Mesomkulola ga Yohane

Ndumetume Yohane paŵaliji mkayidi pa cilumba ca Patimo, Yesu ŵamlosisye jwalakwe mesomkulola gakwana 16, kapena kuti yiwulili ya yindu yayicitendekwa kusogolo. Mesomkulola gelega galosisye yayicitendekwa kuti lina lya Yehofa liswejesyedwe, muwuciyicila Ucimwene wakwe. Soni yayicitendekwa kuti lisosa lyakwe likwanilicikwe pacilambo capasi mpela mwayiŵelele kwinani.

M’mesomkulola gane, Yohane ŵam’weni Yehofa ali pacitengu cakwe ca ucimbicimbi kwinani. Citenguci casyungulilidwe ni acakulungwa 24 ŵaŵawete yakuwala yeswela, soni ŵawete yisoti ya golidi kumtwe kwawo. Kucitenguko kwatyocelaga kumesya kwa njasi soni masegwe ga cilindimo. Acakulungwa 24 ŵala ŵaliji kumtindiŵalila Yehofa soni kumlambila. M’mesomkulola ganesoni, Yohane ŵaliweni likuga lyekulungwa lya ŵandu lyakulambila Yehofa, lyakutyocela m’mitundu josope ja ŵandu soni m’yiŵeceto yosope. Mwanace jwa Ngondolo, jwali Yesu, jwaliji mkulicinga likugalyo soni kulijigalila ku mesi ga umi. Kaneko m’mesomkulola gane, Yesu ŵatandite kulamulila mpela Mwenye kwinani yalumo ni acakulungwa 24 ŵala. M’mesomkulola gakuyicisya, Yohane ŵam’weni Yesu ali mkumenyana ni cimjoka, cacili Satana, yalumo ni misimu jine jakusakala. Kaneko Yesu ŵatopwele jemanjaji kwinani, ni kwaponya pacilambo capasi.

Kaneko Yohane ŵaciweni ciwulili cakusalala ca Mwanace jwa Ngondolo yalumo ni ŵa 144,000 ali ajimi Petumbi lya Siyoni. Jwalakwe ŵaliwenisoni lilayika lili mkuguluka mwakusyungulila cilambo capasi, ni lyasalilaga ŵandu kuti amjogope Mlungu soni ampe ucimbicimbi.

Kaneko, Yohane ŵajiweni ngondo ja Alamagedo jili mkutendekwa. Pangondojo, Yesu ni asilikali ŵakwe ŵacigomece cilambo cakusakala ca Satana. M’mesomkulola gakumalisya, Yohane ŵawuweni mkamulano wambone wawapali kwinani soni pacilambo capasi. Satana ni ŵakumkuya ŵakwe ŵajonanjidwe. Jwalijose kwinani soni pacilambo capasi jwalicimbicisyaga lina lya Yehofa, soni jwaliji mkulambila jwalakwe jika.