Ana Ngusosekwa Kulipeleka Kwa Mlungu Soni Kubatiswa?

1. Ana panyuma pakulijiganya bukuji mpaka atande kuliwusya yamtuli?

ALIJIGANYISYE yejinji yakwamba usyesyene wa m’Baibulo kutyochela m’buku ajino. Yine mwa yeleyi yili chilanga cha Mlungu cha umi wangamala, ndamo ja ŵawe, soni chembecheyo chatukwete chakwamba kwimuka ku ŵawe. (Jwakulalichila 9:5; Luka 23:43; Yohane 5:28, 29; Chiwunukuko 21:3, 4) Komboleka kuti atandite kusimanikwa pamisongano ja Mboni sya Yehofa, soni kulupilila kuti jemanjaji ni ŵakusalambila mu usyesyene. (Yohane 13:35) Kombolekasoni kuti atandite kuŵa paunasi wakulimba ni Yehofa, soni akusaka kuti amtumichileje. M’yoyo mpaka aliwusye kuti, ‘Ana ngusosekwa kutenda yamtuli kuti namtumichileje Mlungu?’

2. Ana ligongo chichi mundu jwa ku Itiyopiya jwasakaga kubatiswa?

² Mwelemu ni muŵapikanilesoni mundu jwa ku Itiyopiya juŵatemi mu ndaŵi ja Yesu. Ndaŵi jine panyuma pakuti Yesu ajimwiche ku ŵawe, jwakulijiganya jwakwe jwakolanjikwa kuti Filipi jwamlalichile munduju. Filipi jwamsimichisye mundujo kuti Yesu jwaliji Mesiya. Paŵapikene yeleyi, mundu jwa ku Itiyopiya jula yamkamwile mtima, mwati ndaŵi jijojo jwatite, “Alole mesi. Chichi chachikundekasya kubatiswa?”—Masengo 8:26-36.

3. (a) Ana Yesu ŵalamwile chichi ŵakumkuya ŵakwe? (b) Ana mundu akusosekwa kubatiswa mwatuli?

³ Baibulo jikusajiganya mwakupikanika chenene kuti naga mundu akusaka kumtumichila Yehofa akusosekwa kubatiswa. Yesu ŵasalile ŵakumkuya ŵakwe kuti, ‘Akajiganye ŵandu ŵa mitundu josope kuti aŵe ŵakulijiganya ŵangu, soni akabatisyeje.’ (Mateyu 28:19) Yesu ŵapeleche chisyasyo mwakubatiswa msyene. Jwalakwe paŵabatiswaga chilu chakwe chosope chatiŵile m’mesi, nganagamba kumtaga mesi pamtwe. (Mateyu 3:16) Masiku aganosoni, Mklistu pakubatiswa, chilu chakwe chosope chikusasosekwa kutiŵila m’mesi.

4. Ana mundu pabatiswe akusiŵalosyaga chichi ŵane?

⁴ Mundu pabatiswe akusalosyaga kuti akusaka kuŵa paunasi ni Mlungu soni kuti akusaka kumtumichila. (Salimo 40:7, 8) M’yoyo mpaka aliwusye kuti, ‘Ana ngusosekwa kutenda yamtuli kuti mbatiswe?’

AMMANYILILE MLUNGU SONI AKOLE CHIKULUPI

5. (a) Ana chindu chapi chandanda chakusosekwa kutenda mkanabatiswe? (b) Ana misongano ja chiklistu jili jakusosekwa ligongo chichi?

⁵ Mkanabatiswe akusosekwa kummanyilila Yehofa soni Yesu. Atandite kala kwamanyilila jemanjaji mwakulijiganya Baibulo. (Aŵalanje Yohane 17:3.) Nambo kwamba kulijiganya ngaŵa kwakwanila. Baibulo jikusasala kuti akusosekwa “umanyilisi usyesyene wakwanila” wa chakulinga cha Yehofa. (Akolose 1:9) Kusimanikwa kwawo pamisongano ja Mboni sya Yehofa kuchakamuchisya kuti akole unasi wakulimba ni Yehofa. Lyeleli ni ligongo lyakwe akusosekwa kusimanikwa pamisonganoji mwakutamilichika.—Ahebeli 10:24, 25.

6. Ana akusosekwa kumanyilila yindu yejinji mwatuli ya m’Baibulo mkanabatiswe?

⁶ Yehofa jwangajembecheya kuti amanyilile chilichose chachili m’Baibulo mkanabatiswe. Jwalakwe nganajembecheyaga kuti mundu jwa ku Itiyopiya jula amanyilile yosope mkanabatiswe. (Masengo 8:30, 31) Kulijiganya ya Yehofa ngasikumala. (Jwakulalichila 3:11) Nambo mkanabatiswe akusosekwa kumanyilila soni kwitichisya yijiganyo yandanda ya m’Baibulo.—Ahebeli 5:12.

7. Ana kulijiganya Baibulo kwakamuchisye chamtuli wawojo?

⁷ Baibulo jikusati, “Naga ngakola chikulupi ngakomboleka kumsangalasya Mlungu.” (Ahebeli 11:6) M’yoyo akusosekwa kola chikulupi mkanabatiswe. Baibulo jikusatusalilasoni kuti ŵandu ŵane ŵa mumsinda wa ku Kolinto ali apikene yaŵajiganyaga ŵakumkuya ŵa Yesu yakuyichisya yakwe yaliji yakuti, “ŵatandite kulupilila soni ŵabatiswe.” (Masengo 18:8) Mwakulandana ni jemanjaji, kulijiganya kwawo Baibulo kwakamuchisye kuti akulupilileje yalaguchisye Mlungu soni machili ga mbopesi ja Yesu jampaka jitukulupusye ku ulemwa ni chiwa.—Yoswa 23:14; Masengo 4:12; 2 Timoteo 3:16, 17.

ŴASALILEJE ŴANE USYESYENE WA M’BAIBULO

8. Ana chichi champaka chalimbikasye kwasalila ŵane yalijiganyisye m’Baibulo?

⁸ Pakulijiganya yejinji kutyochela m’Baibulo soni kulola mwayikuti kakamuchisye paumi wawo yalijiganyisyeyo, chikulupi chawo chichiŵa chakulimba. Yeleyi yichatendekasya kuŵa ŵakusachilila kwasalila ŵane yakulijiganyayo. (Yelemiya 20:9; 2 Akolinto 4:13) Nambo ana akusosekwa kwasalila ŵani?

9, 10. (a) Ana mpaka atande kwasalila ŵani yalijiganyisye m’Baibulo? (b) Ana akusosekwa kutenda chichi naga akusaka kulalichilaga yalumo ni mpingo?

⁹ Komboleka kwasalila yakulijiganyayo ŵandu ŵamwiŵasa mwawo, achimjawo, ŵakuŵandikana nawo nyumba, soni ŵakusakamulana nawo masengo. Kutenda yeleyi kuli kwakusosekwa, nambo akusosekwa kutenda yeleyi mwachinonyelo. Mkupita kwandaŵi chachitanda kulalichila yalumo ni mpingo. Naga akoseche kulalichila yalumo ni mpingo, mpaka amsalile Jwamboni jwakusiŵajiganya wawojo Baibulo. Akusosekwa kumsalila kuti akusaka kuti alalichileje yalumo ni mpingo. Naga jwalakwejo akuyiwona kuti wawojo ali ŵakuŵajilwa soni kuti akutama mwakamulana ni yajikusasalaga Baibulo, nikuti wawojo yalumo ni jwakwajiganya Baibulojo chachisosekwa kusimana ni achakulungwa ŵaŵili ŵa mumpingo.

¹⁰ Ana pasimene ni achakulungwawo pachitendekwa yamtuli? Jemanjajo chachawusya yiwusyo wawojo kuti alole naga akupikanichisya soni kulupilila yijiganyo yandanda ya Baibulo, soni naga akusapikanila yajikusasalaga Baibulo paumi wawo lisiku lililyose, soni naga yili yisyene kuti akusaka kuŵa Jwamboni sya Yehofa. Amanyilile kuti achakulungwa ŵa mumpingo akusasamalilaga ŵandu wosope mumpingo, kupwatikapo wawojo, m’yoyo ngakusosekwa kwajogopa pakuŵechetana nawo. (Masengo 20:28; 1 Petulo 5:2, 3) Pambesi pakusimanaku, achakulungwawo chachamanyisya naga akuŵajilwa kutanda kulalichila yalumo ni mpingo.

11. Ana ligongo chichi akusosekwa kuchenga yindu paumi wawo mkanatande kulalichila yalumo ni mpingo?

¹¹ Achakulungwawo komboleka kwasalila kuti akusosekwa kuchenga yejinji paumi wawo mkanatande kulalichila yalumo ni mpingo. Ana ligongo chichi akusosekwa kuchenga umi wawo? Lili ligongo lyakuti pakwasalila ŵane yakwamba Mlungu, akusaŵa kuti akutenda yeleyo m’malo mwa Yehofa, m’yoyo akusosekwa kutendaga yindu yakumchimbichisya paumi wawo.—1 Akolinto 6:9, 10; Agalatiya 5:19-21.

KUPITIKUKA MTIMA SONI KUGALAWUKA

12. Ana ligongo chichi ŵandu wosope akusosekwa kupitikuka mtima?

¹² Panasoni chindu chine chakusosekwa kutenda mkanabatiswe. Ndumetume Petulo jwatite, “M’yoyo, apitikuche mtima, ni kugalawuka kuti yakulemwa yawo yikululuchikwe.” (Masengo 3:19) Ana kupitikuka mtima kukusagopolela chichi? Kukusagopolela kulitendela chanasa ligongo lya yakulemwecheka yatutesile. Mwachisyasyo, naga ŵaliji mundu jwakunonyela kutenda yachikululu, mpaka asosekwe kupitikuka mtima. Atamose kuti aŵele ali mkulinga kutenda yindu yakuŵajilwa, nambo akusosekwape kupitikuka mtima ligongo lyakuti wosopewe tuli ŵakulemwa. M’yoyo tukusasosekwa kum’ŵendaga Mlungu kuti atukululuchileje.—Aloma 3:23; 5:12.

13. Ana “kugalawuka” kukusagopolela chichi?

¹³ Nambo ana kwamba kulitendela chanasa kuli kwakwanila? Iyayi. Petulo jwasasile kuti akusosekwasoni “kugalawuka.” Yeleyi yikugopolela kuti akusosekwa kuŵambala ndamo jilijose jakusakala jaŵatendaga nikutanda kutenda yakuŵajilwa. Yeleyi mpaka tuyiŵanichisye chamti m’yi. Tujile kuti wawojo akwawula kumalo kwangakukumanyilila. Ali ajesile panandi, akuyiwona kuti asokonechele. Ana mpaka atende chichi? Mwangakayichila mpaka atande kwenda panandipanandi, nikwima kaje, kaneko nigalawuka, nikutanda kwenda m’litala lyakuŵajilwa. Mwakulandana ni yeleyi, pakulijiganya Baibulo, komboleka kuyiwonaga kuti akwete ndamo kapena yindu yine yakusosekwa kuchenga paumi wawo. Aŵeje ŵakusachilila “kugalawuka” mwakuchenga yinduyo soni atande kutenda yayili yakuŵajilwa.

ALIPELECHE

14. Ana mpaka alipeleche chamtuli kwa Mlungu?

¹⁴ Chindu chine chakusosekwa kutenda mkanabatiswe chili kulipeleka kwa Yehofa. Akusalipeleka kwa Yehofa, naga akumsalila mwipopelo mwakumsimichisya kuti chachimlambila jwalakwe jika soni kuti chachikuwonaga kutenda lisosa lyakwe kuŵa kwakusosekwa mnope paumi wawo.—Detulonomo 6:15.

15, 16. Ana chichi chachikusamlimbikasya mundu kulipeleka kwa Mlungu?

¹⁵ Kumsimichisya Yehofa kuti chachimtumichila jwalakwe jika, kuli mpela kumsimichisya jwakunonyelwa jwawo kuti chachiŵa ni jwalakwe kwa umi wosope. Aganisye kuti jwamlume akumsaka jwamkongwe kuti amlombe. Jwamlumejo pakummanyilila chenene jwamkongwejo ni pakusamnonyelaga mnope soni ni pakusaŵa jwakusachilila kumlomba. Atamose kuti kutenda yeleyi kuli ngani jekulungwa, nambope jwamlumejo akusamlombaga jwamkongwejo ligongo lyakuti akusamnonyela.

¹⁶ Pakulijiganya yakwamba Yehofa, ni pakusamnonyelaga soni akusaŵaga ŵakusachilila kutenda chilichose kuti amtumichileje. Yeleyi yichalimbikasya kuti amsalile Yehofa mwipopelo kuti akusaka kumtumichila. Baibulo jikusasala kuti jwalijose jwakusaka kuŵa jwakulijiganya jwa Yesu akusosekwa “kulikana jika.” (Maliko 8:34) Ana yeleyi yikugopolela chichi? Yikugopolela kuti akusakuwona kumpikanila Yehofa kuŵa kwakusosekwa mnope paumi wawo. Yakusasaka Yehofa yili yakusosekwa mnope kupunda yakusasakaga wawojo soni yakulinga yawo.—Aŵalanje 1 Petulo 4:2.

AKAKOLA WOGA WAKUTI NGASAPAKOMBOLA

17. Ana ligongo chichi ŵane akusalepela kulipeleka kwa Yehofa?

¹⁷ Ŵane akusalepela kulipeleka kwa Yehofa, ligongo lyakogopa kuti ngasapitilisya kusunga chilanga chawo chakumtumichila jwalakwe. Jemanjajo akusasalaga kuti ngakusaka kumtumbilikasya Yehofa. Kapena mpaka aganisyeje kuti naga ngakulipeleka kwa Yehofa nikuti jwalakwe ngasiŵajimba magambo pa yindu yakutenda.

18. Ana chichi champaka chakamuchisye kumasya woga wakumtumbilikasya Yehofa?

¹⁸ Kumnonyela Yehofa kuchakamuchisya kumasya woga wakuti chachimtumbilikasya. Ligongo lyakuti akusamnonyela, chachitenda yiliyose yampaka akombole kuti atendeje yindu mwakamulana ni yaŵamsimichisye paŵalipelekaga kwa jwalakwe. (Jwakulalichila 5:4; Akolose 1:10) Ngasaganisya kuti kutenda yakusaka Yehofa kuli kwakusawusya mnope. Ndumetume Yohane jwalembile kuti, “Pakuŵa kumnonyela Mlungu kukusagopolela kugasunga malamusi gakwe, soni malamusi gakwego nganigaŵa gakusitopesya.”—1 Yohane 5:3.

19. Ana ligongo chichi ngakusosekwa kogopa kulipeleka kwa Yehofa?

¹⁹ Ngakusosekwa kuŵa mundu jwamlama kuti alipeleche kwa Yehofa. Jwalakwe jwangajembecheya kuti tutendeje yindu yanganituŵa tuyikombwele. (Salimo 103:14) Jwalakwe chachakamuchisya kutenda yindu yakuŵajilwa. (Yesaya 41:10) Amkulupilileje Yehofa ni mtima wosope, ni ‘jwalakwe chachijongola kajende kawo.’—Misyungu 3:5, 6. 

KUSALA PESWELA YA CHIKULUPUSYO CHAWO

20. Ana chichi chakusosekwa kutenda palipeleche kwa Mlungu?

²⁰ Ana akuganisya kuti ali ŵakoseka kulipeleka kwa Yehofa? Palipeleche kwa Yehofa nikuti panasoni chindu chine chakusosekwa kutenda. Akusosekwa kubatiswa.

21, 22. Ana “akusasala peswela” chamtuli ya chikulupi chawo?

²¹ Naga alipeleche kwa Yehofa soni akusaka kubatiswa, akusosekwa kumsalila jwakulondesya masengo ga achakulungwa jwampingo wawo. Kaneko jwalakwe chachilinganya yakuti achakulungwa ŵane alole naga wawojo akumanyilila yijiganyo yandanda ya m’Baibulo. Naga jemanjajo akusimichisya kuti wawojo akoseche kubatiswa, chachasalila kuti chabatiswe pamsongano wakuyichisya wamkuli kapena waupande wa Mboni sya Yehofa. Pamsonganopo pachiŵa ngani jakusala ya kugopolela kwa ubatiso. Jwakuŵecheta ngani jeleji chachaŵenda ŵakusaka kubatiswawo kwanga yiwusyo yiŵili. Naga akwanga yiwusyoyo, nikuti chachiŵa kuti “akusala peswela” ya chikulupi chawo.—Aloma 10:10.

²² Kaneko chachabatisya, mwakwatiŵisya chilu chosope m’mesi. Kubatiswaku kuchilosya jwalijose kuti wawojo alipeleche kwa Yehofa soni kuti ali Jwamboni sya Yehofa.

ANA KUBATISWA KWAWO KUKUSAGOPOLELA CHICHI?

23. Ana kubatiswa “m’lina lya Atati ni lya Mwanache ni lya msimu weswela” kukusagopolela chichi?

²³ Yesu ŵasasile kuti ŵakulijiganya ŵakwe chachibatiswa “m’lina lya Atati ni lya Mwanache ni lya msimu weswela.” (Aŵalanje Mateyu 28:19.) Ana yeleyi yikugopolela chichi? Yikugopolela kuti wawojo akusamanyililaga ulamusi wa Yehofa soni masengo ga Yesu pakwanilisya chakulinga cha Mlungu. Yikugopolelasoni kuti akusamanyililaga yakusatenda Mlungu pakamulichisya masengo msimu wakwe pakusaka kwanilisya chakulinga chakwe.—Salimo 83:18; Mateyu 28:18; Agalatiya 5:22, 23; 2 Petulo 1:21.

24, 25. (a) Ana ubatiso ukusagopolela chichi? (b) Ana tuchilijiganya chichi mu mtwe wakumalisya?

²⁴ Ubatiso ukusagopolela chindu chine chakusosekwa mnope. Paŵatiŵisye m’mesi chilu chosope, yikusagopolela kuti, alesile kapena kuti awile ku yitendo yawo yakala. Pachuwiche m’mesi, akusatanda umi wasambano wakutenda yakusaka ya ya Mlungu. Yeleyi yikusalosya kuti atandite kumtumichila Yehofa. Akusosekwa kumbuchila kuti nganalipeleka kwa mundu, ku chiwanja, kapena pamasengo gane gakwe. Nambo alipeleche kwa Yehofa.

²⁵ Kulipeleka kwawo kuchakamuchisya kusya unasi wawo ni Mlungu. (Salimo 25:14) Nambo yeleyi ngayikugopolela kuti mundu chachikulupuka ligongo lya kubatiswape. Ndumetume Paulo jwalembile kuti, “Ajendelechele kulinganya chikulupusyo chawo, mwawoga soni kutetemela.” (Afilipi 2:12) Ubatiso ugambile kuŵa pakutandila. Nambo ana mpaka am’ŵandichile chamtuli Yehofa? Mtwe wakumalisya wa buku ajino uchijanga chiwusyo chelechi.