NGANI JA PANDANDA | LIGONGO CICI TUKUSOSEKWA KUTENDAGA YINDU MWAKULUPICIKA?

Ana Ungakulupicika Ukusiwakwaya Catuli Wawojo?

“Yakusawusya yine mpaka uyimasye naga utesile yindu yangakulupicika panandi.”—Samantha, South Africa.

Ana akamulana ni maloŵe gelega? Mwakulandana ni Samantha, wosopewe tukusasimana ni yakusawusya ndaŵi ni katema. Yatukusatenda patusimene ni yindu yakulinga kulupicika kwetu, yikusalosya catukusaciwona kuŵa cakusosekwa mnope. Mwambone, naga tukusasaka kuti ŵandu atucimbicisyeje, ndaŵi sine mpaka tutendeje yangakulupicika kuti ŵanduwo akaleka kutucimbicisyako. Nambo ŵandu pamanyilile kuti tuli ŵangakulupicika, yakuyicisya yakwe yikusaŵa yakusawusya. Kwende tulole yisyasyo yakwe.

ŴANDU AKUSALEKA KUTUKULUPILILA

Mkamulano ukusalimba ligongo lya kulupililana. Naga ŵandu ŵaŵili akusakulupililana, akusalipikana kuti ali ŵakusunjika. Nambo yangagamba kutendekwa kuti mundu aŵe jwakulupicika. Kuti ŵandu atande kulupililana akusosekwa kutendela yindu yimpepe, kuŵecetana mwagopoka soni kutenda yindu mwangalinonyela. Kulupililana kukusasokonecela naga mundu agambile kutenda cindu cakulosya ungakulupicika. Payitendekwe yeleyi, yikusaŵa yakusawusya kuti mtandilesoni kulupililana.

Ana ndaŵi jine mundu juŵam’wonaga kuti ali mjawo jwambone, ŵatendelepo yindu yangakulupicika? Naga yili m’yoyo, ana ŵapikene wuli mumtima mwawo? Mwangakayicila, yeleyo yatumbilikasisye, mwinesoni nganakulupilila mwayatendecelemo. Tukakayicilaga kuti kuŵa jwangakulupicika panandipe mpaka kujonanje mkamulano wetu.

KUTENDA YINDU NI ŴANGAKULUPICIKA UKUSAJIGALILA UNGAKULUPICIKA

Namatetule pa kuŵalanjila mbiya Robert Innes jwa pa koleji ja California, paŵawungunyisye ŵasimene kuti “yili yangasawusya kujigalila yitendo yangakulupicika.” Ungakulupicika mpaka tuwulandanye ni kalombo kakutandisya ulwele. Naga tukunguluka ni mundu jwangakulupicika, nikuti nombe m’weji ‘tucijigalilasoni’ ungakulupicikawo.

Ana mpaka aŵambale catuli kugwila m’citega ca ungakulupicika? Baibulo mpaka jakamucisye. Kwende tulole yajikusasala Baibulo pa ngani jeleji.

Mitundu ja Ungakulupicika

Unami

ANA UNAMI NI CICI? Uli kuŵeceta yindu yanganiyiŵa yisyene kwa mundu jwakusosekwa kumanyilila yisyesyene. Unami ukusapwatikapo kujisinda ngani ni konjecesya yine kapena kusisa usyesyene wa nganijo ni cakulinga cakusaka kumsokonasya jwine jwakwe.

YAJIKUSASALA BAIBULO: ‘Yehofa akusaŵengana ni mundu jwakusakala, nambo akusiŵanonyela ŵakusatenda yacilungamo.’ (Miyambo 3:32) ‘Sambano, pakuŵa mjasile unami, jwalijose aŵeceteje yakuwona kwa jwine ni mjakwe.’—Aefeso 4:25.

Kusogoda

ANA KUSOGODA KULI KUTENDA CICI? Kuli kuŵeceta yaunami kapena yakusakala ya mundu jwine pakusaka konanga mbili jakwe

YAJIKUSASALA BAIBULO: ‘Jwakusakala akusatandisya mjojo, jwamabosa akusiŵaŵenganya ŵandu ŵapaulongo.’ (Miyambo 16:28) ‘Moto ukusasima naga sasu pangali, m’yoyosoni ku malo kwele kwangali jwakusogoda acimjakwe, kangana ngasikupagwa.’—Miyambo 26:20.

Ulamba

ANA ULAMBA NI CICI? Kuli kum’wumbatisya mundu mbiya kapena yindu yine yakwe pakusaka kusokonasya cilungamo.

YAJIKUSASALA BAIBULO: ‘Mkasimumtendela yaulamba jwamasengo jwenu jwakulaga.’ (Deuteronomo 24:14, 15) ‘Jwakusatendela ngalwe mundu jwakulaga akusamyosya Mlungu juŵampanganyisye mundujo, nambo jwakusiŵasalalila mtima ŵakulaga akusamcimbicisya Mlungu.’—Miyambo 14:31.

Kwiŵa

ANA KWIŴA KULI KUTENDA CICI? Kuli kujigala yindu yanganiyiŵa yakwe nambo mwangaŵenda.

YAJIKUSASALA BAIBULO: ‘Jwakwiŵajo akasajiŵasoni, nambo akamule masengo mwakulimbika; nikutenda yambone ni makono gakwe kuti apate kandu kakwapa ŵakulaga.’ (Aefeso 4:28) ‘Mkalilambusya. . . . Ŵawiyi, ŵaumbombo, ŵakolelwa, ŵakwasinjilila ŵane, kapena ŵakusumula, wosopewo ngasajinjila mu Ucimwene wa Mlungu.’—1 Akolinto 6:9, 10.