Yehofa Akuŵeceta ni Samuyele

Jwamkulungwa jwa ŵambopesi Eli, jwakwete ŵanace ŵacalume ŵaŵili ŵaŵatumicilaga mpela ŵambopesi panyumba jakulambilila. Mena gawo galiji, Hofini soni Pinihasi. Jemanjaji nganapikanilaga malamusi ga Yehofa, soni ŵatendelaga ŵandu yangalwe. Naga Ayisalayeli ayice ni mbopesi kwa Yehofa, Hofini soni Pinihasi ŵajigalaga nyama jambone kuti jiŵe jawo. Eli jwapikene yaŵatendaga ŵanace ŵakweŵa, nambo pangali ciŵatesile ni nganijo. Ana Yehofa ŵagambile kuyileka yeleyi kuti yitendekweje?

Atamose kuti Samuyele jwaliji mwanace pakumlandanya ni Hofini soni Pinihasi, jwalakwe nganajigalila yaŵatendaga jemanjajo. Yehofa ŵasangalalaga ni Samuyele. Lisiku line Samuyele ali mkugona jwapikene kuŵilanga. Jwajimwice ni kuwutucila kwa Eli, ni jwatite, ‘Mbicetu!’ Nambo Eli jwatite, ‘Nganinam’ŵilanga mjawule mkagone.’ Samuyele jwawujile kugona. Kaneko jwapikenesoni kuŵilanga katatu, ni jwawutucilesoni kwa Eli. Pandaŵiji Eli jwayimanyi kuti Yehofa ni juŵam’ŵilangaga Samuyele. M’yoyo jwalakwe jwamsalile Samuyele kuti, pacakapikanesoni kuŵilanga, akajanje kuti, ‘Aŵecete, Yehofa. Kapolo jwawo akupikana.’

Samuyele jwawujile kugona. Kaneko jwapikenesoni kuŵilanga kuti, ‘Samuyele! Samuyele!’ Jwajanjile kuti, ‘Aŵecete, kapolo jwawo akupikana.’ Yehofa ŵamsalile Samuyele kuti, ‘Mumsalile Eli kuti cinjimpa cilango yalumo ni liŵasa lyakwe. Akumanyilila kuti ŵanace ŵakwe ŵacalume akutenda yakusakala panyumba jangu jakulambilila, nambo jwalakwe ngakutenda cilicose.’ Lisiku lyakuyicisya Samuyele jwawugwile milango ja nyumba jakulambilila mpela muŵatendelaga masiku gosope. Jwalakwe jwajokopaga kumsalila jwamkulungwa jwa ŵambopesi yaŵaŵecete Yehofa yila. Nambo Eli ŵam’ŵilasile ni kum’wusya kuti, ‘Mwanangu, ana Yehofa amsalile cici? Musalile yosope.’ Kaneko Samuyele jwasasile yosope.’

Samuyele paŵakulaga, Yehofa ŵajendelecele kuŵa najo. Ayisalayeli wosope ŵayimanyi kuti Yehofa ŵamsagwile Samuyele kuŵa jwakulocesya soni jwakwelusya.