Jwawuleje Mundu Ligongo Lyakutumbila

Panyuma pakuti Adamu ni Hawa ŵatopwele mu mgunda wa Edeni, ŵakwete ŵanace ŵajinji. Mwanagwawo jwandanda jwaliji Kaini. Jwalakwe jwaliji namalima. Soni mwanagwawo jwaŵili jwaliji Abele juŵaliji mkucinga.

Lisiku line Kaini ni Abele ŵapelece mbopesi kwa Yehofa. Ana mkumanyilila kuti mbopesi ni cici? Jili mtuka wapajika. Yehofa ŵasangalele ni mbopesi ja Abele nambo nganasangalala ni mbopesi ja Kaini. Yeleyi yamtumbilikasisye mnope Kaini. Yehofa ŵamkalamwisye Kaini kuti kutumbila kwakweko mpaka atende nako cakusakala. Nambo Kaini nganapikanila.

M’malo mwakwe, Kaini ŵamsalile Abele kuti, ‘Kwende tujawule kumigunda.’ Jemanjajo ŵaliji ŵaŵilipe kumigundako ni kaneko Kaini ŵam’wuleje Abele. Ana Yehofa ŵatesile cici ni yayatendekweyi? Jwalakwe ŵampele cilango Kaini pakumtumisya kumalo gakutalikangana ni liŵasa lyawo. Jwalakwe nganamkunda kuti awujilesoni.

Ana pana lijiganyo lililyose kwa m’weji? Mpaka tutande kutumbila naga yindu ngayikwenda mwatwaganicisyaga. Naga tukuyiwona kuti tutumbile kapena ŵane atukalamwisye ligongo lyakutumbila kwetu, tukusosekwa kucenga mwacitema mkanitutande kutenda yangaŵajilwa ligongo lyakutumbilako.

Ligongo lyakuti Abele ŵamnonyelaga Yehofa nambosoni ŵatendaga yakuŵajilwa, Yehofa akusamkumbucila ndaŵi syosope. Mlungu cacimjimusya jwalakwe kuŵawe pacacilinganyaga cilamboci kuŵa paladaiso.