Akamuleje Masengo ni Yehofa Lisiku Lililyose

1. Ana tukusakamula masengo ni Yehofa m’matala gapi?

YEHOFA ali ŵapanganyisye ŵandu, jwalakwe ŵasakaga kuti aŵe ŵamasengo acimjakwe. Atamose kuti masiku agano ŵandu ali ŵangali umlama, ŵandu ŵakulupicika mpaka akamuleje masengo ni Yehofa. Mwambone, tukusaŵa “ŵamasengo acimjakwe ŵa Mlungu” patukulalicila ngani syambone sya Ucimwene soni kupanganya ŵakulijiganya. (1 Akoli. 3:5-9) Mkupanganya jwetu jwamaciligose ŵatucimbicisye pakutusagula kuti tukamuleje nawo masengo gakusosekwa mnope. Nambope, panasoni matala gane gakamulila masengo ni Yehofa kupwatikapo pakulalicila soni kupanganya ŵakulijiganya. Mu ngani ajino, citulijiganye mwatukusakamulila masengo ni Yehofa, patukwakamucisya ŵamwiŵasa mwetu soni ŵakulambila acimjetu, patukwapocela acalendo, patukulipeleka pamasengo gagali m’likugamu soni konjecesya undumetume wetu.—Akolo. 3:23.

2. Ligongo cici ngatukusosekwa kuliwanicisya ni ŵane patukumtumicila Yehofa?

² Patukulijiganya nganiji, tukaliwanicisyaga yatukusatenda ni yakusatenda ŵane pakumtumicila Yehofa. Tukumbucileje kuti ŵanduwe tuli ŵakulekangana yaka, macili ga yilu yetu, mwayiŵelele yindu paumi wetu, soni lunda. Mwakusalilidwa, ndumetume Paulo jwatite, “Jwalijose pajika agalinjeje masengo gakwe, kuti alole kuti gali gamtuli. Kaneko cacikola ligongo lyakusangalalila ni masengo gakwego ngaŵaga mwakuliwanicisya ni mundu jwine.”—Aga. 6:4.

TWAKAMUCISYEJE ŴAMWIŴASA MWETU SONI ŴAKULAMBILA ACIMJETU

3. Ligongo cici mpaka tujile kuti jwalijose jwakusasamalila liŵasa lyakwe akukamula masengo ni Mlungu?

³ Yehofa akusasaka kuti ŵakutumicila ŵakwe ŵasamalileje ŵamwiŵasa mwawo. Mwambone, mpaka akamuleje masengo kuti apate mbiya syakuti ŵasamalileje ŵamwiŵasa mwawo. Acakongwe ŵajinji akusasigala pamlango kuti ŵasamalileje ŵanace ŵawo. Ŵanace ŵane ŵacikulile mpaka ŵasamalileje acinangolo ŵakulwala. Gelega gali masengo gakusosekwa. Baibulo jikusati, “Yisyene naga mundu ngakwasamalila ŵandu ŵakwe mnopemnope ŵamwiŵasa mwakwe, akanile cikulupi soni ali jwakusakala kupunda mundu jwangakulupilila.” (1 Tim. 5:8) Naga akwete maukumu mpela gelega, mpaka alipikaneje kuti nganaŵa atesile yejinji pakumtumicila Yehofa. Nambo akatenguka. Naga akulisamalila liŵasa lyawo, Yehofa akusasangalala.​—1 Akoli. 10:31.

4. Ana acinangolo mpaka aŵice camtuli yindu ya Ucimwene pamalo gandanda, soni ana pakusaŵa yakuyicisya yamtuli?

⁴ Acinangolo Ŵaciklistu akusakamula masengo ni Yehofa pakwaŵicila ŵanace ŵawo yakulinga ya kumtumicila Yehofa. Acinangolo ŵane atesile yeleyi. Yakuyicisya yakwe, ŵanace ŵawo akutenda undumetume wandaŵi syosope, atamose kuti undumetumewu akutendela kutali. Ŵane ali amishonale, ŵane apayiniya ŵakutumicila kwakusosecela ŵakulalicila ŵajinji, soni ŵane akutumicila pa Beteli. Yili yisyene kuti ŵanaceŵa papite kukutumicila kumalo kwakutalicila, yikusaŵa yakusawusya kuti acinangolo ŵawo apateje ndaŵi jakuŵecetana nawo. Nambope, acinangolo ŵakulipeleka pa yindu yausimu akusiŵalimbikasya ŵanace ŵawo kuti ajendelecele kutenda maundumetume gawo. Ligongo cici? Jemanjaji akusaŵa ŵakusangalala soni ŵakwikutila pakuyiwona kuti ŵanace ŵawo akuŵika yindu ya Ucimwene pamalo gandanda. (3 Yoh. 4) Komboleka kuti acinangolo ŵajinji mwa jemanjaji akusalipikana mpela Hana, juŵasasile kuti ‘ŵampelece’ mwanace jwakwe, Samuele, kwa Yehofa. Acinangolo akusawuwona kuŵa upile wekulungwa kamula masengo ni Yehofa m’litala lyeleli.—1 Sam. 1:28.

5. Ana mpaka twakamucisye camtuli abale ni alongo ŵa mumpingo mwetu? (Alole ciwulili cacili kundanda kwa nganiji.)

⁵ Naga nganakola ukumu wekulungwa wakusamalila liŵasa, komboleka kwakamucisyaga ŵakulambila acimjawo ŵakulaga ni ulwele, ŵacekulupe kapena ŵaliwose ŵakusosecela cikamucisyo. Uli ngalinga kulola mumpingo mwawo naga mwana jwalijose jwakusosecela cikamucisyo? Komboleka kuti pana mlongo jwakusamalila acinangologwe ŵacekulupe. Uli ngapata ndaŵi jakunguluka ni acinangolowo kuti mlongojo apate lipesa lyakutendela yine pamlangopo? Kapena mpaka ŵakamucisye ŵane mwakwajigalila ku misongano, kuja kukwasumila yindu kapena kuja kukwalola ŵakulwala kucipatala. Pakutenda yeleyi, akusaŵa ali mkukamula masengo ni Yehofa pakwanga mapopelo ga ŵandu ŵakuŵenda cikamucisyo.​—Aŵalanje 1 Akolinto 10:24.

TWAPOCELEJE ACALENDO

6. Ana mpaka tulosye camtuli ndamo ja kwapocela acalendo?

⁶ Ŵamasengo acimjakwe ŵa Mlungu akusamanyika ni ndamo ja kupocela acalendo. (Aheb. 13:2) Maloŵe ga Mlungu gakusasala yisyasyo yampaka yitujiganye mwampaka tulocesye ndamoji. (Gen. 18:1-5) Tukusosekwa kusosasosa matala gakwakamucisya ŵane, cinga ŵakulambila acimjetu kapena iyayi.—Aga. 6:10.

7. Ana tukusapata majali gamtuli patukwapocela abale ni alongo ŵali mu undumetume wandaŵi syosope?

⁷ Ana mpaka tukamule masengo ni Mlungu mwa kwapocela m’nyumba syetu abale ni alongo ŵali mu undumetume wandaŵi syosope? (Aŵalanje 3 Yohane 5, 8.) Patukutenda yeleyi, tukusapata upile wa ‘kulimbisya cikulupi ca jwine ni mjakwe.’ (Alo. 1:11, 12) Aganicisye yayamtendecele Olaf. Jwalakwe akusakumbucila kuti yaka yipiteyo, jwakulolela mkuli jwaŵaliji jwangalombela jwayice mumpingo wakwe. Nambo jwasoŵile kwakwicila ligongo pangali jwalijose mumpingomo jwaŵasakaga kumpocela jwakulolela mkulijo. Olaf jwawusisye acinangologwe ŵaŵaliji ŵangakulupilila naga yaliji yakomboleka kuti jwakulolela mkulijo ayicile kumangwawo. Acinangoloŵa ŵajiticisye nambo ŵamsalile Olaf kuti akagone pampando. Yeleyi ni yaŵatesile Olaf, mwamti nganaligamba. Olaf akusakumbucila yeleyi, mwamti akusati, “Caliji cijuma cakusangalasya. Une ni jwakulolela mkuliju lisiku lililyose twajimukaga kundaŵi ni kutanda kusalilana ngani syakusangalasya kwineku tuli mkulya cakulya cakundaŵi. M’baleju jwalimbikasisye mwamti natandite kusaka kutenda undumetume wandaŵi syosope.” Kwa yaka 40 yipiteyi, Olaf atumicile mpela mmishonale m’yilambo yakulekanganalekangana.

8. Ligongo cici tukusosekwa kuŵa ŵakoloŵa magasa atamose kuti ŵane pandanda nganaŵa alosisye kuyamicila? Apelece cisyasyo.

⁸ Kwa ŵandu ŵangatukwamanyilila mpaka twalosye cinonyelo mmatala gakulekanganalekangana, atamose kuti pandanda kulingalinga kwetu nganaŵa akuyamicile. Aganicisye ya cisyasyo aci. Mlongo jwine ku Spain jwatendesyaga lijiganyo lya Baibulo ni jwamkongwe jwine jwakutyocela ku Ecuador lina lyakwe Yesica. Lisiku line, lijiganyo lili mkati, Yesica jwatandite kulila. M’yoyo, mlongoju ŵam’wusisye jwamkongweju kuti asale ligongo lyakwe ŵalilaga. Yesica jwatite mkanaŵe kwika m’cilambo ca Spain, jwalakwe jwaliji jwakulaga, mwamti lisiku line jwatemi ni sala kusoŵa yakulya. Cakulya caŵakwete cakampele mwanace jwakwe caliji mesi basi. Yesica jwapopesile kuŵenda cikamucisyo. Nambo jwatesile yeleyi panyuma pakuti mwanace jwakwe agonile. Panyuma pa lipopeloli, Ŵamboni ŵaŵili ŵayice kunyumba jakwe, ni ŵampele Yesica magasini. Nambo Yesica jwajanjile mwa mwano kaneko jwapapwile magasinigo ni kuŵeceta kuti, “Ana yakulya yakwe ni yeleyi yakusaka kuti nampe mwanangu?” Alongoŵa ŵalinjile kumlimbikasya jwamkongweju, nambo nganiyikomboleka. Panyuma pakwe, Alongoŵa ŵalesile basiketi ja yakulya pamlango pa jwamkongweju. M’yoyo, kulila kula kwaliji ligongo lyakuti jwakumbucile kuti Mlungu jwajanjile lipopelo lyakwe lyakuŵenda cikamucisyo, nambo jwalakwe nganayikosya. Sambano Yesica jwaliji jwakusimicisya kumtumicila Yehofa. Koloŵa magasa kwa alongo ŵaŵili ŵala kwayikasisye yakuyicisya yambone.​—Jwak. 11:1, 6.

AKAMUCISYEJE MASENGO GAKUTAŴATAŴA

9, 10. (a) Ana Ayisalayeli ŵakwete upile wamtuli wakamucisya pa masengo ga Yehofa? (b) Ana abale masiku agano mpaka akamucisye camtuli mu mpingo?

⁹ Kalakala Ayisalayeli ŵakwete upile wakukamucisya pa masengo ga Yehofa. (Eks. 36:2; 1 Mbiri 29:5; Neh. 11:2) Masiku agano, tukwetesoni upile wakwakamucisya abale ni alongo ŵetu pakamulicisya masengo ndaŵi jetu, yindu yakucilu yatukwete soni lunda lwetu. Naga tukutenda yeleyi tuciŵa ŵakusangalala mnope soni tucipata majali gejinji.

¹⁰ Maloŵe ga Mlungu gakusigalimbikasya abale kuti akamuleje masengo ni Yehofa mwakuŵa ŵatukutumicila ŵakamucisya kapena acakulungwa ŵa mumpingo. (1 Tim. 3:1, 8, 9; 1 Pet. 5:2, 3) Wosope ŵakusatenda yeleyi akusaŵa ŵakusacilila kwakamucisya ŵane cinga mwausimu kapena mwakucilu. (Mase. 6:1-4) Ana acakulungwa ŵa mumpingo mwawo pakwete paŵaŵendile kuti atumicile mpela jwakupocela acalendo, jwakusamalila ya mabuku, jwakusamalila mikuli ja kulalicila, jwakusamalila Nyumba ja Ucimwene kapena yindu yine? Abale ŵakusatumicila pa mbali syelesi akusaŵeceta kuti akusasangalala mnope.

11. Ana mlongo jwine apatile majali gamtuli kutyocela kwa acimjakwe ŵaŵapatile pandaŵi ja yakutaŵataŵa?

¹¹ Abale ni alongo ŵakusakamucisya pa masengo gakutaŵataŵa akusakola upile wakupata acimjawo ŵajinji. Aganicisye ya cisyasyo ca mlongo jwine lina lyakwe Margie jwakamwile nawo masengo gakutaŵa Nyumba sya Ucimwene kwa yaka 18. Kwa yaka yejinji, mlongoju aŵele ali mkwajigala alongo ŵacisikana kuti ŵajiganye masengo gakutaŵaga. Jwalakwe akusaŵeceta kuti undumetumewu ukusakamucisya kuti ŵakutenda undumetumewu alimbikasyaneje. (Alo. 1:12) Pandaŵi jakusimana ni yakusawusya pa umi wakwe, acimjakwe ŵaŵapatile ku undumetume ŵala ni ŵaŵayikaga kukwalimbikasya. Ana pakwete pakamwile undumetume welewu? Atamose kuti nganakola lunda pa masengo ga yakutaŵataŵa, nambope mpaka akamucisye.

12. Pajitendekwe ngosi ja m’cipago, ana mpaka tukamucisye camtuli?

¹² Tukusakamulasoni masengo ni Mlungu patukwakamucisya abale ni alongo ŵasimene ni ngosi sya m’cipago. Mwambone, tukusakamucisya mwakupeleka mbiya. (Yoh. 13:34, 35; Mase. 11:27-30) Tukusitwakamucisyasoni mwakulinganya yindu yayijonasice ni ngosijo. Mlongo jwine jwakutyocela ku Poland jwasangalele mnope abale ni alongo ŵakuŵandikana ni mpingo wakwe ali ayice kukulinganya nyumba jakwe jajajonasice mnope ni cigumula camesi. Jwalakwe jwatite, “Ngangusadandawula ni yindu yayajonasice ligongo yigambile kuŵa yindu yakucilu. Nambo ngusasangalala ni yindu yambatile. Yaŵatesile abaleyi yikusasimicisya kuti kuŵa mumpingo wa Ciklistu uli upile wekulungwa soni gali malo gakumtendekasya mundu kuŵa jwakusangalala.” Ŵandu ŵajinji ŵakusapocela cikamucisyo ligongo lyakuti asimene ni ngosi sya m’cipago akusasangalala. Nambosoni abale ni alongo ŵakusakamula masengo ni Yehofa pakupeleka cikamucisyoci akusaŵa ŵakusangalala soni ŵakwikutila.​—Aŵalanje Masengo 20:35; 2 Akolinto 9:6, 7.

13. Ana cinonyelo cetu pa Yehofa tukusacilimbisya camtuli patukwakamucisya ŵane? Apelece cisyasyo.

¹³ Mlongo jwine, lina lyakwe Stephanie ni acimjakwe, ŵasangalele kamula masengo ni Mlungu mwakwakamucisya abale ni alongo ŵaŵatamaga ku United States, mpela ŵakutila kumangwawo. Jemanjaji ŵagakamucisye maŵasaga kupata malo gakutama soni yindu yine. Stephanie jwatite, “Yatulimbikasisye kwawona abale ni alongoŵa ali mkusangalala soni kuyamicila ligongo lya cinonyelo soni mkamulano wa Ciklistu. Maŵasaga gaganisyaga kuti m’we ni ŵatwakamucisye, nambo kusala yisyene jemanjaji ni ŵaŵatukamucisye mnope”. Jwalakwe jwajonjecesye kuti, “Cinonyelo, mkamulano, cikulupi, soni kwegamila kwetu Yehofa kutukamucisye kulimbisya cinonyelo cetu pa Yehofa soni kuyamicila yosope yatukusapata m’likuga lyakwe.”

AJONJECESYE UNDUMETUME WAWO

14, 15. (a) Ana jwakulocesya Yesaya jwalosisye msimu wamtuli? (b) Ana Aklistu masiku agano mpaka amsyasye camtuli Yesaya?

¹⁴ Ana akusaka konjecesya undumetume wawo? Ana mpaka ajawule kukutumicila kumkuli wawukusosekwa ŵakulalicila ŵajinji? Nambope, ngaŵa kuti ŵakutumicila ŵa Mlungu wosope mpaka ajawule kukutumicila kwakutalika pakusaka kulosya kuti ali ŵakoloŵa magasa. Nambo abale ni alongo ŵane akombwele kulipeleka kwawula kukutumicila kumkuli wine mwakamulana ni mwayiŵelele yindu paumi wawo. Jemanjaji akwete nganisyo syakulandana ni sya Yesaya. Yehofa pajwawusisye kuti, “Ana namtumisye ŵani, soni ŵani ŵacajawule mmalo mwetu?” Yesaya jwajanjile kuti, “Une apano! Andumisye une!” (Yes. 6:8) Mwakamulana ni mwayiŵelele yindu paumi wawo, ana ali ŵakusacilila kulikamucisya likuga lya Yehofa? Ana mpaka akamucisye m’matala gane gapi?

¹⁵ Pakwamba ya masengo gakulalicila soni kupanganya ŵakulijiganya, Yesu jwatite, “Yakugowola yipali yejinji, nambo ŵamasengo ali ŵamnono. M’yoyo, mŵende kwa msyene yakugowolayo kuti atumisye ŵamasengo kuti akasonganye yagowola yakwe.” (Mat. 9:37, 38) Ana mpaka ajawule kukutumicila kumkuli wakusosecela ŵakulalicila ŵajinji mpela mpayiniya? Kapena ana mpaka amkamucisye jwine kuti atende yeleyi? Abale ni alongo ŵajinji ayiweni kuti litala lyambone lyakulocesya cinonyelo kwa Mlungu soni kwa acimjetu lili kutenda upayiniya mu mkuli wakusosecela ŵakulalicila ŵajinji. Ana pana matala gane gakonjecesya undumetume wawo? Naga akutenda yeleyi, caciŵa ŵakusangalala mnope.

16, 17. Ana undumetume wetu mpaka tuwujonjecesye m’matala gapi?

¹⁶ Ana akusasaka ali mkutumicila pa Beteli kapena kukamucisya pa masengo gakutaŵa yindu ya Ucimwene kwa masiku gamnono pa cijuma? Pakusosekwa abale ni alongo ŵajinji ŵampaka atumicile Yehofa kulikose kwampaka ŵatumisye soni kutenda undumetume uliwose wampaka apocele. Komboleka kuti mpaka apocele undumetume wele mwine nganawutendeje citandilile. Yehofa akusayamicila jwalijose jwakwete mtima wakulipeleka wakusaka kuja kutumicila kwakusosekwa cikamucisyo.—Sal. 110:3.

¹⁷ Ana akusaka kupocela majiganyo gane kuti akombole kumtumicila Yehofa mwakwanila? Naga yili m’yoyo, mpaka atende yakuti aŵajilwe kuti akajinjile mu Sukulu ja Ŵakulalicila ya Ucimwene. Sukuluji jikusapeleka majiganyo kwa abale ni alongo ŵali mu undumetume wandaŵi syosope kuti ajonjecesye undumetume wawo. Jwalijose jwakusaka kutenda nawo sukuluji akusosekwa kuŵa jwakoseka kwawula kulikose kwampaka ŵatumisye panyuma pa majiganyo gawo. Ana cacikamulicisya masengo upile welewu kuti ajonjecesye undumetume wawo?—1 Akoli. 9:23.

18. Ana pana maumbone gapi ligongo lyakamula masengo ni Yehofa lisiku lililyose?

¹⁸ Ligongo lyakuti tuli ŵakutumicila ŵa Yehofa, tukusaŵa ŵakoloŵa magasa, ŵambone, ŵacanasa, ŵacinonyelo soni kutenda yindu yakwaganicisya ŵane. Patukutenda yeleyi tukusaŵaga ŵakusangalala soni ŵamtendele. (Aga. 5:22, 23) Mwangasamala kandu kuti yindu yili wuli paumi wetu, tukusaŵaga ŵakusangalala patukusyasya koloŵa magasa kwa Yehofa soni kwendelecela kuŵa ŵakamula masengo acimjakwe ŵa Yehofa.​—Mis. 3:9, 10.