Akadandawulaga

SONGA JA M’BAIBULO: ‘Alece kudandawula ya umi wawo.’—Matayo 6:25.

Ana songaji jikusagopolela cici? Maloŵe gelega, ŵaŵecete Yesu pa Kulalicila Kwapetumbi. Buku jine jagopolela maloŵe ga m’Baibulo jikusasala kuti, liloŵe lyacigiliki lyakuti ‘kudandawula’ mpaka ligopolele “yakusatenda mundu pasimene ni usawuci, sala soni yakusawusya yine ya lisiku ni lisiku.” Ŵanduwe tukusadandawulasoni pakwamba ya yindu yatukuganisya kuti yicitendekwa. Nganikuŵa kulemwa kuganicisya yakusosekwa ya paumi wetu soni ya ŵakunonyelwa ŵetu. (Afilipi 2:20) Nambo Yesu paŵaŵecete kuti, ‘akadandawulaga,’ ŵakalamusyaga ŵakumkuya ŵakwe kuti aŵambale kudandawula mnope ya malaŵi, yampaka yatendekasye kuti akasangalalaga.—Matayo 6:31, 34.

Ana songaji jili jakamucisya masiku agano? Tukusosekwa kupikanila maloŵe ga Yesuga. Ligongo cici? Mabuku gane gakusasala kuti naga mundu akudandawula mnope akusaŵa jwangasangalala ndaŵi syosope. Yakuyicisya yakwe yikusaŵa yakuti “mundu akusalaga ni ulwele wa yilonda ya m’matumbo, ulwele wa mtima soni mbumu.”

Yesu ŵasasile ligongo lyakwe ngatukusosekwa kudandawula mnope. Jwalakwe ŵawusisye kuti, ‘Ana ŵani mwa jemanja mpaka ajonjecesye umi wakwe panandi ligongo lyakudandawula?’ (Matayo 6:27) Ganicisya mnope yindu yatukudandawula ngaŵa mkutukamucisya konjecesya panandi umi wetu. Ndaŵi sine mwine yindu yine yatukogopayo ngaŵa mkutendekwa. Jwakulemba mabuku jwine jwaŵecete kuti: “Ndaŵi syejinji msogolo mukusaŵa mwambone kulekangana ni mwatukuganicisya.”

Ana mpaka tuŵambale catuli kudandawula mnope? Candanda, tukusosekwa kulupilila Mlungu. Naga Mlungu akusapeleka cakulya kwa yijuni soni kugaweca maluŵa ga kwitinji, ana jwalakwe ngasapeleka yakusosekwa paumi kwa ŵandu ŵele akusakuwona kulambila kuŵa kwakusosekwa mnope paumi wawo? (Matayo 6:25, 26, 28-30) Caŵili, tukadandawulaga mnope ya yindu yaciyitendekwe malaŵi. Yesu ŵaŵecete kuti, ‘Mkaŵa ŵakudandawula ni kuganicisya ya malaŵi. Ya malaŵi ni ya malaŵi.’ Ana ngakukamulana ni maloŵe gakuti, “lisiku lililyose lyana yakusawusya yakweyakwepe”?—Matayo 6:34.

Kupikanila maloŵe ga Yesuga, mpaka kutukamucisye kuŵa ŵakusangalala mnope. Nambo cakusosekwa mnope, tukusakola mtendele wamumtima, wakusawukolanga m’Baibulo kuti “mtendele wa Mlungu.”—Afilipi 4:6, 7.