Ŵamkwawo Mwenye Ahabu Akupocela Cilango

Kupitila paliwindo lya nyumba jakwe ku Yeseliyele, mwenye Ahabu ŵawuwonaga mgunda wa mipeleya wa Naboti. M’yoyo Ahabu ŵasakaga kuti mgundawo uŵe wakwe. Ni ŵalinjilile kuti asuma mgundawo kwa Naboti. Nambo Naboti jwakanile kusumisya mgundawo. Ŵakanile ligongo kutenda yeleyo kwaliji kasa lilamusi lya Yehofa lya malo ga pamtundu. Ana Ahabu ŵapikanile nganisyo syambone sya Naboti? Iyayi. Jwalakwe jwatumbile mwamti nganajimukaga pacindanda cakwe, soni jwakanaga kulya.

Yesebele ŵamsalile Ahabu ŵaŵaliji ŵamkwakwe kuti, ‘Wawojo ali mwenye jwa Ayisalayeli. Komboleka kola cilicose cakusaka. Cinapatile mgunda welewo.’ M’yoyo jwalakwe jwalembele yikalata acakulungwa ŵa mumsinda. Ni ŵasalile kuti amjimbe Naboti magambo gakuti ŵamnyosisye Mlungu. Kaneko am’wulaje mwakumponya maganga. Acakulungwa ŵala ŵatesile yaŵasasile Yesebele. Kaneko jwalakwe jwamsalile Ahabu kuti, ‘Naboti jula awile, akajigale mgunda wula.’

Yesebele ŵawuleje ŵandu ŵajinji ŵangalemwa kupwatikapo ŵaŵalambilaga Yehofa. Yesebele jwalambilaga milungu jakupanganyidwa soni jwatesile yakusakala yejinji. Yehofa ŵayiweni yakusakala yosope yaŵatendaga Yesebele. Nambo ana Yehofa ŵatesile cici ni jwamkongweju?

Ahabu ali awile, mwanagwe jwakolanjikwa Yeholamu jwaŵele mwenye. Yehofa ŵatumisye jwamlume jwakolanjidwa kuti Yehu kukupeleka cilango kwa Yesebele ni liŵasa lyakwe.

Yehu jwakwesile ligeleta lyakwe ni kwawula ku Yeseliyele kuŵatamaga Yesebele. Yeholamu ŵayice kukusimana ni Yehu. Ali asimene, ŵam’wusisye kuti, ‘Ana m’yicile mtendele?’ Yehu ŵajanjile kuti, ‘Pangali mtendele ligongo mama ŵenu akutenda yakusakala.’ Kaneko Yeholamu ŵagalawisye ligeleta lyakwe kuti awujileje. Nambo Yehu ŵamsomile Yeholamu ni mpamba mwamti ŵawile.

Kaneko Yehu ŵapite kunyumba ja Yesebele. Jwalakwe ali apikene kuti Yehu akwisa ŵalisalalisye ni ŵamjembeceyaga ali atemi ciŵandika ni liwindo lya nyumba ja mwinani. Yehu ali ayice, Yesebele ŵamkomasisye mwacipongwe. Kaneko Yehu ŵasalile ŵakutumicila ŵakwe ŵaŵajimi ciŵandika ni Yesebele kuti, ‘Amponye pasi!’ Jemanjajo ŵamtutile Yesebele kusa kwa liwindo lila ni jwagwilile pasi ni jwawile.

Yili yitendekwe yeleyi, Yehu jwawuleje ŵanace ŵa Ahabu ŵakwana 70 soni ŵamasisye kulambila Bala. Ana mkuyiwona kuti Yehofa akusamanyilila cilicose soni akusiŵapaga cilango ŵakutenda yakusakala pandaŵi jakwe?