Ligongo Cici Tukusosekwa Kuŵalanga Baibulo?

Ana pakwete paganisisye yakuŵalanga Baibulo nambo ni kutengukaga mpela ŵandu ŵatwakolasile penanipa? Kwa ŵandu ŵajinji, kuŵalanga Baibulo akusakuwona kuti kuli kwakusawusya. Nambo ana mpaka apikane wuli ali amanyilile kuti Baibulo mpaka jakamucisye kuŵa ŵakusangalala soni kola umi wambone? Soni ana mpaka apikane wuli ali asimene kuti pana matala gambone gakuŵalanjila Baibulo? Ana mpaka aŵe ŵakusacilila kumanyilila mwampaka Baibulo jakamucisye?

Kwende tulole yaŵaŵecete ŵandu ŵane pakwamba ya majali gaŵapatile paŵatandite kuŵalanga Baibulo.

Ezekiel, jwa yaka ya m’ma 20 jwatite, “Pandanda, natendaga yindu mpela mundu jwakwendesya galimoto ali ngakukumanyilila kwakwawula. Nambo kuŵalanga Baibulo kungamucisye kuti ndameje ni umi wakusangalala. Baibulo jikwete ngani syambone syampaka nasikamulicisyeje masengo lisiku lililyose.”

Frieda, jwa yakasoni ya m’ma 20 jwatite, “Naliji mundu jwakwanguya kupya mtima. Nambo ligongo lyakuŵalanga Baibulo, nalijiganyisye kuwusimana mtima. Yeleyi yingamucisye kuŵa ŵakamulana ni ŵane, mwati apano ngwete acimjangu ŵajinji.”

Jwamkongwe jwine jwa yaka m’ma 50 lina lyakwe Eunice jwaŵecete ya Baibulo kuti, “Jikungamucisya kuŵa mundu jwambone soni kucenga ndamo syangu syakusakala.”

Yaŵalijiganyisye ŵandu ŵatwakolasileŵa ni ŵanesoni ŵajinji, yikutukamucisya kumanyilila kuti kuŵalanga Baibulo mpaka kutukamucisye kuŵa ni umi wakusangalala. (Yesaya 48:17, 18) Kuŵalanga Baibulo mpaka kutukamucisyesoni (1) kutenda yakusagula yambone, (2) kupata acimjetu ŵasyesyene, (3) kupilila yakusawusya, soni (4) tukusalijiganya yisyesyene yakwamba Mlungu, cacili cindu cambone mnope. Maloŵe ga m’Baibulo gatyocele kwa Mlungu, m’yoyo nganikuŵa kulemwesya kugakuya. Mlungu ngaŵa mkutusalila yindu yangakamucisya.

Cindu cakusosekwa mnope cili kutanda kujiŵalanga. Ana mpaka atende yatuli kuti atande kujiŵalanga soni kuti asangalaleje pakuŵalanga?