Akutenda Cilanga ni Yehofa

Pali pamasile miyesi jiŵili cityocele ku Iguputo, Ayisalayeli ŵayice ku Litumbi lya Sinayi, ni ŵataŵile masakasa gawo kweleko. Kaneko Yehofa ŵam’ŵilasile Mose, ni jwalakwe jwakwesile m’litumbilyo. Yehofa ŵamsalile kuti, ‘Ngulupwisye Ayisalayeli. Naga jemanjaji cambikanile soni kusunga malamusi gangu, caciŵa ŵandu ŵangu ŵakusosekwa mnope.’ Kaneko Mose ŵatulwice m’litumbilyo ni kuwujila kwa Ayisalayeli ni ŵasalile yaŵasasile Yehofa. Ana Ayisalayeli ŵatesile cici ali apikene yaŵasalile Moseyo? Jemanjajo ŵajanjile kuti, ‘Tucitenda yiliyose yakusaka Yehofa kuti tutende.’

Mose ŵakwesilesoni mwitumbimo, ni Yehofa ŵamsalile kuti, ‘Panyuma pa masiku gatatu, cimbecetesoni ni mmwejo. Mwakalamusye ŵandu kuti akalinga ata panandi kwela Litumbi lya Sinayi.’ Kaneko Mose ŵatulwice m’litumbilyo ni ŵasalile Ayisalayeli kuti akosece kupikanila maloŵe ga Yehofa.

Palisiku lyatatu, Ayisalayeli ŵakuweni kumesya kwa njasi soni ŵagaweni mawunde gepiliwu penani pa litumbilyo. Ŵapikenesoni kulindima kwamacili kwa njasi soni lisegwe lya citolilo ca sengo. Kaneko Yehofa ŵatulwice m’litumbilyo mpela moto. Ayisalayeli wakamwile mnope woga mwamti ŵatetemelaga. Litumbi lyosopelyo lyatenganyice mwamacili mnope soni lyosi lyaliji palipose m’litumbilyo. Lisegwe lya yitolilo ya sengo yajendelecele kupikanika mwamacili mnope. Kaneko Mlungu ŵatite, ‘Une ndili Yehofa. Mkalambilaga milungu jine.’

Mose ŵawujilesoni mwitumbimo, ni Yehofa ŵampele malamusi gakuti gakamucisyeje pakamlambile soni pakatame kawo. M’yoyo Mose ŵagalembile malamusigo ni ŵagaŵalasile kwa Ayisalayeli. Jemanjajo ŵatesile cilanga ni Mlungu cakuti, ‘Tucitenda yiliyose yakusaka Yehofa kuti tutende.’ Nambo ana jemanjaji ŵasunjile cilangaci?