwakamuchisya. Kusala yisyene, ngaŵa kuti Mlungu agambile kutupa yindu yakutukamuchisyape, nambo jwalakwe chachitendapo kandu ni yakusawusya yosope yatukusimana nayo. Ana Mlungu chachitenda yindu yapi?

CHACHIMASYA YAKUSAKALA YOSOPE

Mlungu chachimasya yakusakala yosope mwakumjonanga jwakusatandisya yakusakalayo. Baibulo jikusakolanga ya jwakusakalaju pajikusati, “Chilambo chosope chili mmyala mwa jwakusakalajo.” (1 Yohane 5:19) “Jwakusakala” jweleju ni jwaŵamkolasile Yesu kuti ali ‘jwakulamulila jwa chilambochi’ jwali Satana. (Yohane 12:31) Yakusatenda Satana ni yayikusatendekasyaga kuti ŵandu asimaneje ni yakusawusya yejinji m’chilambomu. Ana Mlungu chachitenda yindu yapi?

Pachangakaŵapa, Yehofa Mlungu chakamulichisye masengo Mwanache jwakwe jwali Yesu Klistu kuti “amjonanje Satana jwele jwakwete machili ga chiwa.” (Ahebeli 2:14; 1 Yohane 3:8) Baibulo jikusalosya kuti Satana msyenejo akumanyilila kuti “jigambile kumsigalila ndaŵi panandipe” kuti ajonanjidwe. (Chiwunukuko 12:12) Mlungu chachityosya yakusakala yosope yalumo ni ŵandu ŵakusatenda yakusakala.—Salimo 37:9; Misyungu 2:22.

CHACHITENDEKASYA CHILAMBOCHI KUŴA PALADAISO

Panyuma pakumasya yakusakala yosope pachilambopa, Mlungu jwetu chachikwanilisya chakulinga chakwe chakuti ŵandu atame ni umi kwangamala m’paladaiso. Ana tujembecheyeje yindu yapi?

Mtendele wangamala. “Ŵakulitulusya chachipochela chilambo kuti chiŵe chawo, ni tachiŵa pa mtendele wakupundanganya.”—Salimo 37:11.

Yakulya yejinji soni yambone. ‘Mchilambomo muchiŵa yakulya yejinji, atamose pachanya pa matumbi pachiŵa yakulya yejinji.’—Salimo 72:16.

Masengo soni malo gakutama gambone. “Ŵandu ŵangu tachitaŵa nyumba soni tachitamamo, tachipanda migunda ja mipeleya, tachilya yisogosi yakwe. . . . Ŵandu ŵangu ŵakusagulidwa tachisangalalila masengo ga makono gawo kwa ndaŵi jelewu.”—Yesaya 65:21, 22.

Ana wawojo akusasachililaga ali ayiweni yeleyi? Pachangakaŵapa ŵandu wosope tuchisangalala ni yindu yeleyi.

CHACHIMASYA YILWELE SONI CHIWA

Masiku agano jwalijose akusalwalaga kapena kuwa, nambo pandaŵi jelejo yeleyi ngasiyipagwasoni. Pachangakaŵapa, Mlungu chakamulichisye masengo mbopesi jakutuwombola ja Yesu kuti “jwalijose jwakumkulupilila jwalakwe akajonanjidwa nambo akole umi wangamala.” (Yohane 3:16) Ana yeleyi yikugopolela chichi?

Yilwele yichimala. “Pangali atamose jumo mchilambomo jutachiŵecheta kuti, une ngulwala soni ŵandu wosope kweleko ulemwa wawo tiwuchikululuchidwa.” —Yesaya 33:24.

Chiwa ngasichipagwasoni. “Ambuje tachichimasya chiwa mpaka ndaŵi jangali mbesi. Tachipukuta misosi m’meso mwa jwalijose.”—Yesaya 25:8.

Ŵandu chachitama mpaka kalakala. “Mtuka wakusapeleka Mlungu uli umi wangamala kupitila mwa Klistu Yesu Ambuje ŵetu.”—Aloma 6:23.

Ŵandu ŵaŵawile chachijimuka. “Kuchiŵa kwimuka kwa ŵandu ŵakulungama soni ŵangalungama.” (Masengo 24:15) Yeleyi yichikomboleka ligongo lya mbopesi jakutuwombola.

Ana Mlungu chachikwanilisya chamti uli yosopeyi?

CHACHITAMILIKASYA BOMA JAMBONE MNOPE

Mlungu chachikwanilisya chakulinga chakwe kwa ŵandu soni chilambo chapasi pakukamulichisya masengo boma jakwinani jele Jwakulamulila jwakwe ali Yesu Klistu. (Salimo 110:1, 2) Yesu jwasalaga ya boma kapena kuti Uchimwene paŵajiganyaga ŵakumkuya ŵakwe kupopela kuti “Atati ŵetu ŵakwinani, . . . Uchimwene wawo uyiche.”—Mateyu 6:9, 10.

Uchimwene wa Mlungu uchilamulila pachilambo chosope soni uchimasya yakusakala ni yipwetesi yosope. Uchimwenewu uli boma jambone mnope kupunda maboma gosope ga ŵandu. Yeleyi ni yayamtendekasisye Yesu kulimbichila kulalichila “ngani syambone syakwamba Uchimwene” paŵatendaga utumiki wakwe wa pachilambo chapasi, soni ŵalamwile ŵakulijiganya ŵakwe kukamula masengoga.—Mateyu 4:23; 24:14.

Ligongo lya chinonyelo, Yehofa asimichisye yakwatendela ŵandu yindu yakusangalasya mnopeyi. Ana yeleyi ngayikwatendekasya kusaka kummanyilila chenene jwalakwe soni kuŵa najo paunasi? Ana kusagula kutenda yeleyi kuchakamuchisya chamti uli wawojo? Ngani jakuyichisya chijakamuchisye kupata kwanga kwa yiwusyoyi.