Ligongo Cici Baibulo Jakulupwice?

Baibulo jakulupwice ku yindu yejinji. Ni ligongo lyakwe masiku agano mpaka ajipate soni kujiŵalanga. Nambosoni papatile Baibulo jaŵajigopolele cenene, mpaka asimicisye kuti jikwete maloŵe gasyesyene ga Mlungu.a Nambo ligongo cici Baibulo nganijijonasika, soni kuti ŵandu ŵalepele kusokonasya utenga wakwe? Ana yakombolece catuli kulupuka mwakusimonjesya m’yiyi?

Ŵandu ŵajinji ŵakusalijiganya Baibulo ayikene pakwiticisya nganisyo sya ndumetume Paulo juŵalembile ya Baibulo kuti, ‘Malemba gosope gasaliligwe ni Mlungu.’ (2 Timoteo 3:16) Jemanjaji akusakulupilila kuti Baibulo jipalipe mpaka lelo ligongo jili Maloŵe ga Mlungu nambosoni ligongo lyakuti Mlungujo ni jwaŵele ali mkujiteteya. Faizal, jwatumkolasile mu ngani jandanda jila, ŵaganicisye yakuti atande kulijiganya Baibulo kuti asimicisye jika yeleyi. Yaŵalijiganyisye yamsimonjesye kwabasi. Jwalakwe ŵapatile yakuti yasikusajiganya dini syejinji sya Ciklistu yangasimanikwa m’Baibulo. Nambosoni ŵasangalele kumanyilila lisosa lya Mlungu lyakwayana ni cilamboci lyaŵalisasile m’Maloŵe gakwe.

Faizal ŵatite, “Sambano simicisye kuti Baibulo jingwete jili mtuka wakutyocela kwa Mlungu. Simicisyesoni kuti naga Mlungu ŵakombwele kupanganya yindu yosope, ngaŵa kumlema kutupa Baibulo, soni msyenejo ni kujiteteya. Kayicila yeleyi kuli kumdelela Mlungu Jwamaciligose! Une ŵani kuti ngayicileje macili ga Mlungu?”—Yesaya 40:8.