Lilayika lya Yehofa Lyamkulupwisye Hesekiya

Asiliya ŵatandite kulamulila ucimwene wa ngosyo 10 sya Ayisalayeli. Sambano Senakelibu mwenye jwa Asiliya, jwasakagasoni kuti alamulileje ngosyo siŵili sya ucimwene wa Yuda. M’yoyo jwalakwe jwatandite kusumula misinda ja ku Yuda mwapanandipanandi. Nambo jwalakwe ŵawusakaga mnope msinda wa Yelusalemu. Nambo Senakelibu nganamanyilila kuti Yehofa akuwucenjela msindawo.

Hesekiya juŵaliji mwenye jwa m’cilambo ca Yuda, jwampele Senakelibu mbiya syejinji kuti akasumula msinda wa Yelusalemu. Atamose kuti Senakelibu jwapocele mbiyasyo jwalakwe jwatumisyepe asilikali ŵakwe ŵamacili kuti akasumule msinda wa Yelusalemu. Asiliya paŵaliji mkuŵandicila msindawo, ŵanduwo wakamwile woga. Ni Hesekiya ŵatite, ‘Akatenda woga, Asiliya ali ŵamacili nambo Yehofa catutendekasye kuŵa ŵamacili mnope kupunda jemanjajo.’

Senakelibu ŵamtumisye Labisaki kukwanyosya ŵandu ŵa ku Yelusalemu. Labisaki ŵajimi kusa kwa msindawo ni ŵagumisile kuti, ‘Yehofa nganaŵa amkamucisye jemanja. Akakunda kuti Hesekiya ŵalambusye. Pangali mlungu jwampaka ŵakulupusye jemanja m’miyala mwetu.’

Hesekiya ŵaŵendile lunda kwa Yehofa. Ni Yehofa ŵamsalile kuti, ‘Mkatenda woga ni yaŵecete Labisaki. Senakelibu ngaŵa mkusumula Yelusalemu.’ Kaneko Hesekiya jwapocele yikalata kutyocela kwa Senakelibu. Mu yikalatayo mwaliji maloŵe gakuti, ‘Mgambe kwimika makono, Yehofa nganaŵa amkulupwisye.’ Hesekiya ŵapopesile kuti, ‘Conde Yehofa atukulupusye, kuti jwalijose camanyilile kuti wawo ali Mlungu jusyesyene.’ Yehofa ŵamsalile kuti, ‘Mwenye jwa Asiliya ngayika mu Yelusalemu. Cinjiwucenjela msinda wangu.’

Senakelibu jwakulupililaga kuti cawusumule msinda wa Yelusalemu. Nambo lisiku line cilo, Yehofa ŵatumisye lilayika kumalo gaŵatamaga asilikali ŵa Asiliya kusa kwa msindawo. Lilayikalyo lyawuleje asilikali ŵa Asiliya ŵakwana 185,000. Asilikali wosope ŵa Senakelibu ŵawile. Pelepa jwalakwe nganakolasoni cakutenda nambo kuwujila kumangwakwe. Yehofa ŵakulupwisye Hesekiya soni Yelusalemu mwakamulana ni maloŵe gakwe. Yikaŵe kuti mmwejo mwapali ku Yelusalemu, ana mkakulupilile Yehofa?