“Mpate Majali Ligongo lya Lunda Lwenu!”

MALOŴE gelega ŵaŵecete Daudi pakumlumba jwamkongwe jwine juŵasimene najo, lina lyakwe Abigayeli. Ana cici cacamtendekasisye Daudi kuti aŵecete maloŵega soni ana mpaka tulijiganye yamtuli pacisyasyo ca jwamkongweju?

Daudi ŵasimene ni jwamkongweju pandaŵi jaŵamtilaga Mwenye Sauli. Abigayeli ŵaliji ŵamkwakwe ŵa jwamlume jwine jwakusicila juŵakwete yilango yejinji lina lyakwe Nabala. Yilango yakweyi yalilaga mu mkuli wamatumbi wawaliji kummwela kwa Yuda. Daudi ni acalume ŵakwe ŵaŵele ‘mpela lipupa lyakwacenjela’ ŵakucinga ŵa Nabala soni yilango yawo. Kaneko Daudi ŵatumisye ŵamitenga kwa Nabala kuti akaŵende ‘cilicose campaka ŵape’ kumbali ja cakulya. (1 Sam. 25:8, 15, 16) Yaliji yakupikanika kuti Daudi aŵende yeleyi, pakuganicisya yosope yaŵatesile jwalakwe ni acalume ŵakwe pakucenjela yindu ya Nabala.

Nambo Nabala, jwele lina lyakwe likusagopolela “jwangali lunda” kapena “jwakuloŵela,” ŵatesile yindu mwakamulana ni lina lyakwelyo. Jwalakwe ŵaŵecetele ŵamitenga ŵala yacipongwe soni ŵakanile kupeleka yaŵaŵendile Daudi. M’yoyo, Daudi ŵakosecele kuti akamalane najo Nabala ligongo lya yindu yacipongwe yaŵaŵeceteyo. Nabala ni ŵamwiŵasa mwakwe akasimene ni yakogoya ligongo lya kuloŵela kwakweko.—1 Sam. 25:2-13, 21, 22.

Pakuganicisya yakuyicisya yakogoya yayikapali ligongo lya yindu yaŵalinganyisye Daudi kuti atende, Abigayeli ŵajinjilile nganijo mwakulimba mtima. Mwaucimbicimbi, jwalakwe ŵamcondelele Daudi mwakumsalila kuti aganicisye ya unasi wakwe ni Yehofa. Jwalakwe ŵapelecesoni yakulya yejinji kwa Daudi soni kwa acalume ŵakwe. Daudi, juŵaliji jwakuti caŵe mwenye jwakuyicisya, ŵamanyilile kuti Yehofa amkamulicisye masengo Abigayeli kuti amlekasye kutenda yindu yayikamtendekasisye kuti akole magambo pameso pa Mlungu. M’yoyo, Daudi ŵamsalile Abigayeli kuti, “Mpate majali ligongo lya lunda lwenu, soni ligongo lyakundekasya une kuti ngapalagula magambo ga miyasi.”—1 Sam. 25:18, 19, 23-35.

Mwaciwonecele, nganituŵa tusacile kuŵa mpela Nabala, mwakuŵa ŵangayamicila yindu yambone yatutendele ŵane. Nambosoni, patukwete cakusawusya ni mundu jwine, tukusosekwa kutenda yiliyose yakomboleka kuti tucimasye. Mpaka tupikane mumtima mpela muŵapikanile jwamalumbo juŵamsalile Mlungu kuti, ‘Ambe lunda soni umanyilisi.’—Sal. 119:66.

Ŵandu ŵane mpaka alole kuti tukwete lunda kupitila mu yakutenda yetu. Cinga jemanjaji mpaka akombolece kutusalila yeleyi kapena iyayi, nambo mpaka apikane mumtima mpela muŵapikanile Daudi juŵasasile kuti, “Mpate majali ligongo lya lunda lwenu!”