“Ajendelecele Kwanonyela Abale”

1, 2. Ligongo cici Paulo ŵalembele cikalata Aklistu Ŵacihebeli?

M’CAKA ca 61 C.E., mpingo Waciklistu ku Yisalayeli wasangalalaga ni mtendele wawapali pandaŵijo. Atamose kuti Paulo ŵaliji ali amtaŵile ku Loma, nambope ŵajembeceyaga kuti camkoposye pacangakaŵa. Mjakwe jwa Paulojo, Timoteyo ŵaliji ali amkopwesye kala. Jemanjaji ŵalinganyaga yakuti ajawule akalole Aklistu acimjawo ŵa ku Yudeya. (Ahe. 13:23) Nambope, msinda wa Yelusalemu waliji wakuti “ciwusyungulilwe ni asilikali” m’yaka msano kusogoloko, mwakamulana ni yaŵalocesye Yesu. M’yoyo, Aklistu ŵa ku Yudeya mnopemnope ŵa mu msinda wa Yelusalemu ŵasosekwaga kutenda yindu mwalunda. Yesu ŵaliji ali ŵakalamwisye jemanjaji kuti cacisosekwa kutila pacaciyiwona yindu yeleyi yili mkutanda.—Luk. 21:20-24.

² Pali papitile yaka 28 Yesu ali alocesye yeleyi, Aklistu ŵa ku Yisalayeli ŵaliji ali atandite kala kusimana ni yakulingwa soni kwasisya, nambo ŵajendelecele kuŵa ŵakulupicika. (Ahe. 10:32-34) Nambope, Paulo ŵamanyililaga kuti Aklistuwo ŵaliji ali asigele panandi kusimana ni cakulingwa cakusawusya mnope. (Mat. 24:20, 21; Ahe. 12:4) Jwalakwe ŵasakaga kuti jemanjajo aŵe ŵakoseka kusimana ni cakusawusyaco. Aklistuwo ŵasosekwaga kuŵa ŵakupilila soni kola cikulupi cakulimba mnope kuti cakulupuce. (Aŵalanje Ahebeli 10:36-39.) Ni ligongo lyakwe msimu wa Yehofa wamlimbikasisye Paulo kuti ŵalembela abale ni alongo cikalata cakamucisya mnope pandaŵijo. Cikalata celeco cikusakolanjikwa kuti buku ja Ahebeli.

3. Ligongo cici tukusosekwa kola lung’wanu ni buku ja m’Baibulo ja Ahebeli?

³ Wosopewe tukusosekwa kola lung’wanu ni cikalata ca Paulo caŵalembele Aklistu Ŵacibelici. Ligongo cici? Ligongo lyakuti m’wejisoni tukusimana ni yindu yaŵasimanaga nayo jemanjajo. ‘M’ndaŵi jakusawusya jino,’ ŵandu ŵa Yehofa akusimana ni yakulingwa yakulekanganalekangana. (2 Tim. 3:1, 12) Ŵajinji mwa m’weji tukombwele kupilila yakulingwayi. Nambo ŵane ngakusimana ni yakulingwa. Nambope, wosopewe tukusosekwa kumbucila kuti pacangakaŵapa citusimane ni yakusawusya yakulinga cikulupi cetu, mpela mwayaŵelele ni Aklistu ŵa m’moŵa ga Paulo.—Aŵalanje Luka 21:34-36.

4. Ana lilemba lya caka ca 2016 lili lyapi, soni ligongo cici lili lyakuŵajilwa?

⁴ Nambo ana mpaka tukosecele catuli yakusawusya yayicitendekwe pacangakaŵapa? M’buku ja Ahebeli, Paulo ŵalembilemo yindu yampaka yitukamucisye kola cikulupi cakulimba. Cindu cimo cakusosekwa mnope cikusimanikwa pa Ahebeli 13:1. Lilembali likusati, “Ajendelecele kwanonyela abale.” Lyeleli ni lilemba lyalisagulidwe kuŵa lilemba lya caka ca 2016.

ANA KWANONYELA ABALE KUKUSAGOPOLELA CICI?

5. Ana kwanonyela abale kukusagopolela cici?

⁵ Ana kwanonyela abale kukusagopolela cici? Liloŵe lyacigiliki lyaŵalikamulicisye masengo Paulo lyakuti phi·la·del·phiʹa, likusagopolela ‘kwanonyela ŵane kutyocela pasi pamtima’ mpela mwatukusanonyelela ŵacinasi ŵetu kapena acimjetu ŵapamtima. (Yoh 11:36) Unasi wetu nganiwuŵa wakwamba kuwanicisya, nambo tuli abale ni alongo ŵasyesyene. (Mat. 23:8) Paulo ŵatite, “Pakwanonyela abale aŵeje ŵacinonyelo cisyesyene kwa jwine ni mjakwe. Pakulosyana ucimbicimbi aŵeje pasogolo.” (Alo. 12:10) Maloŵe gelega gakulosya mwatukusanonyelela abale ŵetu kutyocela pasi pamtima. Mtundu wacinonyelo welewu soni cinonyelo ca a·gaʹpe, yikusakamucisya kuti ŵandu ŵa Mlungu aŵe ŵakamulana mnope.

6. Ana Aklistu ŵasyesyene akusakuwona catuli kwanonyela abale?

⁶ Maloŵe gakuti “kwanonyela abale” gakusasimanikwa mnope m’mabuku ga Ciklistu. Kwa Ayuda, maloŵe gakuti “m’bale” nganigagamba gopolela ŵacinasi ŵawope, nambo Ayuda wosope. Ŵandu ŵa mitundu jine nganiŵakolangaga kuti abale. Nambope Aklistu ali ŵakutyocela m’mitundu jakulekanganalekangana. (Alo. 10:12) Mpela abale, Yehofa atujiganyisye kuti tunonyelaneje jwine ni mjakwe. (1 Ates. 4:9) Nambo ligongo cici tukusosekwa kwendelecela kwanonyela abale ŵetu?

LIGONGO CICI TUKUSOSEKWA KWENDELECELA KWANONYELA ABALE?

7. (a) Ana ligongo lyekulungwa lyakwanonyelela abale lili lyapi? (b) Asale ligongo line lyatukusosekwa kwanonyela mnope abale ŵetu.

⁷ Ligongo lyekulungwa lili lyakuti Yehofa ni jwakusasaka kuti tunonyelaneje. Nganituŵa tusasile kuti tukusamnonyela Yehofa nambo tuli mkuŵengana ni abale ŵetu. (1 Yoh. 4:7, 20, 21) Ligongo line lili lyakuti tukusasaka cikamucisyo kwa abale ŵetu mnopemnope patusimene ni yakusawusya. Paulo ŵamanyililaga kuti ŵane mwa Aklistu ŵaŵalembele cikalataco ŵaliji ŵakuti cajase ndundu syawo soni calece nyumba syawo. Pakwamba ya ndaŵiji, Yesu ŵasasile kuti jiciŵa ndaŵi jakusawusya mnope. (Maliko 13:14-18; Luk. 21:21-23) M’yoyo, Ayudawo ŵasosekwaga kunonyelanaga mnope pandaŵijo kupundana ni kalakose.—Alo. 12:9.

8. Ana tukusosekwa kutenda cici apanopano yisawusyo yakogoya mkaniyitande?

⁸ Pacangakaŵapa mbepo syakonanga cilambo capasi casigopole. (Maliko 13:19; Ciu. 7:1-3) Pandaŵi jelejo tucisosekwa kupikanila maloŵe gakuti, “Jemanja ŵandu ŵangu, ajawule akajinjile m’yipinda yawo yamkati ni akawugale matanga. Akajuŵe kwa kandaŵi mpaka lutumbilo luli lupite.” (Yes. 26:20) ‘Yipinda yamkati’ yeleyi mpaka yigopolele mipingo jatukusasongana ni abale ŵetu pakulambila Yehofa. Nambo kusongana mwakutamilicikape ngaŵa kwakwanila. Paulo ŵakumbwisye Aklistu Ŵacihebeli kuti ŵasosekwaga kujiwona misonganojo mpela upile wawo wakulimbikasyana pa “cinonyelo ni masengo gambone.” (Ahe. 10:24, 25) Tukusosekwa kutanda apanopano kwanonyela mnope abale ŵetu ligongo yeleyi yicitukamucisya patucisimana ni yakulingwa yekulungwa kusogoloku.

9. (a) Ana mpaka tulosye kuti tukusanonyela abale muyakutendekwa mpela yapi? (b) Asale yakutendekwa yakulosya kuti ŵandu ŵa Yehofa akusanonyelana.

⁹ Yisawusyo yakogoya mkaniyitande tukusosekwa kwanonyela mnope abale ŵetu. Abale ŵetu ŵajinji asimene ni ngosi syacipago mpela yisicinya, cikumba ca mesi, cimbungo cakogoya ni yine yejinji. Abale ŵane akulaga ligongo lyakwasisya soni akusimana ni yakulingwa. (Mat. 24:6-9) Konjecesya pelepa, tukusoŵa mbiya ligongo lya katangale jwagumbalene m’cilamboci. (Ciu. 6:5, 6) Yakusawusya payikutupilatupila tukusosekwa kuwuwona kuŵa upile wetu kulimbisya cinonyelo cetu pa abale. Atamose kuti moŵa agano ‘cinonyelo ca ŵandu ŵajinji cikunandipa,’ m’weji tukusosekwa kwendelecela kwanonyela abale.—Mat. 24:12.^[1]

ANA MPAKA TUTENDE CICI KUTI TUJENDELECELE KWANONYELA ABALE?

10. Ana citulole cici mungani ajino?

¹⁰ Moŵa agano tukusimana ni yakusawusya yejinji. Nambo, ana mpaka tutende cici kuti tujendelecele kwanonyela abale? Ana mpaka tulosye catuli kuti tukusanonyela abale? Paulo ali asasile kuti “Ajendelecele kwanonyela abale,” ŵasasilesoni matala gakulekanganalekangana gampaka tulocesye kuti tukusanonyela Aklistu acimjetu. Kwende tulole matala 6 gampaka tutendele yeleyi.

11, 12. Ana kwapocela cenene acalendo kukusagopolela cici? (Alole ciwulili cacili kundanda kwa nganiji.)

¹¹ “Akaliŵalila kwapocela cenene acalendo.” (Aŵalanje Ahebeli 13:2.) Maloŵe gakuti “kwapocela cenene acalendo” gakusagopolela “kwatendela yambone acalendo.” Yeleyi yikutukumbusya cisyasyo ca Abulahamu ni Loti. Acalume wosopeŵa ŵatendele yambone acalendo ŵangamanyilila. Acalendoŵa ŵaliji malayika. (Gen. 18:2-5; 19:1-3) Paulo ŵasasile cisyasyo ca Abulahamu ni Loti celeci pakusaka kwalimbikasya Aklistuwo kupocela cenene acalendo.

¹² Ana tukusitwaŵilanjila acalendo kumangwetu kuti tulye nawo kapena kuti tukunguluce nawo ni kulimbikasyana? Kwapocela cenene acalendo kwangasaka yindu yejinji. Soni ngatukusosekwa kwaŵilanjilape kumangwetu ŵandu ŵatukwawona kuti cacituwucisya m’litala line lyakwe. (Luk. 10:42; 14:12-14) Tukaliŵalila kuti cakulinga cetu cili kulimbikasyana ngaŵaga kwalosya ŵanduwo yindu yatukwete. Ana tukusalosya kuti tuli ŵakwapocela cenene acalendo mwakwapocela cenene ŵakulolela mkuli atamose kuti ngatukwamanyilila cenene? (3 Yoh. 5-8) Atamose kuti yakutenda yikusatutupila soni tukusalaga nganisyo lisiku ni lisiku tukusosekwape kuŵa ‘ŵakwapocela cenene acalendo.’

13, 14. Ana mpaka ‘twakumbucile catuli ŵandu ŵali kundende’?

¹³ “Ŵakumbucileje ŵali kundende.” (Aŵalanje Ahebeli 13:3.) Pa lilembali, Paulo nganagopolelaga ya mundu jwalijose jwali kundende. Nambo ŵasalaga ya abale ŵaŵataŵile ligongo lya cikulupi cawo. Paulo mkaniŵalembele Aklistu Ŵacihebeli maloŵega, ŵaliji ali amtaŵile yaka mcece munyumamo. (Afi. 1:12-14) Jwalakwe ŵayamicile abalewo ligongo ‘lyakwatendela canasa abale ŵaŵaliji kundende.’ (Ahe. 10:34) Ŵane mwa abalewo ŵamkamucisyaga Paulojo paŵaliji kundende, nambo ŵane ŵatamaga kwakutalika. Ana abale ŵaŵatamaga kwakutalikaŵa ŵamkamucisyaga mwatuli Paulo? Ŵamkamucisyaga mwakumpopelela kutyocela pasi pa mtima.—Ahe. 13:18, 19.

¹⁴ Moŵa aganosoni mpaka yikombolece kutama kwakutalika ni abale ŵane ŵali kundende. Mpaka yiŵe yakusawusya kwapa yakusosecela yawo mpela mwampaka atendele Ŵamboni ŵali ciŵandika ndendejo. Nambo mpaka tulosye kuti tukusatendela canasa soni tukusanonyela mwakwasala m’mapopelo getu ndaŵi ni katema. Mwambone, ana tukusapopelela abale ni alongo soni ŵanace ŵali kundende m’cilambo ca Eritrea kupwatikapo abale ŵatatu aŵa, Paulos Eyassu, Isaac Mogos, soni Negede Teklemariam ŵatemi kundendeko kwa yaka yakupunda 20?

15. Ana mpaka tucimbicisye mwatuli ulombela wetu?

¹⁵ “Ulombela uŵeje wakucimbicikwa kwa wosope.” (Aŵalanje Ahebeli 13:4.) Mpaka tulosyesoni kuti tukusanonyela abale ŵetu mwakwendelecela kuŵa ŵacasa mundamo syetu. (1 Tim. 5:1, 2) Mwambone, naga tutesile yamsese ni m’bale kapena mlongo mpaka kuŵe kumleŵela mundujo soni ŵamwiŵasa mwakwe. Ligongo lya yeleyi mpaka tulece kulupililana. (1 Ates. 4:3-8) Konjecesya pelepa, agambe ganicisya mwampaka apikanile mumtima jwamkongwe naga akopocele kuti ŵamkwakwe akusalolela yakuŵagula? Ana ndamo jeleji mpaka jilosye kuti akusiŵanonyela ŵamkwawo soni kucimbicisya ulombela?—Mat. 5:28.

16. Ana kwikutila kukusatukamucisya catuli kwanonyela abale ŵetu?

¹⁶ “Aŵeje ŵakwikutila ni yindu yakwete.” (Aŵalanje Ahebeli 13:5.) Kumkulupilila Yehofa kukusatukamucisya kuŵa ŵakwikutila. Kukusatutendekasya kuti tuyiwoneje yindu yakucilu m’litala lyakuŵajilwa. (1 Tim. 6:6-8) Kukusatukamucisya kumanyilila kuti unasi wetu ni Yehofa soni ni abale ŵetu uli wakusosekwa mnope kupunda cilicose campaka tucisume ni mbiya. Naga tuli ŵakwikutila, ngasitudandawula ya abale ŵetu kapena ya mwayiŵelele yindu paumi wetu, soni ngasituŵa ŵawiwu kapena ŵaumbombo. M’malo mwakwe kwikutila kucitulimbikasya kuŵa ŵakoloŵa magasa.—1 Tim. 6:17-19.

17. Ana kuŵa “ŵakulimba mtima” mpaka kutukamucisye catuli kuti twanonyeleje abale ŵetu?

¹⁷ ‘Aŵeje ŵakulimba mtima.’ (Aŵalanje Ahebeli 13:6.) Kumkulupilila Yehofa kukusatukamucisya kuŵa ŵakulimba mtima mwangasamala kandu ya yakusawusya yampaka tusimane nayo. Kulimba mtimaku ni kwakukusatutendekasya kola nganisyo syambone. Kuŵa ŵakulimba mtima soni kwanonyela abale ŵetu mpaka kutukamucisyesoni kuti twalimbikasyeje soni kwatondoya. (1 Ates. 5:14, 15) Atamose pandaŵi ja yisyawusyo yakogoya mpaka tuŵe ŵakulimba mtima pakumanyilila kuti cikulupusyo cetu ciŵandicile.—Luk. 21:25-28.

18. Ana mpaka tulimbisye catuli cinonyelo cetu kwa acakulungwa ŵa mumpingo?

¹⁸ “Ŵakumbucileje ŵakulongolela pasikati pawo.” (Aŵalanje Ahebeli 13:7, 17.) Patukuganicisya ya masengo gamakulungwa gakusakamula acakulungwa ŵa mumpingo mwetu, tukusayamicila soni kwanonyela mnope jemanjaji. M’yoyo, ngatukusosekwa kutenda yindu yampaka yatendekasye kuti akamuleje masengoga mwakudandawula. Mmalo mwakwe twapikanileje, soni ‘twacimbicisyeje mwacinonyelo ligongo lya masengo gawo.’—1 Ates. 5:13.

TUNONYELANEJE MNOPE

19, 20. Ana mpaka tutende wuli kuti tujendelecele kwanonyela mnope abale ŵetu?

¹⁹ Ŵamboni sya Yehofawe, tukusamanyika ligongo lya cinonyelo. Atamose ŵandu mu ndaŵi ja Paulo ŵamanyililagasoni yeleyi. Nambo jwalakwe ŵalimbikasisye abale ni alongo ‘kuti ajendelecele kunonyelana mnope.’ (1 Ates. 4:9, 10) M’yoyo, kwende ndaŵi syosope tupateje matala gakulosya kuti tukusanonyela abale ŵetu.

²⁰ Patukuganicisya mwakusokoka ya lilemba lya caka acino, tukusosekwa tuliwusyeje yiwusyo ayi: Ana mpaka losye catuli kuti ndili jwakwapocela cenene acalendo? Ana mpaka nakumbucile catuli abale ŵetu ŵali kundende? Ana ngusacimbicisya ulombela? Ana cici campaka cingamucisye kuŵa ŵakwikutila ni yindu yangwete? Ana mpaka ndende wuli kuti namkulupilileje mnope Yehofa? Ana mpaka ndende wuli kuti ngamulaneje mnope ni acakulungwa ŵa mumpingo? Naga tukamulicisya masengo mbali 6 syatutagulilenesi, nikuti lilemba lyetu lya caka acino ngasiligamba kuŵa mpela cikwangwani m’Nyumba jetu ja Ucimwene. Nambo licitukumbusyaga kuti ‘tujendelecele kwanonyela abale.’—Ahe. 13:1