Yilanga Yayichikwanilichikwa Msogolo
Mwakamulana ni yaŵalochesye Yesu, ngani syambone sya Uchimwene wa Mlungu sikulalichidwa pachilambo chosope. (Mateyu 24:14) Buku ja Daniyele jikusatusalila kuti Uchimwene welewu wuli boma ja Mlungu. Chaputala 2 cha bukuji chikwete yakulochesya yakwamba maboma ga ŵandu, kapena kuti mauchimwene gamachili mnope pachilambo chapasi, kutandila ni ulamusi wakala wa Babulo, mpaka ulamusi wa masiku getu gano. Pakwamba ya msogolo, ndime 44 jikusati:
‘Mlungu jwakwinani chachitamilikasya uchimwene wangasiwujonasika. Uchimwene wakwe ngasiwupelechedwa kwa mtundu uliwose wa ŵandu, nambo uchikasanya ni kugamasya mauchimwene gane gosopego, soni wuchitama mpaka kalakala.’
Yakulochesya yeleyi soni yine ya m’Baibulo yikusasala kuti Uchimwene wa Mlungu uchijinjila m’malo mwa mauchimwene ga ŵandu ni kwikasya bata ni mtendele kwa ŵandu pachilambo chapasi. Ana umi uchiŵa wamtuli mu Uchimwene wa Mlungu? Kwende tulole yakulochesya yine yakusangalasya yachiyitendekwe pachangakaŵapa.
NGONDO SICHIMALA
Pa Salimo 46:9 pakusati, “[Mlungu] akulekasya ngondo mpaka kumbesi kwa chilambo chapasi. Akutemangula ukunje soni kuposokolanya lipanga. Nambosoni akocha magaleta ga ngondo ni moto.”
Aganichisye mwayikaŵelele yindu pachilambopa yikaŵe kuti mbiya syejinji, soni lunda lwakusajonanga ŵandu pakupanganyila yida yangondo, akuyikamulichisya masengo m’litala lyakwakamuchisya ŵandu m’malo mwa kwawulaga. Nambo mu Uchimwene wa Mlungu yakulochesya yeleyi yichikwanilichikwa.
YILWELE YICHIMALA
Pa Yesaya 33:24 pakusati, “Ŵakutama mwelemo pangali jwachachiŵecheta kuti, ‘Une ngulwala.’”
Aganichisye ali mkutama m’chilambo changali jwalijose jwakulwala yilwele mpela yamtima, kansa, malungo kapena yilwele ya mtundu wuliwose. Changali yipatala ni mitela, nambosoni ŵandu ali akwete yilu yambone. Mwelemu ni mwayichiŵela msogolo pachilambopa.
SALA JICHIMALA
Pa Salimo 72:16 pakusati, “Pachilambo chapasi pachiŵa yagowola yejinji. Pachanya pa matumbi pachiŵa yagowola yejinji.”
Pachilambo chapasi pachiŵa yakulya yakwanila kwa jwalijose. Sala soni yilwele yakwika ligongo lyakusoŵa kwa yakulya m’chilu yichimala.
YAKUPWETEKA, CHIWA SONI CHANASA YICHIMALA
Pa Chiwunukuko 21:4 pakusati, “[Mlungu] chachipukuta misosi josope m’meso mwa ŵanduwo, mwamti chiwa ngasichipagwasoni. Ngasipapagwasoni yakutesya chanasa, kulila kapena kupikana kupweteka. Yindu yakala yosope yeneyi yichiŵa yili yimasile.”
Yeleyi yikugopolela kuti ŵandu chachiŵa ŵamlama ni kutamaga pachilambo chapasi mpaka kalakala. Yeleyi ni yatulaguchisye Mkupanganya jwetu jwachinonyelo, Yehofa Mlungu.
‘GACHIKWANILICHIKWA’
Ana yisyene kuti yindu yeleyi yichitendekwa? Atamose kuti ŵandu ŵajinji mpaka ajitichisye kuti umi m’chilambo chasambano uchiŵa wakusangalasya, nambope ŵajinji akusakayichila kuti nganiyiŵa yikomboleche kutama mpaka kalakala. Yeleyi yili yangasimonjesya ligongo pangali mundu jwatemi kwandaŵi jelewu chamti myoyo.
Ŵanduwe tuli pa ukapolo wa ulemwa soni chiwa. Yeleyi yikusatendekasya umi wetu kuti uŵeje wakusawusya soni wakupweteka mwamti ŵandu ŵajinji ayiche pakuwusyoŵelela umi welewu. Nambo chakulinga cha Mkupanganya jwetu, Yehofa Mlungu, nganichiŵa chelechi.
Mlungu pakutusimichisya ya kwanilichikwa kwa chakulinga chakwe, kapena maloŵe gakwe jwatite, ‘Ngasigawujila kwangune pa chabe. Nambo gachitenda chingusaka, soni gachikwanilisya chakulinga chanagatumichisye.’—Yesaya 55:11.
Baibulo jikusasala ya Yehofa kuti ali Mlungu “jwanganaŵa alambwisye.” (Tito 1:2) Pakuŵa jwalakwe atulaguchisye yindu yejinji yakusangalasya, luli lunda kusaka kumanyilila yiwusyo mpela ayi, ana yisyene kuti ŵandu chachitama kwangamala m’Paladaiso pachilambo chapasi? Ana tukusosekwa kutenda yamtuli kuti chitusangalale ni yindu yeleyi? Mu ngani syakuyichisya m’magasini ajino chapate kwanga kwa yiwusyo yeleyi.