MBALI 5
Awujile kwa ‘Mkucinga Soni Jwakulolela Umi Wawo’
Ana mwayiŵelele yindu paumi wawo yikulandana ni ngani sine syakatagulile kabukuka? Naga yili m’yoyo nikuti nganaŵa jika. Ŵajinji mwa ŵakutumicila ŵakulupicika ŵa Mlungu, mundaŵi sya m’Baibulo soni moŵa agano, ŵapakombwele kumalana ni yakusawusya yampela yawawojo ni cikamucisyo ca Yehofa. Jwalakwe mpaka ŵakamucisyesoni wawojo.
Yehofa cacakamucisya kuti awujilesoni kwa jwalakwe
YEHOFA akwasimicisya kuti cacakamucisya kuti awujilesoni kwa jwalakwe. Cacakamucisya kumalana ni kulagasika nganisyo, yindu yayatumbilikasisye, soni cacakamucisya kola mtendele wa mumtima ligongo lyakuŵa ni cikumbumtima cambone. Kaneko, cacitandilasoni kumtumicila Yehofa ni ŵakulambila acimjawo. Mwayiŵelele yindu paumi wawo yikulandana ni mwayaŵelele kwa Aklistu ŵa mu yaka 100 yandanda. Pakuŵeceta ya jemanjaji Petulo ŵatite, ‘Mwaliji mpela ngondolo syesokonecele, nambo sambano m’wujilile kwa mkucinga soni jwakulolela umi wenu.’—1 Petulo 2:25.
Kuwujila kwa Yehofa kuli cindu cakusangalasya mnope campaka atende. Ligongo cici tukuti m’yoyo? Ligongo lyakuti cacisangalasya mtima wa Yehofa. (Miyambo 27:11) Wawojo akumanyilila kuti yitendo yetu yikusamkwaya Yehofa. Nambo Yehofa jwangatukanganicisya kuti tumnonyeleje kapena kuti tumtumicileje. (Deuteronomo 30:19, 20) Jwamlijiganye ya Baibulo jwine ŵatite, “Pangali jwampaka awugule mtima wa mundu jwine, nambo jwalijose akusawuwugula jika.” Patukumlambila Yehofa ligongo lyakuti tukusamnonyela, nikuti tukundile kuwugula mtima wetu. Patukumlambila mwakulupicika tukusaŵa mpela tukumpa mtuka wapenani soni tukusasangalasya mnope mtima wakwe. Kusala yisyene, pangali cindu cine cakusangalasya kupunda kumlambila Yehofa.—Masengo 20:35; Ciunukuko 4:11.
Konjecesya payosopeyi, patukutandilasoni kumlambila Yehofa, tucimasya yakusoŵa yetu yausimu. (Matayo 5:3) Mwatuli? Ŵandu akusaliwusya kuti, ‘Ligongo cici tukusimanikwa pacilambo capasi pano?’ Akusasoŵa kupata kwanga kwa yiwusyo yakwamba cakulinga ca umi. Yehofa ŵatupanganyisye ni mtima wakusacilila kupata kwanga kwa yiwusyo mpela yeleyi. Ŵatupanganyisyesoni m’litala lyakuti tuŵeje ŵakwikutila patukumtumicila. Pangalisoni cindu campaka tusangalale naco mnope kupunda kummanyilila Yehofa soni kumlambila ligongo lyakuti tukusamnonyela.—Salimo 63:1-5.
Akusosekwa kumanyilila kuti Yehofa akusaka kuti wawojo awujile kwa jwalakwe. Ana mpaka asimicisye catuli yeleyi? Pakulinganya kabukuka twapopesile kwa Yehofa kuti atukamucisye. Mwine komboleka kuti jwamkulungwa jwa mumpingo kapena jwakulupilila mjawo ni jwaŵapele kabukuka. Kaneko ŵatandite kukaŵalanga ni kutenda mwakamulana ni yaŵalasile. Yosopeyi yikulosya kuti Yehova akwakumbucilape. Jwalakwe akwawuta kuti awujile.—Yohane 6:44.
Yikusatulimbikasya patukumanyilila kuti Yehofa ngaŵa mkwaliŵalila ŵakulambila ŵakwe ŵaŵalesile kutenda yindu ni mpingo wakwe. Ni ligongo lyakwe mlongo jwine lina lyakwe Donna pakuyamicila ŵaŵecete kuti, “Natandite panandipanandi kuleka usyesyene, nambo lilemba lya Salimo 139:23, 24 lyalimbikasyaga. Likusati, ‘Ambungunye une Mlungu, soni awumanyilile mtima wangu. Ambungunye une, soni amanyilile nganisyo syangu syakudandawula. Andole naga pana cacikundendekasya kwenda m’litala lyangalumbana, soni alongolele m’litala lyangamala.’ Namanyililaga kuti naliji jwangaŵajilwa kuŵa mbali jacilamboci nambo kuŵa m’likuga lya Yehofa. Natandite kuliwona kuti Yehofa ngananjasa, nambo nagambaga kusosekwa kuti mbate litala lyakuti mbujilesoni kwa jwalakwejo. Apano ngusangalala mnope ligongo lyakuti nawujile!”
“Natandite kuliwona kuti Yehofa ngananjasa, nambo nagambaga kusosekwa kuti mbate litala lyakuti mbujilesoni kwa jwalakwejo”
Tukwapopelela kutyocela pasi pamtima kuti nombe nawo apatesoni “kusangalala kwakutyocela kwa Yehofa.” (Nehemiya 8:10) Ngasaligamba naga akuwujila kwa Yehofa.